Февраль зурул 15-нний кIюр­ххил, ссят 9.00 хьусса чIумал, Дарбантуллал райондалий Джемикент поселок­рал чIаравсса ГИБДД-лул пострачIа пIякь увкунни куклу машина «Лада-2109».
ФСБ-лул пишакартурал ххал­бигьавур­ттал чIалачIи бунни машиналул вив каних дурсса 30 кг. тротилданул гуж бусса пIякь учайсса зат дирхьуну диркIшиву. Ва ишираву оьрмулуцIа хьунни полициялул 2 зузала, щавурду дирунни 7 зузалайн. Мукунна личIи-личIисса цIунцIияртту хьунни 6 инсаннан. Оьзру хьусса 8 инсан иян унни Дагестанские Огни шагьрулул азарханалийн, 3 – Мамедкъала поселокрал, 3 – Дарбантуллал азарханардайн. Ца хъамитайпа азарханалий къуртал хьунни. ЦIуллу-сагъшиву дуруччаврил министерствалул бусласимунийн бувну, Джемикентливсса пострай мудан бавцIуну бикIайсса бур Катастрофардал медициналул къуллугърал машина, мунияту бювхъуну бур оьзру хьусса инсантал ччяни азарханардайн биян бувну, ххассал бан. Дагестанские Огни шагьрулул азарханалий оьзру хьуминнаха къайгъурдай бур хирург, нейрохирург, реаниматолог, кардиолог ва цаймигу пишакартал. Ми­ккун МахIачкъалалия тIайла бувккун бур оьттущалсса ва оьттул заменительлащал­сса машина.
Дарбантуллал райондалий хьусса терактрал хIакъираву силистталул органнал су­кку дунни уголовное дело. ЦIана ва иширал хIакъираву хъиривлаявуртту дуллай бур.
ПIякь учаву хьусса кIанайн ивунни Дагъусттаннал БакIчи Рамазан Аьбду­л­латIипов.
Шиккусса тагьарданущал кIул хьуну махъ Рамазан АьбдуллатIипов ва мунащал архIал бувкIсса къуллугъчитал Дагъусттаннал виваллил иширттал министр Аьвдурашид МахIаммадов, Силистталул комитет­рал Силистталул управлениялул каялувчи Эдуард Кабурнеев, цIуллу-сагъшиву дуруччаврил министр Танка Ибрагьимов, Дарбант шагьрулул мэр Малик Багълиев, Дарбантуллал райондалул администрациялул бакIчи МахIаммад Жалилов бивунни Дагестанские Огни шагьрулул азарханалийн. Вайннал бувсунни оьзру хьусса инсантуран аьркинсса кумаг бантIишиву.
Журналистуращалсса ихтилатраву Дагъусттаннал БакIчинал кIицI лавгунни ва пIякь учаву данну тIий ихтиярду дуру­ччай органнал зузалтрайн къаршину дур­сса тахсиркаршиву душиву, бувсунни оьзру хьусса инсантурал чIарав бацIантIишиву.
Азарханардай щавурду дирминнан циняв шартIру дузал дурну дур, чIявуми ДР-лул виваллил иширттал министрнал МахIачкъалаливсса МВД-лул медсанчастьрайн буцин тапшур бунни.
— Ва тахсиркаршиву аьч дан­тIиссар. Дагъусттаннай тахсиркартуращал талай буссар, уттиния тихунмайгу ссаячIав нигь дакъа талантIиссар, — увкунни Р. АьбдуллатIиповлул.
Республикалул БакIчинал жижара бунни ливтIуминнал гъан-маччанахь.
Февраль зурул 15-нний Дарбантуллал райондалий хьусса пIякь учаврил хIакъираву Да­гъусттаннал премьер-министр Аьвдуссамад ХIамидовлул ДР-лул ХIукуматрал вакилтуращалсса совещание дунни.
Совещаниялий гьуртту хъанахъиминнал минутIрайсса пахъ багьаву дунни ва пIякь учавриву оьрмулуцIа хьусса полициялул зузалтрал аьпалун.
— Махъсса 3 шинал лажиндарай ихтиярду дуруччай органнал ва исполнительный властьрал органнал цачIусса хIарачатрайну республикалий террорданул иширттая­сса нигьачIаву чан хьуссия. Амма ци чаран ляхъларчагу, му журалул тахсиркаршивуртту духлаглай да­къар, хьхьичIва-хьхьичI – Сириянавусса иширтталшиврий.
Сириянаву талай бивкIми республикалийн зана хьуну, шийхгу пIякь учавуртту дуллай, инсантал литIлай бур. Жува цинявппа цачIун хьуну, терроризмалул иширттая жулва агьали буруччин аьркин­ссар, — увкунни Аьвдуссамад ХIамидовлул.
Совещаниялий премьер-министрнал тапшур бунни ва пIякь учавриву оьр­мулуцIа хьуминнал ва апатIру хьуминнал кулпатирттан арцуйнусса кумаг бан.
А. Аьбдуллаева