Апрельданул 23-нний ДР-лул БакIчинал ва ХIукуматрал Администрациялул аппаратрал зузалт Дагъусттаннал вице-премьер Аьбдуссамад ХIамидовлул каялувшиврулу гьуртту хьунни Аьрасатнал дуллалисса субботникрай. Зий бия Лениннул комсомолданул паркираву.

Аь. ХIамидовлул субботникру даврил хIакъираву увкусса куццуй, мукунсса давуртту дуллан аьркин­ссар мудан, му аьдатравун дагьан дурну. Цанчирча, лагмасса тIабиаьт низамрайн дуцаврияр ххишала, субботникрал халкь тарбия баврил мяънагу дуссар. «ХIакьину Дагъус_ттаннал БакIчинал ва ХIукуматрал Администрациялулгу, шагьрулул администрациялулгу зузалт циняв ца хьуну бувккунни субботникрайн, мунил ххуйсса асар биян буллай бур, цинявннахь барчаллагь учин ччай бур», — увкунни Аь. ХIамидовлул.
Субботник къуртал шайхту, министртурал кабинетрал каялувчи МахIачкъалаллал мэрнал хъиривчунащал архIал лавгунни «Маугли» тIисса парк буллалисса кIанайн. Тукунсса журалул паркру буссар чIявуми билаятирттай, жучIава тIурча так Москавлив ва Санкт-Петербурглив бур. Проектировщиктурал бувсмунийн бувну, «Маугли» паркирал хасъсса площадкалий тIуркIурду буллай, бигьалаган хьун тIий бур оьрчIаща ва жагьилтураща.
«Лениннул комсомолданул цIанийсса паркираву дузал буллай бур волейболданул площадкартту, лечлансса ххуллурду, терренкуралул маршрутру ва цаймигу спорт­рансса кIанттурду. Паркираву бантIиссар личIи-личIисса зонарду – сахла бантIиссар ветерантал, хъунив хьуми, оьрчIащалсса нитти­хъул бигьалагансса кIанттурду, цамур зона хас буллай бур тIуркIурдан ва спортран», — увкунни Аьбдуссамад ХIамидовлул.
Вай цинярда давуртту паркираву бартлагантIиссар ва шинал ахирданий. ДР-лул ХIукуматрал Председательнал 1-ма хъиривчу Анатолий Карибовлул мукъурттийн бувну, ва паркирах ляличIисса къулагъас дуллалиссар, цанчирча ши­ккун батIайну тIий майрал байраннал гьантрай чIявуми халкь бигьалаган.
Ганал мукунма бувсунни Майрал 9-нний, Ххувшаврил Кьини, МахIачкъалаллал хъунмур майданнив хьун тIий душиву шадлугърал митинг, яла тIутIив дишин тIий бушиву Абадсса цIарачIа.
ХIадур бувссар
ХI. Аьдиловлул