Вай гьантрай МахIачкъалаллал бакIчи Муса Мусаев ивунни Мурад Къажлаевлул цIанийсса Республикалул магьирлугърал школалийн. БакIчинащал архIал школалийн мукунма бувкIунни шагьрулул администрациялул цаймигу вакилтал.

З. АьбдурахIманова
Шикку вайннал ххал бувунни цуппа школа ва кIул хьунни шиву дуклакисса чIава гьунарчитуращал. Магьирлугърал школалул дуклаки оьрчIал вайннан рурцунни классикалул цаппара макьанну ва балайрду.
Ва школалул гьану бивзсса Мурад Къажлаевлущалсса ихтилат­раву Муса Мусаевлул кIицI лавгунни, цува махIаттал увшиву укун чIавасса оьрмурдавусса гьунарчитурал, вайннал магьирлугърахсса гъирарал ва цив хIадурну бушиву укунсса журалул школалул чIарах бацIан, цащава бан шайсса кумаг буван.
Мурад Къажлаевлул чIурчIав дурунни, школалул агьаммур мурад бушиву гьунар бусса оьрчIаву лахъсса даражалул классикалул музыкалух гъира бутан, муниха зунсса шартIру хIасул дуван.
Къажлаевлул школа хIакьинусса кьини бур ца яла аьркинми шар­тIирдал дузалсса, концертрал, балетрал заллу ва ххуйсса даражалул акустика дусса школа. Шикку бур оьрчIан дуккавриву ишла бан аьркинсса гьарцагу музыкалул инструмент. Школалий дихьлай бур фортепианолул, хорданул балайрал, дачIурду рищаврил, гитаралул, флейталул, скрипкалул, вокалданул, изобразительный ва декоративно-прикладной искусствалул, хореографиялул дарсру. Вай дакъасса, мукунна оьрчIахь дихьлай бур ритмикалул, оркестрданул, ингилис мазрал дарсру. Цалчинмур классравусса оьрчIахь дишайсса дур «Слушание музыки» тIисса дарс. Шамулчинмур классраву музыкалул тарих лахьлай байбишайсса бур, 6-мур классраву тIурча – дагъус­ттаннал музыкалул тарих. Мукунма школалучIа бур 4-5 шинавусса оьрчIру кьамул бувайсса «Раннее эстетическое развитие» тIисса курс нанисса мюрщултрал группагу.
Къажлаевлул школа бур магьирлугърал щавшсса кюру кунмасса кIану. Шиву дур ляличIисса тагьар, гьунар бусса оьрчIал ца цанналусса дуниял кунмасса кIану.
Муса Мусаевлущалсса ихтилатраву школалул директор Мурад Къажлаевлул бувсунни цал оьрмулухунсса хиял бивкIшиву МахIачкъалалив укунсса школа тIитIин.
«Ца ппурттуву Американавун лавгсса чIумал ттун бакIрайн агьуна тийх ттула ччянивасса дус. Жагьилний жу ганащал, жунмасса ччатIул маэшат бан, кIиягу цачIу, ца ресторандалуву рояль бишлай бикIайссияв. Хъинну ххагу-ххарину махIаттал увнав на ганал Американаву оьрчIансса музыкалул школа тIивтIуну ура кувкун. Га ххал бувну, гивусса тагьарданущал кIул хьувкун, хъинну ччан бивкIуна жула Да­гъусттаннайгу укунсса журалул кIану тIитIин», — бувсунни композиторнал. Мукунма ванал бувсунни шагьрулул бакIчинахь цанма, цала школалун спонсортурал буллали­сса кумаграягу.
Магьирлугърал школа МахIач­къалалив тIивтIуссар 2008 шинал. Шиву зий уссар хъинну цалва пишарду кIулсса 53 педагог. Школалийн занай бусса бур сайки кIиттуршунниха ливчусса дуклаки оьрчIру.
Муса Мусаевлул, уттигъанну там хьусса 85 шинащал барчагу увну Мурад Къажлаев, школалун аьркинний ишла дан кумаг хIисаврай тапшур дурунни 500 азарда къуруш арцул.