Жула агьали хIисав хьунну кIибивщуну, хъинну аваданмигу, хъинну мискинмигу ябуцлан бивкIун махъ, жува аьдат хьуну буру дур учинну каши дусса инсантурал оьрмулия хавар ласлай, му хIаз бизлай, тIиртIунийн ка дияйма цукун яхъанай урив кIул буллай. ЛичIи-личIину яхъанай бур ми, цала-цала хасиятран лавхьхьуну. Бур, циксса арцу духьурчангу, дакI цIархъаннува оьрму бутлатиссагу, бур га аваданшиву хасиятрацIун, тIул-тIабиаьтрацIун ххуйну даркьуссагу. Бур цала думур чил янила ларитлатиссагу, бур сахаватну цайминнан бутIа буллалиссагу. Бур цивппа алши бакъултну чIалачIиссагу, талихI-тирххандарал чанна лавхъссагу. Щала ишгу хасиятрал бур, инсан оьрмулух ургаврил куццул бур.
Вираттиричу Сапарбаг Аьбдуллаев яхъанай ур, на дунияллийн увксса оьрму илкинну бутаншиврулла тIий. Гьарцамагу мукуннихха тIутIисса учинссар ттухь. Амма гьарцаманан оьрму бутаврил мяъна цакуцну къадурчIай. Гьарцама къаикIай, оьрмулул мяъна, дакIнийхтуну ххирасса даврий дакIнийхтуну захIматгу бувну, даву къуртал дурну махъ ххуйну, тяхъану, рахIатну, дустурал ягу кулпатрал дянив игьалагавриву чIалачIисса. Сапарбаг Аьбдуллаев мукун тIутIиминнавасса ур.
Ванал цала предприятиялун дирзсса цIанийнува чIалай ур ва инсан романтик ушиву. «Вираж»… «Виратти» тIисса мукъуха лав­хьхьусса мукъух луглай, эмаратсса, исвагьийсса ва мяъна ххуйсса махъ ххал буллай лявкъушиву чIалай бур ва.
«Жула предприятие виражру дуллай, лахънийн лахълайри бусса учайссар Сапардул», — тIий ур «Вираж» СМУ-рал базалул хъунама Буниямин. Ми Сапарбаглул цала зумуну, хъярчирайрив, бунияларив гацIана бувчIин къашай­сса куццуй увкусса махъру бур. Виражруми ва предприятиялул бунияласса дуллай бур. Вайннал дурсса давурттаву яла хъинну хIисав данмунин ккаллисса хъанай дур МахIачкъалалив цимигу шинай дуллай бивкIсса библиотекалунсса къатри къуртал даву. Вай къатраха вайннащал архIал цайми организациярдал бригадардугу зий бия, амма яла хъинну дакI даркьуна вайнналмур даврий. Бетонгума циняв бригадардал вайнналмур ишла буллай бия, цащава укун ххуйну бан къахъанай тIий. Га строительствалул ялувсса Дибиров ия, уттиния тиннай циняр заказру вайнначIа дулланна тIий.
ДукIу вайннал Центробанкрал къатрал реконструкция дурну дур. Минэкономикалул къатрал строительствалул циняр давурттугу вайннал дурну дур.
Утти 90 квартира бусса къатри дуллай бур, шагьрулул администрациялул заказрайн бувну. «Дагрыба» объединениялул дуллай байбивхьуну, дан къархьуну кьадиртсса даву утти ва СМУ-райн тапшур дурну дур.
Зунсса кашигу, шартIругу шикку диялсса дур. ТIаннул давуртту дай­сса хъунмасса цех бур. Бур цала бувсса техстанция. Техника щала цIусса ларсун дур. Ва яла-ялагу, Сапарбаглул ябувну бур га цIубутIуй цащала зун байбивхьусса, коллективрал вирдакIну хъанахъисса зузалт.
«Сапарбаг даву хъинну тIалав дайсса, цувагу хъинну зун икIайсса инсан ур, — тIий бур вай. — Амма жущал архIал игьалаглагийни ванаяр дакI хъинсса цучIав къаикIай». Коллективрал циняр байранну цачIу кIицI лагай. Миннуву яла ххирамургу, гьай-гьай, строительнал кьини дур. Му байран августрал цалчинмур нюжмардийн дагьайссар. Ца шинал му кьини вай циняв жамилий хьхьирийхгума лавгуна. Ххуллун-алхIат кьинирдай щала коллектив чIявуну ванал цала дачалийнгу батIай. Гьарца зузала увсса кьинигу Сапарбаглул кабинетраву стол къур бай, махъру лахъай, бялахъай.
Сапарбаг Аьбдуллаев «Вираж» СМУ-рал коллективран акъасса, циняв лакрангу ххуйну кIулссар. Миллатрал цIаний цув ци даву дулларчагу, чIарав ацIан, спонсоршиву дан цайминнаяр хьхьичI ва ачайссар. Ванайн барчаллагьрай буссар творческий вечерду дурсса цикссагу лак. Лакрал театрданул коллектив. Барчаллагьрай буссар жул кказитрал коллективгу. Миллатрай дакI цIуцIисса, миллатрал культура ххирасса уну тIийри жула кказитрал редколлегиялувунгу увчIусса.
Февральданул 10-нний Сапарбаг Аьбдуллаевлул кабинетравун кIура баентIиссар щала коллектив. Вай бучIантIиссар ва увсса кьини барча дан, цала дакIнийсса ххуйсса махъру хIалу дирирну дунура ванахь учин. Миннащал архIал жугу учин ччай буру: Барча ина увсса кьини, Сапарбаг, оьрмулуву ина бавхIусса ссапар тIайлабацIу бусса бакъа къахьуннав!
ПатIимат Бариева
1999 ш.