Азирбижаннавусса Дагъусттаннал Культуралул кьинирдал лагрулий хьунни хъинну чIярусса батIавуртту, хьунабакьавуртту. Миннувасса цану хьунни Республикалул БакIчи Рамазан АьбдуллатIипов Азирбижаннаву ялапар хъанахъисса дагъусттанлувтуращал хьунаакьавугу. Му хьунабакьаву хьуссар Аьрасатнал информациялул ва культуралул центрданий.
Цалва ихтилатраву Рамазан АьбдуллатIиповлул кIицI лавгунни Дагъусттаннал ва Азирбижаннал халкь куннаяту кув цукунчIавсса дазурдайну личIи буван, арх буван къашайшиву, ми цимирагу аьсрулий цачIу ялапар хъанай бушиву, куннал чIарав кув бацIлай, миннал бушиву цасса тарих, культура ва аьдатру. Бувсунни Дагъусттан цIулаган баву, мунил экономика гьаз даву мурадрай дуллалисса давурттая.
— Дагъусттаннал ва Азирбижаннал дянив бакъассар щаллу къабувсса цавагу масъала, кIивагу билаятрал дянивсса уртакьшиврийсса зузаву гьарцагу аралуву, сфералуву хьхьичIунсса дуссар, — увкунни Республикалул БакIчинал.
КIицI лавгунни, Дагъусттаннал сипталийну, Москавлий сакин бувшиву Аьрасатнал халкьуннал аслийсса культуралул центр, мукунна зий душиву проект «Мы – многонациональный народ России» цIанилусса, мукунмасса Центр Бакуйгу сакин бавриву цалва кумаг бантIишивугу бувсунни.
Азирбижаннал Республикалул миллатирттал дянивсса масъаларттал, мультикультурализмалул ва диндалул масъаларттал паччахIлугърал маслихIатчи Кямал Аьбдуллаевлул кIицI лавгунни, щалвагу тарихрал лахъишиврий Азирбижаннаву яла агьаммину бивкIшиву мультикультурализмалул принципру, шикку ва лагма-ялттусса, чIахху-чIарахсса аьрщарай ялапар хъанахъисса личIи-личIисса миллатирттал ва диннал инсантурал дянив мудангу хIурмат ва куннан кув бувчIаву диркIшиву. Дагъусттаннал ва Азирбижаннал дянивсса нахIусса, уссушиврийсса арардая буслай, ванал мисалдаран дакIнийн бувтунни Азирбижан армяннал зулмукартурая, агрессортурая ххассал буллай бивкIминнаву, талатаврил майданнай ливтIуминнаву къачансса азирбижан – Дагъусттаннай лявхъусса ливтIушиву. ЧIурчIав дунни чIаххувсса миллатирттал дянивсса нахIу-хIаласса арарду дуруччавриву Гейдар Аьлиевлул бувгьусса хъинну агьамсса кIанттуй, кIицI лавгунни Азирбижаннал цIанасса каялувшиндаралгу мура принцип язи дургьушиву.
Лазгиял «Самур» кказитрал редактор С. Каримовал, лазгиял «Алам» журналданул редакторнал хъиривчу А. ТIагьировлул, «Дербент» ихIсаниятрал обществалул председатель Н. Аьлиевлул ва мукунма цайминналгу бувсунни цалва-цалва структуралул миллатрал маз лахьхьавриву, ябавриву дуллалисса давурттая. Рамазан АьбдуллатIиповлул махъ буллунни лазгиял ва яруссаннал мазурдийсса учебникирттал щаллушинна давриву кабакьу буван.
ХIадур бувссар
Бадрижамал Аьлиевал
