Мартрал 25-нний хьунадакьайсса Культуралул зузалал кьини Да­гъусттан Республикалул Культуралул министерствалул кIицI ларгунни цилла 80 шинал юбилейгу. Му шадлугъ хьунни МахIачкъалалив Культуралул дворецраву.

Юбилейрал шадлугъравух гьуртту хьунни ДР-лул ХIукуматрал Председательнал цалчинма хъиривчу Анатолий Карибов, ДР-лул культуралул министр Зарема Бу­ттаева, республикалул депутатътал, культуралул зузалт, ва министерствалул хьхьичIавасса каялувчитал ва ветерантал.
Культуралул министерство Республикалул БакIчи Рамазан АьбдуллатIиповлул чулуха, мукунма ДР-лул Халкьуннал Мажлисрал чулуха юбилейращал барча буллай, махъ лавхъунни Анатолий Карибовлул.
— Так вай махъсса шиннардий Дагъусттаннай тIивтIуну бур кIива музей – «Дагестанский аул» этнографический комплекс ва Дарбантлив Дунияллул культурарттал ва диннал тарихрал музей. Дагъусттанлувтурансса бахшишну хьунни Шеърилугърал театр.
2000-ку шиная шинмай Культуралул министерствалул дуллай бур музыкалул, театрдал, фольклорданул хъинну чIярусса фестиваллу, байранну, выставкарду, художествалул личIи-личIисса акцияртту. Хъуннасса къулагъас дуллай бур Дагъусттаннал халкьуннал аслий­сса культура цIулаган даврих. Рес­публикалул БакIчинал сипталийн бувну, циняв районнай сакин бунни Аьрасатнал халкьуннал аслий­сса культуралул центрду.
Агьамшиву дусса ишну хьунни Дарбантуллан 2 000 шин шаврил шадлугъ даву, Дагъусттаннай даврийну гьашиву къархьуну, Москавлийгу, Парижлийгу дурсса, — увкунни Анатолий Шамсуттиновичлул, махъсса шиннардий республикалул культуралул оьрмулуву дурсса хъунисса давурттив кIицI лаглай.
Хъирив мунал дуллунни ДР-лул ХIурматрал грамотартту ва Барчаллагьрал чагъарду ва министерствалул зузалтран. Цаппараннан дуллунни бусравсса цIарду.
Культуралул ва искусствалул аралуву дурсса хьхьичIун­найшивурттахлу, ДР-лул БакIчинал Указрайн бувну, «За любовь к родной земле» бусравсса цIанин лайкь хьунни ДР-лул культуралул министр Зарема Буттаева.
Хъирив махъ лахълай, культуралул министрнал бувсунни хIакьину ва ведомствалул пахру бувансса кIанттурду мяйжаннугу къачансса бушиву: республикалий цIанасса чIумал бур паччахIлугърал 12 театр, концертрал 13 учреждение, паччахIлугърал 5 музей (37 филиал), республикалул 3 библиотека ва азарунния ливчусса муниципал библиотекартту, культуралул ва искусствалул дянивсса дуккаврил 4 идара, художествалул профильданул 87 ва республикалул 3 школа, Республикалул Халкьуннал творчествалул къатта ва клубрал журалул азарунния ливчусса идарартту, дуккаврил идарарттал Методикалул центр, Тарихрал ва культуралул гьайкаллу дуруччаврил республикалул центр, творчествалул 5 союз.
— Культуралул зузалал кьини жува кIицI лаглай буру жулва ведомствалул 80 шинал юбилей. 1936 шинал мартрал 9-нний ДАССР-данул Халкьуннал комиссартурал Совет­рал ХIукмулийн бувну (№46) сакин бувссар Дагъусттаннал АССР-данул СовнаркомрачIа Искусствалул иширттал управление. Да­гъусттаннал культура хьхьичIуннай давриву ва хъунмасса ишну хьу­ссар. Хасну тай шиннардийри пишакарсса искусствалул журардал, ххишала бакъа авадансса Дагъусттаннал халкьуннал ирс буруччаврил цIакьсса гьану бивзсса. Зунттал билаятрал культуралул бивтсса ххаллилсса ххуллух махъунмай буруг­лай, хъунмасса пахру багьлай бур. ХьхьичIрив – муниярдагу ишир­ттал авадансса шин, зунттал шинал ва Кинорал шинал лишандалулу нанисса. ДакI дарцIуну бура жучIара уттигу цикссагу ххувшавуртту ва хьхьичIуннайшивуртту дикIантIишиврийн, — увкунни Зарема Ажуевнал.
Гихуннай мунил чIярусса шиннардий культура хьхьичIуннай давриву бувсса захIматрахлу ДР-лул чулухасса ХIурматрал грамотар­тту, мукунма Аьрасатнал Федерациялул Культуралул чулухасса Барчаллагьрал чагъарду буллунни ва аралуву зузисса пишакартуран. Миннавух ия Лакрал театрданул хьхьичIунсса артист, балайчи Аьбдул Мурадовгу.
Культуралул министерствалул юбилейрал шадлугърай бия хьхьичIва ва ведомствалул каялувчиталну бивкIмигу: Наида АьбдулхIамидова (1989-2006-ку шинну), Зумруд Сулайманова (2006-2013-ку шинну). Бувсса захIматрахлу миннахьгу барчаллагь увкунни Зарема Буттаевал.
Юбилейрал шадлугърай кка­ккан дунни Искусствалул иширттал управление тIивтIуну 80 шин шаврин хас дурсса фильмгу.
Юбилейрал шадлугъ къуртал хьунни хъуннасса концертрайну. Цалва номерду ккаккан бунни «Лезгинка», «Дагестан», «Молодость Дагестана» ансамбльлал, Дагъусттаннал паччахIлугърал филармониялул Камерный оркестрданул, Халкьуннал инструментирттал ПаччахIлугърал оркестрданул, Мурад Къажлаевлул школалул тарбиячитурал, Дагъусттаннал хьхьичIунсса театрдал ва чIявусса цайминнал.