2014 шинал август зуруй, машина бачин бан лахьхьин буллали­сса автошколарттал программардачIан ва техникалучIан кьянкьасса тIалавшиннарду дурккун махъ, чIявусса школартту лакьин бюхъайссар тIисса аваза багьну бия инсантуравун.
Мяйжаннугу, автошколардаясса тIалавшиннарду ххишала хьунни. МинначIа бикIан аьркинну бур 2,4 азарда кв. метралияр чIиви бакъасса, светофорданущалсса, «зебралущалсса» ва ххуллул шанбачIу бусса майдан. Классирттаву дикIан аьркинну дур интерактивный доскарду, мукунна автошколардай дихьлан тIий бур, уттинин къадиркIсса, машина бачин баврил психологиялул дарс.

А. Аьбдуллаева
СМИ-рдал буслай бия Да­гъусттаннайсса, Ингушетиянаву­сса, Къарачай-Чаргаснавусса, Ух­ссавнил АьсатIиннавусса, Къиримнавусса ва Чукоткалийсса автошколарттан, тIалавшиннардаха лав­хьхьуну бакъа тIий, ГИБДД-лул заключение къадуллуну дур, мунийн бувну, вай регионнал агьалинаща шупIирнал ихтиярду ласун дуклан хьун тIий бакъар тIий.
— ХIакьинусса кьини циняв­ппагу регионнай буссар автошколартту. ЦIусса шин дайдирхьуния шихунмай цавагу регион къаливчIссар машина бачин ла­хьхьин ччинаща ду­ккин къабюхълахъисса. Му бакъассагу, 1-мур январьдания байбивхьуну, автошколартту зузиссар хьхьичIва бивкIсса, гьарнан кIулсса документирттайн бувну, — тIий бувсунни ва масъалалул хIакъираву Аьрасатнал МВД-лул ГИБДД-лул Агьаммур управлениялул вакил Сергей Фомочкиннул. Ванал бусласимунийн бувну, уттинин диркIсса тIалавшиннардайри Госавтоинспекциялул ххал буллан аьркинсса автошколарттал учебно-материальная база ва миннуйн бувнур дулун аьркинсса заключение. Ми документру тIайлассар, цIакьссар автошколалул цачIарасса аьрщи, техника ва къатри арендалий лавсъсса икьралданул чIун ду­кканнин. Ми арендалий къаларсъсса, цува заллусса духьурча, заключениярдан ккаккан дурсса чIун къадикIайссар. Арендалий лавсъсса икьралданул чIун дурккун духьурчарив, ми автошколарттаща хIакьину зун къахьунтIиссар. Миннан аьркинссар икьралданул чIун лахъи дан, яла Госавтоинспекциялийн бучIан, — бувчIин буллай ур ва масъалалул хIакъираву ГИБДД-лул зузала.
Ванал мукунма бувсунни автошколартту башттанма лавкьуссар тIисса ряхрагу Аьрасатнал региондалий автошколартту зий бушиву. Масала, Ингушетиянаву хIакьину зий бур 11 автошкола, Дагъусттаннай – 13, Къиримнаву – 13, Ухссавнил АьсатIиннаву – 24. Къарачай-Чаргаснаву – 26, Чукоткалий – 4.
— ЧIяруми регионнай ххишала­сса автошколартту зий бивкIссар. Миннувасса цаппара цIана ба­къассар, ялув кIицI лавгсса куццуй, документру щаллу баннин, икьраллал чIун лахъи даннин, — увкунни Сергей Фомочкиннул. Мукунма ванал бувсунни, автошколар­ттан лицензияртту дулаву Госавтоинспекциялийн къабагьайшиву, му КIулшивуртту дулаврил министерствалул ва Рособрнадзорданул биялдарайсса зат бушиву, ГИБДД так нормативный акт­ру щаллу даврил ялув бацIайшиву. Ванал маслихIат бунни цинявппагу автошколарттай дуклан ччиминнан «Автошколы» тIисса онлайн-справочник ххал бан.
– Му ххал бан хьунтIиссар ГИБДД-лул официал сайтрайгу. Микку бувсун буссар цинявппагу хIакьинусса кьини зузисса автошколарттая, — увкунни ванал.