Дуклаки оьрчIал дянив луттирду буккаву машгьур даву, ниттил мазрайсса произведенияр­тту ххира хьун баву, библиотекардавун занансса гъира бутаву мурадрай ва гьунар бусса оьрчIру ялун личин бувну, миннан кабакьу баву мурад­рай, Лакрал райондалул КIулшиву дулаврил управлениялул гьарца шинал 5-10-ми классирттал дуклаки оьрчIал дянив байссар луттирду буккултрал конкурс «Живая кла­ссика». Конкурс шайссар щалвагу Аьрасатнаву.
Зулайхат Тахакьаева
Райондалул конкурсрай гьуртту хьунни школалул вивсса конкурсрай ххув хьусса 15 школалул дуклаки оьрчIру. Гьурттушинна къадунни Ккурккуллал ва Хъурхърал школар­ттал дуклаки оьрчIал.
ОьрчIан кьиматру бишлай бия хIакьинусса кьини агьамшиву хъуннасса произведениялул текст язи бугьаврих, пасихIну буккаврих, текстрал мяъна-мурад аьч бан бю­хъаврих бурувгун. Конкурсрал жюрилул кIицI лавгунни гьуртту хъанахъими багьайсса куццуй хIадур хьуну бушиву.
ЧIявуми гьурттучитурал ишла дурну дия ИКТ, сахIналий лаххай­сса костюмру, цавайннал тIурча произведенияртту щаллу бувна музыкалухун.
Конкурсрай 1-мур кIану бувгьунни Уриннал школалул 8-мур классрал дуклаки душ Гъапурова Алесял; 2-мур кIану бувгьунни Ххюлуссуннал школалул 6-мур классрал дуклаки оьрчI Чутуев Жамалуттиннул, Кьубиял школалул 5-мур классрал дуклаки душ Дибирова ПатIимал, ГьунчIукьатIрал школалул 6-мур классрал дуклаки душ Юсупова Сакинатлул; 3-мур кIантту бувгьунни КIундиннал школалул 7-мур классрал дуклаки оьрчI ХIажиев МахIаммадлул, Щардал школалул 7-мур классрал дуклаки душ РахIимова Анисатлул ва Гъумучиял школалул 6-мур классрал дуклаки душ Аьлишаева ПатIиматлул.
Конкурсрай ххув хьуминнан ва хьхьичIунсса кIантту бувгьуминнангу, ми хIадур бувсса учительтурангу КIулшиву дулаврил управлениялул чулуха буллунни дипломру ва ХIурматрал грамотартту.
Конкурсрал сакиншинначи, КIулшиву дулаврил управлениялул методист ТIагьирова Эльмирал кIицI лавгунни шиная шинайн лавай хъанай бушиву гьуртту хъана­хъиминнал хIадуршиннарал даража. Дуклаки оьрчIал цайнува цала лявкъуну бур классиктал ва миннал произведенияртту. Ххув хьусса дуклаки оьрчIру гьуртту хьун тIий бур республикалул конкурсрайгу.