Москавуллал Миллатирттал къатраву хьунни «25 шин цачIу» тIисса шадлугърал вечер. Му иширан хасну уттигъанну цилла 25 шин шаврил юбилей дурсса Москавуллал «Дагестан» культуралул центрданул «Дагъусттаннан дакI тIайлашиврухлу» тIисса медаль
дуллунни Москавлив Дагъусттаннал община хьхьичIуннай дансса захIмат бувсса дагъусттанлувтуран.
ХIасан Аьдилов
Наградартту дуллуминнавух бур: АьФ-лул ПрезидентначIасса ДР-лул вакил Изумруд МухIуттинова, профессор, Медициналул ва правалул управлениялул академиялул ректор Борис Нувахов, ишбажаранчитал Мумму ХIасанхIусайнов ва ПирмахIаммад Балакеримов, балайчи, ДР-лул лайкь хьусса артист Марио Аьли Дюранд Сутуев ва дунияллул халкьуннал конкурсирдал лауреат Ислам ИсябахIандов, «Рассвет» ансамбльданул каялувчи ПатIимат Хайбуллаева. Мукунна награда дуллунни «Дагестан» МЦК-лул активистуран – юрист Нариман Аюбовлун, этнограф-искусствовед ПатIимат ХIаммадован ва ихтиярду дуруччай органнал зузала Аьппас Аьлишаевлун.
Медаллу дуллай, «Дагестан» МЦК-лул Президент Арсен ХIусайновлул бувсунни гьарца медаль дуллуманал кьимат бищун къашайсса захIмат бивхьуну бушиву аьмсса давриву, ми давуртту дуллай бушиву Москавливсса жулва ватанлувтал лагма лаган буллан ва кумаг буллан. Ганал мукунма бувсунни ва сияхI шиная шинайн хъунна хъанантIишиву цIу-цIусса цIардайну.
Мероприятиялул хъамаллуравух бия АьФ-лул ПрезидентначIасса ДР-лул Вакилханалул каялувчи, Аьрасатнал Халкьуннал ассамблеялул ва Москавуллал личIи-личIисса этнокультурардал цачIуншивурттал каялувчитал, цIа дурксса жяматийсса ишккаккулт, бизнес-сообществалул вакилтал, элмулул ва культуралул зузалт.
Вечерданий ккаккан дурунни ххуйсса концертгу. Балайрду увкунни Дагъусттаннал лайкь хьусса артистал СалихIат Валиевал ва Марио Аьли Дюранд Сутуевлул, дунияллул халкьуннал конкурсирдал лауреатътал Сафи Султановал, Ислам ИсябахIандовлул, Валерия Струковал ва цайминналгу. «Рассвет» ансамбльданул лезгинкалухун циняв къавтIун бизлай бия.
