Вай гьантрай Каспийск шагьрулий хьунни Султанов Закир ХIажимяммаевичлул цIанийсса футболданул турнир. Турнирданий гьуртту хьунни МахIачкъала ва Каспийск шагьрурдаясса чIава жагьилтурал 10 команда.

И. Саидова
Дуклаки оьрчIру бакъассагу, турнирданий гьурттушинна дан бувкIун бия «Сулакь» тIисса футболданул команда, МахIачкъала, Каспийск шагьрурдаясса цаймигу вакилтал. Футболданул турнир сакин дурну дия Каспийск шагьрулул администрациялул Спортрал ва физкультуралул, Культуралул, жагьилтурал политикалул ва туризмалул отделлал.
КIира кьини хьусса футболданул турнирданий бяст-ччаллий буклай бия 120-нния ливчусса чIава жагьилтал. Хъинну рязийну бия оьрчIру, чIярусса командарттугу дартIсса, лавайсса даражалул турнирданий гьуртту хъанай цивппагу буну.
— Укунсса турнирдайри цIу-цIусса командарттащал кIул шайсса, минная ттуплий буккаврил опыт ва техникагу лахьхьай­сса. Гьавас бувххун ттуплий бук­лакинийри ххувшавугу ласай­сса. Жагьилтал спортрахух машгьур баврия миннан тарбия дулавриву хъунмасса хайр бу­ссар. Цикссагу жагьилтуран эбратну ивкIссар ва хIакьинусса турнир хас дурсса, футболданул легенда хьусса Закир Султанов, — увкунни Да­гъусттаннал футболданул союзрал вице-премьер МахIаммадхIажи Раджабовлул.
Турданий цалчинсса кIану бувгьунни Республикалул олимпий резерврал училищалул командалул, кIилчинмур кIану бувгьунни Избербаш шагьрулул командалул, шамилчинмур – Каспийскаллал ДСЮШ-рал командалул.
Турнирданий ххув хьуминнан шагьрулул администрациялул чулуха дуллунни грамотартту ва медаллу. Шикку гьуртту хьусса цинявннан футболданул ттупру буллунни Каспийскалий футболданул секциялийн занай ивкIсса ва футбол ххирасса Арсен Аьбдуллаевлул.
Ва турнир хас дурсса Закир Султанов ур Лакрал райондалийсса ГьаркIассиял шярава­сса. Оьрмулул 4 шинаву Закир цала уссурвавращал лавгун ур Азирбижаннавун. Ванал ппу ХIажимямма Шамхар тIисса шагьрулий чагуртну зий ивкIун ур. Му шагьрулий Закирхъал кулпат яхъанай бивкIун бур 1958 шинайн бияннин. Микку къуртал бувну бур Закирдул школагу. Школалий дуклай унува Закир футболданухун машгьур хьуну ур. Азирбижаннал футболданул чемпионатирттай гьуртту хьуну, ванал цимилгу лавсун бур чемпионнал кубокру. Аьралуннаву къуллугъ буллалисса чIумалгу Закирдул лавсун бивкIссар СССР-данул Аьралуннал спартакиадалул кубок. 1962 шинал вайннал кулпат бивзун бур Дагъусттаннайн, Каспийск шагьрулийн.
Закир Султановлул шихун ивзун махъ республикалул фут­болданул спортрал даража хьхьичIунмай бавриву биял­сса бутIа бивхьуссар. 1968-1988 шиннардий Закир зий ивкIун ур «Труд» стадиондалул директорну. Ва ур СССР-данул футболданул кубокрал финалистгу. «Труд» командалул капитанну Закир усса чIумал, ва командалул цимилгу лавсун бур Ухссавнил Ккав­кказуллал ва Аьрасатнал кубокру. Пенсиялийн увккун махъгу зий ивкIун ур Каспийскаллал ДСЮШ-рай футболданул преподавательну ва тренерну.
Дагъусттаннай спорт хьхьи­чIунмай бан, жагьилминнавун спортрах гъира бутан Закирдул бивхьу­сса захIматран багьа ба­къассар. Уттиния тихуннайгу ванал цикссагу жагьилтуран мюнпат бу­сса давурттив данссия. ХIайп, укун ххаллил­сса лаккучу дунияллия лавгун шин хъанай дур.
Закир кIулминнан, цинявппагу спорт ххираминнан ва мудангу дакIний икIантIиссар.