Машгьурсса шаэр, ххаллилсса хъамитайпа дакIнийн бутлай

Ва дакIнийн бутан бувкIун бия чIявусса инсантал.
Аьпалул мажлис байбивхьуна центральный каналданувух цIанихсса шаэр аьпалул хьусса январьданул 1-сса кьини диркIсса сюжет экрандалий ккаккан даврийну. Щалвагу мажлисрал лахъишиврий экрандалий мукунна ккаккан буллай бия ваниясса кадрарду. Мукунма щалва мутталий шагьрулул школарттал дуклаки оьрчIру ккалай бия ванил назмурду.

МахIачкъалаллал 1-мур гимназиялул дуклаки душ Таиса Темировал бувсунни цуппа Фазу Аьлиеващал кIул хьусса куц.
Шагьрулул Мажлисрал депутат, Каспийскаллал искусствалул школалул директор Марина Теслял бувсунни чIал къавхьуну шагьрулул ЦБС-ран (Централизованная библиотечная система) Фазу Аьли­евал цIа дулаврил масъала ххал бигьинтIишиву Мажлисрал сессиялий. Ва пикрилущал ванияр цаппарасса шиннардил хьхьичI був­ккун бур ЦБС-рал директор Таиса МахIаммадова, муния цихьва Фазухьгу бувсун бивкIун бур.
ХIакьсса зунттал хъамитайпа, гьунар бусса шаэр дакIнийн бутан бувкIминнавух ия генерал Оьмар Муртузалиев ва ванал кулпатгу. Ванал бувсунни Фазу Аьлиевал ва цалла дянивсса дусшиврия, мунищал Авгъаннаву хьусса хьунабакьаврия, микку генерал къуллугъ буллай ивкIун ур, Фазу Аьлиева тIурча бувкIун бур дяъвилий талатисса совет солдатнахь назмурду дуккин. Ванал кулпат Сакинат тIурча чIавания шинмайва дусну бивкIун бур Фазущал. Укунсса инсантал, Фазу Аьлиеващал цикссагу шиннардий цачIу зий, чIаххуврай ялапар хъанай бивкIсса, цикссагу бувкIун бия ва вечерданийн. Фазул чIарав сайки 40 шинал дянив бивкIсса ДР-лул Хъаннил союзрал председательнал хъиривчу Зулмира АьбдуллатIиповал цилва ихтилатраву кIицI лавгунни Фазул кIану бугьансса инсан цама къалякъинтIишиву, ва бивкIшиву Дагъусттаннал хъаннил чул бищай ттарцIну, ттиликIну. Мукунма шаэр, ххаллилсса хъамитайпа дакIнийн бутлатисса ихтилатру бунни «Дагестанская правда» кказитрал хъунама редактор Бурлият Токболатовал, журналист Эмма Тыщенкол, ХIури Пирсаидовал, Аьра­сатнал Журналистурал союзрал член, Фазу Аьлиевал таржумачи Мариза МахIаммадовал, «Российский Фонд мира» ДРО-лул председатель Мухтар Даудовлул ва цайминнал. Ихтилатру буллалими барчаллагь тIий бия Таиса Билаловнахь укун ххуйсса батIаву даврихлу.
Гихунмайсса мажлис лахъи лавгунни дукрардал бувцIусса ссупралух, ва мукунма Фазу ХIамзатовна дакIнийн бутлай, мунил шеърирду ккалай ва мунил увкусса махъру кIицI лаглай, гьарцаннал цалва оьрмулувасса мунищал бавхIусса ишру, муттарду дакIнийн бичлай.