Махъсса шиннардий ниттил мазру хъамабитлатисса, бухлаглагисса заманнай, ми буруччавриву хъунмасса бияла бур миллатирттал мазурдил дарсру дихьлахьисса учительтурахь. МахIачкъала шагьрулул 10-мур школалий лакку мазрал дарсру дихьлахьисса 1-мур ЦIувкIуллал шяраватусса Басират ХIажиевагу хъуннасса даву дуллай бур ялун нанисса никираву лакку мазрах ччаву рутан.

Зулайхат Тахакьаева
ДакIний бур дахьва университет къуртал бувну, МахIачкъала шагьрулул 4-мур школалий лакку мазрал дарсру дихьлахьисса на буссияв Дагъусттаннал учительтурал пишакаршиву ларай дайсса институт­раву ниттил мазрал дарсру дихьлахьисса учительтурансса курсирдайн занай. Гикку кIул хьуссара Басират

Рамазановнащал. Га буслай бия хьхьичI цуппа бивкIшиву байбихьулул классирттаву дар­сру дихьлай. Школалий миллатирттал мазурдийсса дарсру дихьлай байбивхьукун, лакку мазрал дар­с­ру дихьлансса учительгу акъа, му щин аьркинссар тIий, цучIав рязи къахъанай, дуклаки оьрчIругу мунийн занан ччай къабивкIшиву. Му чIумал Басират Рамазановнал, байбихьулул классирттал учительшивугу кьариртун, бакIрайн ларсун дур лакку мазрал дарсру дихьлан. Дуклаки оьрчIангу, миннал нитти-буттахъангу бувчIин буллан багьну бур маз миллатрал гьануну хъана­хъишиву, маз бухлавгсса миллатрал бучIантIимур бакъашиву.
Дарсру дихьлай, хIалли-хIаллих оьрчIавун гъира бутансса шартIру ляхълай, оьрчIал лакрал шаэртуращалсса, миллатрал хьхьичIунсса инсантуращалсса хьунабакьавур­тту сакин дуллай, цайми школар­ттай дуллалисса лакку мазран хасъсса мероприятиярттайн буцлай, телевидениялий передачартту дуллай, оьрчIавун лакку мазрал дарсирах бунияла ччаву руртун дур. Дуклаки оьрчIругу, республикалул олимпиадарттай, конкурсирдай гьурттушинна дуллай, хьхьичIунсса кIантту бугьлай, учительницал захIмат зия къахьун хIарачат буллай бивкIун бур.
Лакку мазрах ччаву дуну хъуни бунни цилвами оьрчIру ва оьрчIал оьрчIругу. 5-мур класс­раву дуклакисса ванил арснал душ ХIажиева Камилал зурдардил хьхьичI МахIачкъала шагьрулул 37-мур школалий хьусса лакку мазрай дакIних шеъри буккаврил конкурсрай бувгьунни 2-мур кIану.
Бувну бур Басират Рамазановна ЦIувкIуллал шяраву. Бу­ттал шяраву школагу къуртал бувну, дуклан бувххун бур Буйнакскалийсса педучилищалувун. Учительнал пишалухсса ччаву ванийн дирну дур буттая. Хъунмасса Бу­ттал КIанттул цIанийсса дяъвилул гьурттучи Рамазан Маджидовлул ЦIувкIуллал школалий зий дурну дур 60 шин. Уссу Маджидов Илияс тамансса шиннардий зий ивкIун ур ЦIувкIуллал школалул директорну. Вама уссу Эмрангу ур физкультуралул учитель. Ссил Асиятлулгу мукунма язи бувгьуну бур педагогнал пиша. ЦIанакул ва зий бур Ваччав библиотекалий.
Педучилище къуртал бувния шинмай, хIакьинусса кьининийн, 50 шинал мутталий, цилва пишалийн дакI тIайлану зий бур Басират Рамазановнагу. Шанна шин дурну дур Ккулув байбихьулул школалул учительницану зий.
Щар хьуну бур Москавлив навтлил институт къуртал бувну махъ Гурьеврай зузисса цала шяравучу МахIаммадлун. ЦIуллу-сагъшиву сававну цалла давугу кьадиртун, зий айивхьуну ур «Рембыттехника» идаралий. ХьхьичIунсса зузала хIисаврай ванал сурат диркIун дур ХIурматрал улттуй. Басиратгу тихун бучIайхтува зий байбивхьуну бур Джамби Джабаевлул цIанийсса школалий байбихьулул классир­ттахь дарс дихьлай. Тикку зий дурну дур 15 шин. Лайкь хьуну бур Къазахъисттаннал КIулшиву дулаврил отличникнал цIанин. Шинну нани­ссаксса гъурбатрайсса оьрмулия бизар хьуну, ватандалухсса мякь ял­тту буклан бивкIукун, зана хьуну бур шаппай, Дагъусттаннайнмай. Зий байбивхьуну бур МахIачкъала шагьрулул 10-мур школалий, хьхьичI байбихьулул классирттал учительницану, яла лакку мазрал дарсру дихьлай.
50 шин педагогнал даврий зий, миннувагу 20-хъул хас дурну дур ниттил мазран. ДакIний личIансса хьуссар цаппара шиннардил хьхьичI Басират Рамазановнал МахIачкъала шагьрулун 150 шин шаврил юбилейран хас дурсса лакку мазрайсса мероприятие, та мероприятиялухлу бувгьуссар 1-мур кIану. Ва бур лакку мазрал дарс лайкьсса даражалий дихьлахьисса учительтуравасса ца, «Дараччи» клубрал чялишсса член. Барчаллагьрай бур клубрал хъунмур Мариян Илиясовайн, школалий лакку мазрал дарсру лайкьсса даражалий дихьлан буллалисса кумаграхлу.
Басират цуппагу кумаг буллай бур «Илчи» кказитгу, «ЦIубарз» ва «ЧIавалачин» журналлугу дуклаки оьрчIал нитти-буттахъал чичин бан.
Ванищал ца школалий зий тамансса шинну дурсса лакрал шаэр, Дагъусттаннал халкьуннал шаэр Ссугъури Увайсов буслай ур Басират Рамазановнал ччя-ччяни дайсса диркIшиву лакрал шаэртуращалсса хьунабакьавуртту. Коллективраву хIал бавкьусса коллега, дуклаки оьрчIачIа ва миннал нитти-буттачIа хIурмат лавайсса учитель, яла-ялагу оьрчIан ххаллилсса тарбия дуллусса нинушиврий кIицI лаглай ур Ссу­гъури Увайсов Басират Рамазановна.
Яла хъунмур хъус тIайла бав­цIусса оьрчIрур учай Басиратлул. Ласгу ччяни дунияллия лавгун, замана кунпайкун хьусса, билаятран захIматсса 90-ку шиннардий цинмалу ччаннай бацIан буллан багьну бур 3 оьрчI. Шанмагу оьрчIан лайкьсса тарбиягу дуллуну, ларайсса кIулшивуртту ласун бувну, жяматраву бусравну бур. Хъунмур душ Лаура зий бур МахIачкъала шагьрулул 34-мур школалий, биологиялул дарсру дихьлай. ЧIивимур Эльмира зий бур 40-мур школалий ингилис мазрал дарсру дихьлай. Арс Максим Дагъусттаннал мединститутрал стоматологиялул факультетрай дуклай унува, дарсирдая мукьах, хIакинтурачIан занай, гайннащал зий, цайнура цалла пишакаршиву ларай дурну, ччянива лайкь хьуну ур халкьуннал хIурматран, хIакьинусса кьини ва ур цала кабинет бусса республикалий хьхьичIунсса ккарччал хIакин.
Ххари буллай бур Басират Рамазановна арсурваврал оьрчIалгу. Душнил арс Закарияев МахIаммад ур греплинграл дунияллул чемпион. Дуклай ур Дагъусттаннал паччахIлугърал медакадемиялуву стоматологиялул факультетрай.
Ххари хъанай бур цила тарбия бувсса дуклаки оьрчIал тIай­лабацIурттаягу. ХIакьину ми бур щалва Аьрасатнаву зий.
Басират Рамазановнайн барчаллагьрай бур дуклаки оьрчIал нитти-буттахъулгу, цалва оьрчIаву лакку мазрахсса гъира ва ччаву тарбия даврихлу.
Кьубиял шяраватусса Земфира ва ЧIарттал шяраватусса ПатIимат барча буллай бур Басират Рамазановна оьрмулул 70 шинал юбилейращал.
ДакIнийхтуну барча тIий буру жугу Басират Рамазановнахь оьрмулул 70 шин там шаврил ва педагогнал даврий зий 50 шин шаврил юбилейрду. ЧIа тIий буру ттигу цикссагу шиннардий ялун нанисса никираву лакку мазрахсса ччаву тарбия дуллансса цIуллушиву.