Мурад Абуевлул юбилейрал концерт

15_rr_7МахIачкъалалив Къумукьнал театрдануву хьунни Дагъус­ттаннал халкьуннал артист, цIа ларгсса скрипач ва гьунар бусса педагог Мурад Абуевлул юбилейрал концерт. Концертравух гьуртту хьунни Дагъусттаннал паччахIлугърал филармониялул Камерный оркестр, Аьрасатнал лайкь хьусса артистка Зарифа Аьбдуллаевал каялувшиннаралусса.

Бадрижамал Аьлиева
Юбилейрал концертрайн хIадур дурну дия ххаллилсса программа. Концертрал цалчинмур бутIа хас бувну бия Аьрасатнал ва дунияллул композитортурал чивчусса произведенияр­ттан. КIилчинмур бутIа щаллуну сакин хьуну бия Дагъусттанналми композитортурал произведениярттая. Шиккува кIицI лаган, Мурад Абуев хъанай ур республикалиясса цалчинсса скрипач цан хасну, цал щаллу буван тIий Дагъусттаннал композитортурал цалва произведенияртту чивчу­сса. Мурад АхIмадовичлул цалагу мудан хъинну хъуннасса къулагъас, ургъил буллай ур да­гъусттаннал музыкалух, мудангу ур му машгьур буллай. Цалва кулпатращал архIал тарихий­сса ватандалий ялапар къахъанай чIярусса шинну хьуну дунугу, Дагъусттаннащалсса дахIаву тачIавгу хьхьара хьун диртун дакъар, гъан-маччанащал, дустуращал хьуннав, цалва даврил уртакьтуращал ва тамашачитуращал хьуннав.
Мурад Абуевлух бурувгун, мунан 70 шин хьушиврийн вих хьунгу захIматри, творчествалул гуж-кьуват хъисвагу хьхьара хьуну бакъар ванаву.
Мурад АхIмадовичлул цик­ссагу шиннардил мутталий тарбия бувсса музыкантътал хIакьину зий бур респуб­ликалул музыкалул цинявгу коллективирттаву. ХIакьинугу Москавуллал областьрай Мурад Абуев тарбия буллай ур чIавасса скрипачтал Скрябиннул цIанийсса Музыкалул колледжраву. Му колледжрава бувксса ванал тарбиячитал дуклан бухлай бур билаятрал музыкалул хьхьичIунсса ВУЗирдавун, зий бур, жулва билаятрай ба­къасса, дазул кьатIувгу.
Ва кьинигу Мурад АхIмадович юбилейращал барча уван концертрайн бувкIун бия ванал чIявусса тарбиячитал. Юбиляр барча уллалисса адресру дия Каспийскаллал музыкалул школалия, Лакрал райондалул бакIчи Юсуп МахIаммадовлул чулуха ва м.ц..
Дагъусттаннал культуралул министр Зарема Буттаевал ванан дуллунни ДР-лул ХIукуматрал чулухасса ХIурматрал грамота.
— Ина хъанай ура Аьрасатнал ва Дагъусттаннал творчествалул интеллигенциялул плеядалувасса ца яла яргма. Вилва бюхттулсса гьунарданийн ва чIярусса шиннардий був­сса захIматрайн бувну, ина ххира хьуну ура жулла республикалул ва мунил кьатIувсса инсантуран. Дагъусттаннал пишакарсса музыкалул искусствалуву ина бивхьусса хъунмасса захIматран багьа бакъассар. Вил творчествалул оьрму хъанай бур хIакьсса артистнал, педагогнал, усттарнал ва патриотнал бивтсса ххуллу. Вил пишакарсса оьрмулул хъунмур бутIа бавхIуну бур Дагъусттаннащал. Ххаллилсса музыкантътурал плеяда тарбия дурсса музыкант хIисаврай, ина хIарачат буллай ияв дагъусттаннал оркестрдансса музыкалул кадрарду цIакь буван. Дагъусттаннал филармониялул солист ва исполнитель хIисаврай – ина ияв дагъусттаннал композитортурал скрипкалун чивчусса чIявуми произведениярттал пропагандист ва ми цалчин щаллу буллалима. Республикалул культуралул оьрмулувусса ца яргсса лажинну хьунни ина сакин дурсса Скрипачтурал ансамбль, цувгу хьхьичIунну хьунадакьайсса республикалий ва мунил кьатIув. Вил гьунарданийн мукIруну бия, вил гьунар тIалавну бия билаят­рал музыкалул хьхьичIунсса коллективирттачIа: Москав шагьрулул Центральный радиолул ва телевидениялул Хъунмасса симфонический оркестрданучIа, Покровскийл цIанийсса Москавуллал камерный музыкалул театрданучIа. Ина цIанагу хьхьичIунну дачин дурну най ура артистналмур даву, сольный концертру ва А. Н. Скрябиннул цIанийсса Москавуллал областьрал базалул музыкалул училищалувусса преподавательналмур даву. Да­гъусттаннайн хаин къашайсса музыкант хIисаврай, ина мудангу ка дирхьуну ура республикалул концертрал оьрмулул пульсрай ва мяш акъа дагъусттанлувтуран пишкаш буллай ура вилва гьунар. Республикалул цIаний бувсса захIматрахлу, ина лайкь хьуну ура «Народный артист Рес­публики Дагестан» тIисса бусравсса цIанин, ларайсса наградарттан ва грамотарттан.
Мурад АхIмадович, юбилейрал кьини ччай бур вихь хъунмасса барчаллагь учин Дагъус­ттаннал искусствалуха жард къакуну буллалисса къуллугърахлу, ларайсса пишакаршиврухлу, захIматрахлу ва инава язи бувгьусса ххуллийн хаин къашаврихлу.
ЧIа тIий бура вин гихунмайгу тIайлабацIу, хъинсса цIуллу-сагъшиву, творчествалул щирикIаву ва цIу-цIусса хьхьичIуннайшивуртту жулва чIявумиллатру бусса Дагъус­ттаннал ва Аьрасатнал культура дуруччаврил, хьхьичIуннай дачин даврил цIаний, — увкунни Зарема Ажуевнал.