МахIачкъалалив къуртал хьунни интнил призыврал компания. АрвахI кьини МахIачкъалаллал призыврал пунктрая лахъа-хъунну тIайла бувккунни махъва-махъсса спецборт – Баргъбуккавал аьра­ли округрай – Владивостокрай, Сахалиннай, Хабаровскалий, Куриллай къуллугъ буллантIисса 300 призывник. Миннава 200 – Дагъусттаннаясса бур, 100 – АьсатIиннава ва Чаргаснава бучIантIиссар тIий бур.

Андриана Аьбдуллаева
Призывной пунктрал хIаятраву бавтIсса жагьилтурахь ххуллухъин тIисса, насихIатрайсса махъ лавхъунни Дагъусттаннал саллатIнал ниттихъал комитетрал председатель Зульфия МахIаммадовал.
— Ххирасса арсрув!
ХIакьину зу гьантIиссару жулва билаятрал аьралуннаву къуллугъ буллан. ДакIний битияра, Армия – му захIматсса шартIирдай зул хIал, кьянкьа-кьурчIишиву, ссавур, яхI ххал бигьайсса полигонни.
Аьралуннаву миннатру къабайссарча, амрурду байссар. Зу хIадурну бикIан аьркинссару зула командиртурал амрурду даччин къадурну биттур буллан. УставрацIун бавкьуну зулва аьрали буржру щаллу буллалисса чIумалли зуща зулла ихтиярдаягу гъалгъа тIун хьунтIисса.
Ми ихтиярдугу, закканттай бакъача, аьрали частьрал командованиялул ва аьрали прокуратуралул кумаграйхчIинни дуручлан аьркинсса. Инава къатIайлану ивкIхьурча багъишла ити учаву хьхьарашиврул лишан дакъар, му яхI бушиврул лишанни. Хъунасса Заннал хьхьичI цинявппагу архIалссар.
Инава яхьусса къатлуву, вила лагма-ялтту марцIшиву даву да­гъусттанчунан тачIав кьюкьала­сса затну къабивкIссар. ДакIний битияра, зух, ссавур духларгун, вас-ццахлий, ялугьлай дуссар нинухъру. Аьралуннаву УставрацIун къадаркьусса тIуллу дулланнин азарийла пикри бувара, ниттил иттату багьсса мукьал кIунтIлил, зул тIулдакъашиву сававну кулпатрая дурксса харжлугърал багьасса цичIар дакъашиву. Балики зущава, сант дакъасса иш хьурча, оьвчияра жучIан. Жу хъирив букканну, кумаг банну, иш хъиннува оьнивун багьаннин. ДакIний битияра, аьралуннаву къуллугъ буллай лавхьхьумур зун гихунмайсса оьрмулувугу бучIи лякъинтIиссар. Ххуллухъин баннав, дакI ххарину зана хьуннав, — увкунни Зульфия МахIаммадовал.
Жагьилтал аьралуннавун тIайла буклай, гьарица аьрали частьрал вакилнахьхьун Комитетрал буллай бур информациялул пакет. Му пакетраву дур призывникнансса, цукун къуллугъ буллан аьркинссарив бусласисса ва СаллатIнал нитти­хъал адрес ва номерду чивчусса памятка, дур мукунна аьрали частирдал командиртурансса, жула оьрчIал менталитетрая бусласисса, миннащал цукун зунссарив маслихIат буллалисса памятка. Дур присяга кьамул буллалисса чIумал дуккай­сса Комитетрал жула призывниктурайнсса оьвчавугу, командиртуран Дагъусттанная аьралуннаву къуллугъ буллан бувкIсса жагьилтуращал ци хIисавравун лавсун, цукун зун аьркинссарив маслихIат буллалисса ДР-лул Аьрали комиссариат­рал чулухасса брошюрарттугу. Ва информациялул пакет гьан буллай бур жула оьрчIру къуллугъ бан нанисса аьрали частирдавун. Ялагу, къуллугъ бан нанисса жагьилтуращал Комитетрал цала чулуха тIайла буклай бур ахъулсса, щинну, нацIу-кьацIу дирхьусса къуршив.
Шиккува кIицI лаган, Дагъус­ттаннал СаллатIнал ниттихъал комитет Аьрасатнаву ца яла зузимур, яла хьхьичIунмур комитетран ккаллину бур. Вайннал куннасса даву дуллалисса Комитетру хIакьину нажагьсса бухьунссар. Комитетрал председатель Зульфия МахIаммадова цила даву ххирасса ва ларайсса даражалий дуллалисса инсан бур. Жагьилтал призывной пунктрая аьралуннавун тIайла буккаврия байбивхьуну, ми шаппай зана хьуннин, хьхьу-кьини къаувкуну, Комитет зий бур жулва оьрчIру къуллугъ буллалисса цинярдагу аьра­ли частирдал командиртуращал. Хьхьу-кьини дакъа зузисса Комитетрал телефондалийн къаоьвтIисса чIун нажагьссарагу къадикIай.
— Жулва оьрчIру къуллугъ буллалисса Калининградрай, Владивостокрай, Сахалиннай, Куриллай 7-8 ссятрал тапаватшиву духьувкун, жун хьхьувайгу зун багьай. Жуйн хьхьунил ссят кIира хьусса чIумалгу, кIюрххицIунмай мукьра хьусса чIумалгу оьвтIун бикIайссар. Гьай-гьай, шай ишру жулва оьрчIал тIулдакъашивуртту дурсса, хъунмурчIиннив ми ххуйну къуллугъ буллай бур, аьрали частирдал командиртурая жучIан чIявусса барчаллагьрал чагъарду бучIай, — тIий, буслай бур Зульфия Расуловна.