Июньдалул 16-нний МахIачкъалаллал Дусшиврул къатраву хьунни Республикалийгу, дазул кьатIувгу бяст-ччаллавух гьуртту хъанахъисса Дагъусттаннал спортчитурал къуццу тIутIаврил этикалул хIакъиравусса совещание.

ХIасан Аьдилов
Совещаниялий гьуртту хьунни спортрал школардал директортал, спортрал федерациярттал каялувчитал, тренертал, спортсментал, министерстварттал ва ведомстварттал вакилтал, ихтиярду дуруччай органнал, диннал ва жяматийсса организациярдал вакилтал.
Совещание тIитIлай, ДР-лул миллатирттал политикалул министр Татьяна Гамалейл бувсунни ва батIаву хьуну душиву личIи-личIисса бяст-ччаллавух гьур­тту хьусса Ухссавнил Ккавкказуллал спортсментурал къалмакъаллу дуллалаву сававну. Ганил мукъурттийн бувну, му иширая рязи бакъа бур Аьрасатнал ХIукуматрал каялувчиталгу.
Дагъусттаннайн тIайла був­ккун бивкIун бур вице-премьер Хлопониннул чагъар, га чагъарданий тIалав бувну бур жулва спортсментурал турнирдай, бяст-ччаллий бук­лакисса чIумал этикалуцIун, низам дуруччаврицIун бавхIусса ма­съаларттал ялув бацIаван. «Ми масъаларттаха зун жунма багьлай бур ляличIину, цанчирча махъсса цаппара шиннардий жулва спортсментал бивсса ишру хьуну бур. Миннувату яла хъунмур къалма­къал хьуссар Къалмукьнаву, мунил ахир ттигу хьуну дакъар. Ми ма­съалартту личIи-личIину ххал бигьлан аьркинссар, цанчирча миннул сававрттугу, биян бувсса зараллугу личIи-личIисса буну тIий», — увкунни Татьяна Гамалейл.
Республикалул физкультуралул ва спортрал министр МахIаммад МахIаммадовлул увкусса куццуй, спортсментал тарбия баврил ма­съаларттах къулагъас чан дуллай бур. «Му мукун бушиву хIисав хьунни чIявуми спортсментал спортрая ябуцлай, личIи-личIисса диннал радикалсса ххуллурду язи бугьлан бивкIукун. Мунийн бувну, жунма аьркинссар спортсментал тарбия буллан гай дахьва спортклубирттавун бувкIсса кьинилия шинмай», — увкунни министрнал.