ОьрчIан апатIру къахьунсса чаран ляхълай

22_1Гъинтнил каникуллу гъан хъанахъисса, май зурул 25-нния июнь зурул 15-ннийн бияннинсса гьантрай МахIачкъалалив хьунтIиссар «Внимание – Дети!» тIисса щалагу Аьрасатнаву нани­сса профилактикалул операциялул цалчинсса этап.  «Внимание – Дети!»

операциялул мурад хъанай бур оьрчIру хIаласса ДТП-тту хьун къаритаву. Статистикалул чIалачIи буллай бур оьрчIру хIаласса аварияртту чIяруну хъанай душиву гъинтнил каникуллу дайдирхьусса ва къуртал хъанахъисса, оьрчIру хъуниминнал къулагъасралу бакъасса чIумал. Му чIумал оьрчIру чIявуну кьатIух бур, ми велосипедирттай машиналул ххуллийн буклай бур.
МахIачкъалалив ва шин дайдирхьуния шихуннай оьрчIру хIаласса 15 ДТП хьуну дур. Миннуву ца оьрчI ивкIуну ур, 14 оьрчIан цIунцIияртту хьуну дур.
Май зурул 9-нний, ссят 13.00 хьусса чIумал, Ахъушинскийл цIанийсса кучалий, 96 «а» къатрал хIаятраву, «BMW-Х5» машиналул шупIирнал щун бувну бур 6 шинавусса оьрчIайн. Му азарханалийн увцуну най буна къуртал хьуну ур. ОьрчI машиналул ххуллучIан гъанну цувалу занай ивкIун ур.
Май зурул 15-нний, ссят 15.00 хьусса чIумал, Петр Первыйл цIанийсса кучалий, №23 къатрайн тIайлану, «Hyundai-Accent» машиналул шупIирнал щун бувну бур бавцIусса троллейбусрайн. Му ппурттуву троллейбусраву пассажиртал къабивкIун бур. Ва ишираву «Hyundai-Accent» машиналувусса 5 пассажир, цIунцIияртту хьуну, МахIачкъалаллал азарханалийн иян увну ур. Миннавасса ца балугъравун къаивсса ур. ЧIивисса оьрчI хасъсса, оьрчIансса креслолуву къаивкIун ур.
«Внимание – Дети!» операциялул лагрулуву Госавтоинспекциялул ва КIулшивуртту дулаврил управлениялул зузалтрал дан тIий бур ххуллурдай оьрчIан апатIру къашаву мурадрайсса давуртту.
Май зурул 26-нний хьунни «Безопасное колесо – 2016» тIисса щалагу Аьрасатнаву нанисса мюрщи инспектортурал конкурсрал республикалул этап. Ва конкурсрай гьуртту хьунни республикалул 7 школалул команда. КIицI къабувну къабучIир, конкурсраву гьуртту хьуми цинявппагу ххуйну хIадур хьуну бия, чIалай бия ми хIадур буллай бивкIсса каялувчитурал хъунмасса захIмат бивхьушиву. Конкурсраву цалчинсса кIану бувгьусса команда гьуртту хьунтIиссар Аьрасатналмур конкурсрай.
Уттиния тихуннай дуллан­тIиссар ххуллурдай оьрчIан апатIру къахьунсса чаран лякъаврил хIакъиравусса нитти-буттал соб­ранияртту ва совещанияртту.
ГИБДД-лул зузалтрал ххал бантIиссар ххуллурду. Мукунма ххуллул масъаларттаха зузисса штатрай бакъасса полицалтращал цачIу гьарица кьини дуллантIиссар рейдру, ххуллул низам къадурур­ччусса шупIиртал ашкара баву мурадрай. Амма вай давурттаясса мюнпат ххишаласса бикIантIиссар, миннувух цинявппа хъуними хIала буххарча.
Хъунмасса тавакъю буллай буру нитти-буттахь: гьарица кьини тикрал дуллалияра оьрчIащал ххуллул низам, макьабитларду оьрчIру цахунма цивппа бивчуну, ккаккан бувара оьрчIан ххуллу чув ва цукун лахъан аьркинссарив.
Мукунма тавакъю буллай буру шупIир­турахь: уттиния тихунмай ххуллурдайх оьрчIру чIяву хьунтIиссар. ЛичIлулну бикIияра. ХIаллих бачияра. Машиналул ххуллий оьрчIру ххал хьурча, га цIана бацIан бувара.
Аьрххи-ххуллу тIайлабацIусса хьуннав!
МахIаммадрасул МахIаммадов,
полициялул хъунама лейтенант, ДПС-лул личIисса ба­тальондалул инспектор.
ХIадур бувссар
А. Аьбдуллаевал