ЦIунилгу вай гьантрай хъуншагьрулул кIичIирттаву ччюрклил бакIурдаха бачин къашай тIисса рязи бакъасса хавартту гьаз хьунни интернетрал соц.сетирдавугу, ччюрк дукьаврих чIярусса арцурду дуллалисса укунмасса халкьуннал дянивугу. Кьункьал лавсун нанисса ччюрклил бакIу бакъасса кIичIира хIакьину хъуншагьрулий нажагь бакъа къахьунабакьайнуккар. Ва масъалалун хасну, МахIачкъалаллал бакIчинал хъиривчу Аьбдулмуъмин ИбрагьимовлучIа хьунни хъуннасса ва чIявусса пишакартал гьурттусса батIаву. Вай бакъасса мукунма бучIан бувну бия «Эко-М» ччюрк дукьай компаниялул ва Цасса диспетчерский къуллугърал вакилтал.
З.АьбдурахIманова
Цила чIумал ччюрк дукьайсса шагьрулул къуллугърал биялалуde буссар цумур-цагу шагьрулул халкьуннал багьу-бизугу, миннал шагьрулуву хъанахъимунихсса къeлагъасгу. Гьарца кьини МахIачкъалаллал халкьуннал экьи дичлай бур полиэтилендалул кьуцурттаву дархIусса ва строительствалул ччюрклил тоннарду. Шагьру хъунма хъанахъаврицIун, халкь гьарза хъанахъаврицIун чIяру хьуну дур ччюркгу. Мунияту шагьру ччюрклицIа марцI буллалисса хасъсса къуллугъругу ва иш хIисавравун лавсун хьхьичIунмай бачин аьркинссар, цивппа уттизаманнул шартIирдаву зун бюхъайсса къуллугъ бушиву ккан бан аьркинссар.
Шагьрулул бакIчи Муса Мусаевлул цIания батIаву дачин дурсса Аьбдулмуъмин Ибрагьимовлул кIицI лавгунни, ва масъалалуха зузисса шагьрулул къуллугъругу, клининграл компаниярттугу зун аьркиншиву уттизаманнул тIалавшиннардайн бувну. ГьануцIакул даххана дуван аьркиншиву миннал цайва бивхьусса буржру щаллу буваву. Цала буржру биттур бан къарязий хъанахъисса, даву дан къабюхълахъисса компаниярттал чулухуннай кьянкьасса тIалавшинна дуллантIишиву шагьрулул каялувшинналул. Шагьрулул бакIчинал хъиривчунал тавакъю бувунни ччюрклицIа шагьру марцI баврия ягу къулагъас дакъашивриясса макьалартту, передачартту республикалул СМИ-рдавугу ришлан, ккаккан дуллан ва буслан аьркиншиву. Шагьрулул администрациялул нюжмар дайдихьлахьисса гьарца итни кьини дувайсса хьунабакьавуртту ччюрклил масъала гьаз баврия дайдихьлантIишиву.
Мукунма шикку ххал бивгьунни заллу-зал акъа шагьрулул кIичIирттавух заназисса ризкьилул хIакъиравусса масъалагу. КIицI лавгунни, мукунсса заллухъру арцул аькIрайну низамрайн буцин аьркиншиву. БатIаврий цал ялагу кьянкьасса дюъ дирхьунни шагьрулул кIичIирттава ччюрк дукьлакьисса «Эко-М» компаниялул пишакартурай ва баян бунни августрал 1-ннин цайвасса буржру биттур бан къавхьуну, ччюрклил масъала щяв къабагьарча, компаниялул чулухуннайсса тIалавшинна низамрал ххуллийсса дикIантIишиву.
