Дуснакьирттай зулму-къия дурсса ишру къахьун ялув бацIайсса Европанал комитетрал (ЕКПП-Европейский комитет по предупреждению пыток и бесчеловечного или унижающего достоинство обращения или наказания) делегация бивунни уттигъанну Дагъусттаннал УФСИН-лул 1-мур СИЗО-лувун. Вольфганг Хайнц бакIчисса ва делегациялуву бия Давора Стринович, Элвина Аьлиева, Майте де Рю ва таржумачитал.
Вай хьунабавкьунни Дагъусттаннал УФСИН-лул хъунама, виваллил службалул генерал-майор Муслим Даххаевлущал, Управлениялул хъунаманал кумагчи, подполковник Рашид Зайнулаьбидовлущал ва дуснакьирттай законну дуруччаврил ялув ацIайсса республикалул прокурорнал хъунама кумагчи Агаси Къараевлущал.
Управлениялул хъунаманащал хьунабавкьуну махъ делегация бвунни 1-мур СИЗО-лувун. 1-мур СИЗО-лул хъунама, виваллил службалул подполковник Рауф ХIабибовлул бувцунни хъамал циняв корпусирттавух. Ванал бувсунни цалва идаралул зузалтрал агьаммур бурж, дуснакьравуминнал ихтиярду дуруччаву бакъассагу, цалва зузалтралгу, букIлакIисса делегацияртталгу, дуснакьирттаву щябивкIминналгу мюхчаншиву дузал давривугу бушиву.
1-мур СИЗО-луву делегациялул вакилтал бивунни режимрал отделениярттайн, камерардавун, ххал дунни хIаят, пищеблок, хозяйствалул давуртту дуллан бивтсса дуснакь бувминнал общежитие, хIаммам байсса ва янна-ка шюшайсса кIанттурду, силистта байсса кабинетру ва кутIасса свиданиярттансса къатри.
Тахсир ккаклакисса ва танмихI кьувкьусса инсантуращал цаща-цащалва ихтилат буллай, комитетрал вакилтурал цIухху-бусу бунни изоляторданувусса шартIирдая, медициналул кумаграя, гуж-къия дурсса иширттая. ЦIувххунни спецконтингентрал чулухасса аьрзирдах идаралул хъуниминнал цукунсса къулагъас дуссарив.
