Ларгсса нюжмар кьини Апанни Къапиевлул цIанийсса Лакрал музыкалул ва драмалул театрдануву хьунни ирглийсса сезон лакьлакьисса вечер.

Зулайхат Тахакьаева
Ларкьунни му театрданун 80 шиншаврил юбилейран хас дур­сса программалийну. Дайдирхьуна программа сезон цийну тIиртIусса ппухълуннал аьпа ва тарих буручлачисса «Хан-Муртазааьли» спектакльданийну. Гихунмай ккаккан бунни «Камаллул Башир», «Малла Насруттин», «БурцIурдил хъатIи», «ЛухIи кьини», «Ханума», «Гамлет», «Бархъаллал Маллай ва Гъумучиял ПатIимат», «Аьрщи ва ссав» спектакльлавасса бутIри.
Балайрду увкунни Саният Рамазановал, Шамсуттин Къаплановлул, Халисат Батырбековал, Анисат АьбдуллатIиповал, Зульфия Архилаевал, Ямлихан ХIажиевлул, Аьбдул Мурадовлул.
Къуртал дуруна концерт лакрал аслийсса «Къиссу» къавтIаврийну.
Концертрая махъ ихтилат барду театрданул художеств­алул каялувчи Бадрижат МахIаммад­хIажиеващал.
— Бадрижат Набиевна, цукун ларгри театрданул юбилейрал сезон?
— Сезон тIитIиннинна ца анаварну ларгсса кунна чIалай дур. Бигьассагу дакъая. Юбилейрал сезон духьувкун, ххину-ххишаласса жаваблувшинна бакIрайн ларсун зун багьлай бия. Сезон тIитIин аьркинну чIалай бия миллатрал тарих циву бусса, лакку улклул бакIрачIан дуркIсса яла оьми кьинирдая ва ми кьинирду лайкьну дурхIусса ппухълуннал чувшиврия ва яхI-къириятрая бусласисса, Дагъус­ттаннал миллатирттал уссушиврул ва цашиврул лишанну хьусса «Хан-Муртазааьли» спектакль цIубуккан баврийну (спектакльданул автор ЦIигьил Камалов, музыка — Аьрасатнал халкьуннал артист Ширвани Чаллаевлул, режиссер — Да­гъусттаннал халкьуннал артист Аслан МахIаммадов).
Махъсса шиннардий къавхьусса тIайлабацIулущал тIитIарду сезон. Мукунма зал шапI куну бувцIуну, актертал ва тамашачиталгу рязину хьунни «Малла-Насруттин» спектакльданул премьерагу.
АрхIалва театрданул юбилейрайнгу хIадур хъанан багьлай бухьувкун, щалва коллективрай хъуннасса гьиву дия. ХIадур дан багьлай бия театрданул яла яргми лахIзардая, спектакльлая бусласисса суратирттал стендру, гьарза-гьартасса байрандалул программа. Барчаллагь тIий буру театрданул юбилей лайкьсса даражалий дуван кабакьу бувсса ДР-лул Культуралул министерствалухь ва жула муданмасса чIарахбацIултрахь.
Мунила хъирив хIадур хъанан багьуна цIусса премьералийн — хIакьинусса кьининийнгу дунияллул театрданул яла бюхттулмур бакIну личIлачIисса ингилиснал драматург Уильям Шекспирдул пьесалиясса «Гамлет» спектакль бишин. Уттинин Дагъусттаннал театр­дал сахIналий къабивхьусса спектакль цалчин жува бихьлай бухьувкун, бугу лакку мазрай ва оьрус мазрай, миккугу жуй хъуннасса жаваблувшинна дия. Спектакльданул лавайсса кьимат бивщунни театрал ишккаккултрал, дагъусттаннал театр­дал режиссертурал. Ххуй-ххуйсса отзывру дурккунни республикалул прессалийгу.
— Лакку мазрал, литературалул, аьмну щалла лакрал магьирлугърал ялун бучIантIимуний дакI цIуцIисса инсантал вийн барчаллагьрай бур лакку мазрайсса шеърирду дакIних буккаврил ва балай учаврил конкурс баврихлу. «Щаращи» конкурсрал хIасиллайн бувну исват хьунни жулва миллатрал ялун гьунар бусса ник най душиву.
— Миллатирттал мазру ябан хъунмур хъар, кказитирттая ливчуну махъ, театрдайри дусса. Мунияту жула даврил ца агьамсса ххуллуну жу ккаклай буру ялун нани­сса никираву ниттил мазрах, ни­ттил мазрайсса творчествалух ччаву рутансса давуртту. Микку ялун личлай бур гьунар бусса оьрчIругу. Зунма чIалачIисса куццуй, махъсса шиннардий театрдануву зун букIлай бия лакку маз сайки къакIулсса жагьилсса актертал. Миннан маз лавхьхьуссар театрдануву, завлит Гулизар Султановал, режиссер Аслан МахIаммадовлул, бугьарасса актертал Уди Аьлиевал, Жинасат ДинмахIаммадовал, Ларина Оьмаровал хIарачатрацIух, миннал дихьлахьисса дарсирдайну. Лакку маз кIулсса жагьилтал хIакьину хасну Лакрал театрданун багьа бакъасса хъусну хъанай дур. Мунийн бувну, «Щаращи» конкурсрал жун кабакьу буллалиссар лакку маз кIулсса, лакку мазрай пасихIну шеъри бу­ккин бюхъайсса, балай учаврил гьунар бусса оьрчIру-душру ялун личин бан.
Ххариссару лакрал шаннагу райондалиясса оьрчIал ва конкурсрай чялишсса гьурттушинна даврия. Барчаллагь тIий буру конкурсрайн оьрчIру тIайла буккансса сакиншинна дузал дурсса районнал бакIчитурахь, кIулшиву дулаврил управлениярттал каялувчитурахь, лакку мазрал дарсру дихьлахьисса учительтурахь, спонсортурахь.
Конкурс буллантIиссар кIира шинай цал.
— Театр гастроллайн та нани­ссар ва ци программалущал наниссар?
— Ттинин театр районнайн ва къутаннайн гастроллай лагай­ссия театрданул сезон лакьавривун. Гьашину, Зумадугьул барз ялун бивну бухьувкун, жу хIукму барду цал коллектив отпускрайн итабакьин. Зума ритайхту тIайла бу­ккан гастроллайн. Жул пикри бу­ссар хьхьичI шаннагу райондалий – Ваччав, Гъумук, ЦIуссалаккуй дан театрданул юбилейран хас дурсса шан-шанна кьинисса фестиваль. Мунил лагрулуву ккаккан бан «Хан-Муртазааьли» спектакль ва юбилейрал вечер. Гихуннай щархъаву ккаккан дан юбилейрал концерт ва «Малла Насруттин».
— Барчаллагь, Бадрижат Набиевнай. ТIайлабацIусса гастроллу хьуннав!