МахIачкъалаллал хьхьирицIсса шагьрулул пляжрай ДР-лул Конституциялул Кьинилун хасну гьар шинах дувайсса «Каспийрал марч» тIисса щинал спортрал журардал фестиваль хьунни.
З. АьбдурахIманова
Ванил сакиншинна дурну дур ДР-лул Спортрал министерствалул ва МахIачкъалаллал администрациялул Спортрал, туризмалул ва жагьилтурал иширттал комитетрал.
Фестивальданий хьунни парсурал спортрал, кайтбординграл, виндсерфинграл, рафтинграл, судомоделированиялул, авиамоделированиялул, пляжрал футболданул, волейболданул бяст-ччаллу. Вайннувух гьуртту хьун бюхълай бия гъира бусса гьарцаннаща. Аьмну гьурттуну ия, личIи-личIисса оьрмулул шиннардивусса, 300-ксса инсан. Фестиваль тIитIлатIисса шадлугърайн бувкIун бия республикалул министерстварттал, ведомстварттал, шагьрулул администрациялул вакилтал, Халкьуннал Мажлисрал депутатътал, цIадурксса спортсментал ва районнайсса спортрал школарттал пишакартал.
Шикку махъ лахълай, МахIачкъалаллал бакIчинал хъиривчу Запир Алхасовлул кIицI лавгунни Дагъусттан мудангу спортраву хьхьичIминнавух бивкIшиву.
— ХIакьинугу жува хIарачат буллан аьркинссару, ттинин ларсъсса ххувшавурттай бакъавцIуну, жура-журасса спортрал бяст-ччаллаву цалчинми кIанттурду ласлан. Гьарнал хIарачат буллан аьркинссар цIуллу-цIакьсса оьрму бутлан. Ва фестивальданийх гьурттусса гьарнан ххувшаву чIа тIий ура. Укунсса жула шагьрулул халкьунная эбрат ласлантIиссар жула ялун нанисса жагьилмур никиралгу, — увкунни ванал.
ДР-лул спортрал министрнал хъиривчу Зайнал Салауттиновлул, фестивальданул гьурттучитал республикалул Конституциялул Кьинилущал барчагу бувну, чIа увкунни дакьаву ва гьарнал къатлуву барачат.
Фестиваль сакин дувавриву чIарахацIаву дурсса Муса Мусаевлухь ва шагьрулул пляжрал каялувчи Арсен МахIаммадовлухь барчаллагьрал махъру увкунни шагьрулул Спортрал, туризмалул ва жагьилтурал иширттал комитетрал хъунама Марат Ибрагьимовлул. Мукунма ванал кIицI лавгунни Спортрал министерствалущал архIал цал ттигу укунсса журалул цаппара шадлугъру дуван хIадур хъанай бушиву.
«Каспийрал марч» фестивальданий ххув хьуминнан буллунни кубокру, медаллу, грамотартту ва арцуйнусса премияртту.
