Щалагу Аьрасатнал «Дороги Победы» патриот акциялул лагрулуву, МахIачкъалалив хьунни патриот балайлул фестиваль «Дети Победы» ва флешмоб «Возьмемся за руки, друзья!».
Бадрижамал Аьлиева
Фестиваль сакин дурну дия Аьрасатнал ва Дагъусттаннал Культуралул министерстварттал, Республикалул Халкьуннал творчествалул къатлул.
«Дети Победы» фестивальданувух гьуртту хьунни МахIачкъала, Дагестанские Огни, Каспийск, Къизилюрт, Къизлар, Избербаш, Хасавюрт шагьрурдаясса, Бабаюртуллал райондалиясса творчествалул коллективру ва таксса балайчитал. Фестивальданувух мукунма гьуртту хьун бувкIун бия республикалул дазул кьатIатусса хъамалгу – Чачаннал ва Ингушетиянал республикарттаясса ва Ставрополлал крайраясса.
Фестиваль даврил агьамми мурадру бур коллективирттал усттаршиврул даража лавай баву, махъа нанисса никираву ватандалухсса ччаву тарбия даву, миннаву жулва билаятрал культуралул ва тарихрал ирсирахсса гъира-гьавас чантI учин баву.
Фестиваль тIиртIунни ДР-лул культуралул министрнал хъиривчу, Республикалул Халкьуннал творчествалул къатлул директор Марита МухIадовал ва МахIачкъалаллал администрациялул Культуралул управлениялул начальник Фарид Абалаевлул.
Гихуннай дайдирхьунни концертрал авадансса яргсса программа. КъавтIаврил ва балайрдал хъин-хъинсса номердащал сахIналийн бувккунни республикалул коллективру ва цайми регионная бувкIсса хъамал.
Концерт къуртал хьунни цинявннал аьмсса къавтIаврийну — флешмобрайну.
Шиккува кIицI лаган, «Дороги Победы» акциялул лагрулуву жулла республикалий най бур «Наследники Победы» форумгу, мунивунгу духлай дур личIи-личIисса мероприятияртту.
