КIулсса куццуй, уттигъанну Парижлив ЮНЕСКО-лул штаб-квартиралуву хьуссар Дагъусттаннал ва Дарбантуллал Кьинирду. Миннул хIасиллу дуллалисса пресс-конференция хьунни вай ЦIусса шинал хьхьичIсса гьантрай ДР-лул Культуралул министерствалий.
Бадрижамал Аьлиева
БавтIминнахь чабувкру тIисса махъ лахълай, культуралул министр Зарема Буттаевал барчаллагь увкунни ва иширавух гьуртту хьусса творчествалул коллективирттахь, артистурахь.
— Ва шадлугъ хьунни аьрщарайсса ца яла хьхьичIавамур шагьрулун ккаллисса, чIяву миллатиртал ва чIяру диннал инсантал ялапар хъанахъисса Дарбантуллал юбилейрал ххаллилсса ахирну. Жулла республикалун ва хьунни жулла аслийсса культура, искусство, жулва тарих ккаккан бувансса хIалуну. Му давугу жущара дуван бювхъунни. Барчаллагь Дагъусттаннал ва Дарбантуллал Кьинирду Парижлий давривух хьхьичIунсса гьурттушинна дурсса цинявннанмагу, — увкунни Зарема Ажуевнал.
Гихунмай министрнал кIицI лавгунни хIакьину дунияллийсса бигьа дакъасса тагьардануву культура хъанай душиву цашиву дуруччавриву, культуралул ва дусшиврул арарду цIакь давриву агьамсса кIану бугьлагьисса ца шартIну, ца факторну. Бувсунни хъиривмур шинал укунна Дагъусттаннал ва Дарбантуллал Кьинирду Великобританиянавугу дувансса заявка дуркIшиву. ЧIурчIав дунни Парижлив хьусса шадлугъравух хьхьичIунну гьуртту хьун бювхъушиву цинявннал цасса, бавкьусса даврийн, Дагъусттаннал культуралул делегациялул цIакьсса уртакьшиврийн бувну.
— Жува мяйжаннугу ца командану бувкру сахIналийн. Республикалул районнаясса, шагьрурдаясса коллективру, артистал хъинну ххуйну лавунни дагъусттаннал цIа дурксса шаэртурал роллащал. КIицI лаган ччива Дагъусттаннал паччахIлугърал опералул ва балетрал театрданул, «Дагестан» балайлул ва къавтIаврил ансамбльданул, Дагъусттаннал къавтIаврил лайкь хьусса «Лезгинка» ансамбльданул артистал. Щаллу бувссар дагъусттаннал композитортал Готфрид ХIасановлул, Сергей Агъабабовлул, Мурад Къажлаевлул произведенияртту. Вана укун яргсса рангру хьунни жулла, цасса мозаикалувун экьиларгсса, — увкунни Зарема Буттаевал.
З. Буттаевал гихунмай бувсунни тамашачитуран хъинну ххуй дирзшиву «Искусство народов Дагестана» цIанилусса выставкагу. Му сакин хьуну диркIун дур цимирагу разделдания, личIи-личIисса темардайн дагьайсса.
Вай Кьинирдавух гьуртту хьун бувкIун бур Франциянаву ялапар хъанахъисса хъинну чIявусса дагъусттанлувтал.
Парижливсса Дагъусттаннал ва Дарбантуллал Кьинирдавух гьуртту хьуми лайкь хьунтIиссар Барчаллагьрал чагъардан.
