Апрельданий Дагъусттаннал студентътурал дянив хьунтIиссар «Жагьилсса профессионалтал» тIисса зузалтрал пишардал чемпионат (Чемпионат рабочих профессий). Чемпионат дуллай бур федерал проектрал стандартрал даражалий.
ХIасан Аьдилов
Муния бувсунни пресс-конференциялий «Успех» тIисса Республикалул жагьилтал давурттал щаллу байсса центрданул директор Заур Оьмаровлул.
«Ттинин тачIав къавхьусса бяст-ччал баврил мурад хъанахъиссар студентътурал ва жагьилсса зузалтрал (рабочие) дянив бяст-ччал баврийну зузалтрал пишарду машгьур баву, миннул сий лахъ даву. Республикалул ХIукуматрал кабавкьунни жул сипталуцIун ва га дузрай дуккан даншиврул итадаркьунни 8 млн. къуруширттал. Сакин барду зузи группа, мивун бувххун бур жул министерствалул цаппара вакилтал. Чемпионат дан най буру апрельданул ахирданул гьантрай Каспийск шагьрулий, Аьли Аьлиевлул цIанийсса Спортрал къатраву», — увкунни Оьмаровлул.
«Успех» РМЦЗ-лул директорнал мукъурттийн бувну, чемпионатрай жагьилсса пишакартурал дянив бяст-ччал хьунтIиссар укунсса пишардан хасну: куклу машинартту бакьин баву, сваркардал технологияртту ишла даву, шяраваллил хозяйствалул машинартту зузи баву, графикалул дизайн даву, веб-дизайн, янналул дизайн, кондитернал даву, садикравусса оьрчIру тарбия баву.
Республикалул предприятиярттай зузисса жагьилсса пишакартурал дянив бяст-ччал хьунтIиссар: калпуш бишаврил, плиткартту дакьаврил, къатта бущаврил, электромонтажрал давуртту давриву.
Ганал мукунма бувсунни ванияр хьхьичIгу Дагъусттаннал вузирдал студентътал гьуртту хьуну бивкIшиву Ухссавнил АьсатIиннаву пишакартурал дянив хьусса чемпионатрай ва шамуннал цалчинми кIанттурду бувгьуну бивкIшиву.
Оьмаровлул бувсъсса куццуй, 2015 шинал центрданул давурттал щаллу бан кумаг бувну бур 1197 инсаннан. Махъппурттуву гьарца нюжмардий давурттал щаллу буллай бур 10-15 инсан.
Битлай бур каялувчитурал къуллугъирттайгу, масалдаран, ивтун ур «Кавказ-проект» предприятиялул хъуна-хъунама инженерну, «Агромир» тепличный комплексрал хъуна-хъунама энергетикну, «Жар» ООО-рал хъуна-хъунама бухгалтерну, «Дагэнерголул» колледжрал завучну, «Тефи» предприятиялул логистикалул отделданул управляющийну. Ми жагьилтал давурттай битан хьхьичI миннащал бувссар ихтилатру конкурсрал даражалий.
«Успех» РМЦЗ зий шин ва дачIи хьунни, му мутталий миккун давурттал хъирив бувкIун бур 3 азаллий 500-яр ххишаласса инсантал, миннавату 1578 инсан давурттал щаллу увну ур.
ЦIанасса ппурттуву яла аьркинми бур (тIалавшиннугу дур) машачитурал (продавцы-консультанты), официантътурал, дахху-ласулул вакилтурал, шофертурал, кассиртурал, учительтурал пишарду.
