Дагъусттаннайгу чIявуссаннан кьартIану хьусса ЕГЭ-рду дуллай байбивхьунни. КьартIа тIутIиссагу выпускниктурал кIулшивуртту хьхьарасса душиврул дардисандалийн бувну тIий бакъарача, чIявусса нитти-буттахъул ЕГЭ-рдал, гьаманки концлагерьданий куннасса ялувбацIаву дусса тагьарданул оьрчIавун нигь-ццах рутлай дур,
ярагъуннийн ябияйхтува оьрчIру гьанавиххи хьуну,кIулмургума хъамабитлай бур тIисса аьрзирдайн бувну. Буниялттунгу, экзаменналул чIапIи-бланк столдания хаварбакъулий щяв дагьарча, му щяту гьаз дувансса ихтияр дулуннин комиссиялул 10-15 минутIрай ялугьлан, му чун нанисса ишри? Выпускниктал чIапIи щяв къадагьан дакIру хъякуну бикIанссар, гьай-гьай. Школа къуртал баврил ххаришивугу асар къахьунссар ЕГЭ-рду дуллуну къуртал къавхьуссаксса.
ПатIимат Рамазанова
Дагъусттаннал Минобразованиялул министр Шагьаьппас Шагьовлул бувсунни гьашину Дагъусттаннай ЕГЭ-рду дуллалишиву 20 867 выпускникнал. Май зурул 30-нний оьрус мазрал ЕГЭ чирчуну дур 17 976 выпускникнал. Шанна ссятрал лажиндарай оьрчIан 25 упражнения бусса даву дуван ккаккан бувну бия. ХIасиллу июнь зурул 15-нния махъ дикIантIиссар. Экзамен дулун 87 пункт хIадур бувну бур Дагъусттаннай, миннувату 10 бур МахIачкъалалив. Дагъусттаннал технический университетраву, ЕГЭ дуллалисса №666 пунктрай аттестациялул бланкру Федерал центрданийн тIайла дуккайсса цIусса кьяйда ишлану дусса дур, экзаменну дуллалиминнаща, онлайн-наблюдательтуращагу аттестациялул кьиматирттал хъирив бацIан хъанай бусса бур. Гьаннайсса, ЕГЭ дулаву низамрайн дуцинсса ххуллу-чаранну ккаклай бур. Экзаменну дулаврил пунктирдайгу шиная шинайн технология магьир дуллай бур, амма цалсса ЕГЭ-рдая рязийминнаяр къарязийми чIявусса бур. Гьашинусса ЕГЭ-лул хIасиллу дайхту, чIалантIиссар экзаменну дулаврил тагьар сантирайн дагьлай дусса-дакъасса. Дуклаки оьрчIал дакIурдиву куртIсса ва цIакьсса кIулшивуртту ласлансса гъира цIакь буллалисса хьуннав хIасиллу.
Цуппа МахIачкъалалив ЕГЭ-рдал хIасиллу жун къааьркинни, паспортрал копия ва вайксса-тайксса арцу дулара тIисса колледжругу бур. Ми бушивугу цинявннангу кIулли. ЯлувбацIаву дан буржлувсса структурардангу хавар бухьунссар миннуя. Амма 11 шинай школалий дуклай бивкIсса оьрчIан хIазран ЕГЭ-рду дуллан багьсса кIанттугу хъанай бур. Ми экзаменну дуллай байбишиннинма миннах ялугьлай бур миннаяту «студентътал» бувсса вузру ва колледжру. Уттива. Танийра арцу дияйнин дирну тIий. Укуннийри учайсса « гава къатIух гава бюрх» куну. Цалсса иш мукунма бур. Дуккаврил учреждениярдавун ххуллу лулттурасрайхчIин ласлайнма бур.
