Уттигъанну Избербашрай Аьрасатнал халкьуннал аслийсса культуралул центрдануву хьунни халкьуннал театрдал Республикалул XIV фестиваль «Мас­ка». Му хьунни щаллагу дунияллий мартрал 27-нний кIицI лагай­сса Театрдал кьинилул хьунийн ва жулла республикалий баян бувсса Зунттал шинан хасну.

Фестивальданувух гьуртту хьунни жулла лакрал шаннагу райондалиясса творчествалул коллективругу: Ккуллал райондалия – Хъусращиял халкьуннал театр (режиссер ХIусайнаев АхIмад), Лакрал райондалия – С. ХIабиевлул цIанийсса халкьуннал театр (режиссер Какваева Шамсият), ЦIуссалакрал райондалия – М. Чариновлул цIанийсса халкьуннал театр (режиссер Шамсуттин Къап­ланов). Мукунма республикалул цайми районнаясса ва шагьрурдаясса коллективру, цинявппагу 22 коллектив.
Фестиваль сакин дурну дия ДР-лул Культуралул минис­терст­валучIасса Республикалул Халкьуннал творчествалул къатлул, Избербашуллал шагьрулул администрациялул ва культуралул отделданул.
Фестиваль тIитIлай, Избербашуллал шагьрулул администрациялул бакIчинал хъиривчу Хизри Халимбековлул махъ лавхъунни. Цалва ихтилатраву кIицI лавгунни ва сахIналийн цимилгу бувкшиву республикалул халкьуннал театрдал гьунар бусса коллективру, муниципал къуллугъру ва рес­публикалул каялувшинна хъунна­сса къулагъас дуллай бушиву культуралух ва кIулшиву дулаврих, уку-укунсса мероприятиярттал куннан кув бувчIаву, дусшиву цIакь дувайшиву, культура авадан дуллалишиву, чIахху-чIарахминналссагу, цайминналгу культура хъиннура ххуйну кIул хъанахъишиву укунсса давурттайн бувну.
Гихунмай куннал хъирив кув буклай, сахIналий творчествалул коллективирттал ккаккан дунни миллатирттал аьдатру, багьу-бизу. Ккаккан дунни личIи-личIисса миллатирттал инттухуннай кIицI лагайсса байранну: Цалчинмур хъарас щаврил, Интнилхьхьунил, Масленицалул ва м.ц. Мукунна ккаккан дунни хъатIул культуралун хасну щаллу дувайсса аьдат­ру.
Хъусращиял халкьуннал театр­данул ккаккан дунни нувщи бугьаврил аьдат. Ва театр лайкь хьунни хьхьичIунсса кIанттун. Фестивальданувух гьуртту хьусса коллективирттаву цIа дурминнувух бия ва театрданулмур коллективгу. МухIуттин Чариновлул цIанийсса ЦIуссалакрал театрданул коллективрал ккаккан дунни Хъарас щаврил тяхъасса аьдат. Гьарца коллективран ккаккан дурсса чIун чIирисса душиврийн бувну, вайннан му аьдат ккаккан дуллалисса постановкалува чIявусса балайрду, цайми-цайми кIанттурду букьан багьну бия. Лакрал райондалиясса Саэд ХIабиевлул цIанийсса халкьуннал театрданул ккаккан дунни Интнилхьхьу.
Ва кьини театрдал, цалва-цалва режиссертурал чивчусса пьесарду бакъассагу, ккаккан бунни классикалул произведенияр­ттайн бувсса спектакльлугу. Масалдаран, так ца Р. ХIамзатовлул «Горянкалийн» бувну ккаккан бувна 3 постановка. Мукунма цайми-цаймигу пьесарду.
Фестивальданий театр ххираминнан, мунихлу дакI цIуцIи­миннан яла ххаримур ишну бия мунивух чIявусса оьрчIру гьуртту хъанай бушиву. ЧIавасса актертал гьурттуну бия сайки гьарца театр_данул постановкалувух. Мукунма лакрал районная­сса коллективирттал ккаккан буллалисса пьесардавухгу гьурттуну бия дуклаки оьрчIру.
Фестивальданул давривух гьуртту хьунни Аьрасатнал искусствардал лайкь хьусса иш­ккакку, искусствоведениялул кандидат Гулизар Султановагу.
— Театрдал личIи-личIисса даражарттах (хIадур шаву тIий, оформление тIий) къабурувгун, аьмну вирдакIгу дия, актертурал ххуйсса тIуркIугу бия, режиссурагу дия. Халкьуннал театрду бур личIи-личIисса, кунниха кув лап къалавхьхьусса, мунищала архIал шиная шинайн опытрал авадан хъанай, ялу-ялун усттар, магьир хъанай най бур, ххуйсса драматургия лащинссаннуя личIи дуван бюхълай бур. ХIакьинусса постановкардал цал ххишалагу тасттикь бунни вай кIанттурду. Бивхьунни Р. ХIамзатовлул «Горянка», бивхьунни Хугаевлул пьесагу, мукунма оьруснал ва дагъусттаннал классикагу, цалва чивчуми пьесардугу. Дур актертурал хъинну ххуйсса давурттив, режиссура, — тIий бур Гулизар АхIмадовна.