Январьданул 4-13-нний ОАЭ-наву Дубай шагьрулий хьуссар Ккавкказуллал къавтIавурттал дунияллул халкьуннал дянивсса цалчинсса фестиваль. Мунивух гьуртту хьуну, рязийну зана хьунни республикалийн паччахIлугърал балайлул ва къавтIаврил ансамбль «Дагъусттангу».

Му фестиваль даврил агьамми мурадругу бур Ккавкказуллал къавтIаврил культура дазул кьатIув машгьур даву, хьхьи­чIуннай даву, халкьуннал аслийсса культуралухсса жагьилтурал къулагъас ларай даву, личIи-личIисса билаятирттал дянивсса творчествалул дахIавуртту цIакь даву.
Ва аьрххилул хIакъираву жул хъун бакъасса ихтилат хьунни «Дагъусттан» ансамбльданул каялувчи Дабай Дабаевлущал. Ванал бусаврийн бувну, ва аьрххи хьуну бур Аьрасатнал Генерал консульствалул бургаврилу. Фестивальданул гьурттучитурал шагьрулул кIичIирттаву ккаккан дурну дур концертру, дурну дур карнаваллу. Фестиваль наниссаксса хIаллай шагьрулул машлул хъуни центрдай цалва номерду кка­ккан буллай бивкIун бур дунияллул личIи-личIисса билаятирттаясса артистал ва коллективру.
Дагъусттаннаямур коллективрал ккаккан дурну дур 6 концерт, миннувасса 2 тIайланнасса эфирданий щалва ОАЭ-ттал билаятрай ккаккан дурну дур. Диялсса ва хъинну ххуйсса программа диркIун дур жулва коллективрал. Тамашачитурал му хъинну ххуйну кьамул бувну бур. ЦIанагу букIлай бур ва коллективрайнсса Барчаллагьрал чагъарду. Концертирттая махъ ва билаятрай ялапар хъанахъисса чIявусса дагъусттанлувтал гъан хъанай бивкIун бур цалла тарихийсса ватандалиясса артистурачIан.
Дубай шагьрулийсса къав­тIаврил студиярттай жулва жагьилтурал бувну бур мастер-классру, миннувух гьуртту хьун ччиманаща бюхълай бивкIун бур.
Фестивальданул сакиншинначи «Alpha Events» компаниялул хъунмасса хIарачат бувну бур ва иширайн хIадур хъанай, цачIава хъамалу хьусса гьарцагу къавтIалан, балайчинан цалва билаятрай дуртсса гьарцагу кьини дакIний личIансса хьуншиврул. Жулва артисталгу лагай­сса бивкIун бур экскурсиярдай, шагьрулущал кIул хъанай, ва билаятрал культуралущал, багьу-бизулущал кIул хъанай.
«Дагъусттан» ансамбльданул коллектив лайкь хьуну бур дип­ломран ва фестивальданул сакиншинначитурал чулухасса бахшиширттан.
Фестивальданувух мукунма гьуртту хьуну бур Къарачай-Чаргаснал паччахIлугърал къав­тIаврил ансамбль «Эльбрус» ва Москавуллал къавтIаврил ансамбль «Ансар».
— Вайгу, чIявусса цаймигу коллективру бия дунияллул билаятирттаясса. Гьарцагу коллективрал дия цилла ххуйшиву, цилва кици. Амма, пахру къабуллай учин, яла ххуймур коллективран жулвамур коллектив ккалли бунни. Ва фестиваль цалчин дуллай бунугу, Эмиратынавун­сса жул цалчинсса аьрххи ба­къая. Ваниннингу цимилвагу лавгссару жу тихун цайми фестиваллавух, конкурсирттавух гьуртту хьун. Уттигу жуйн оьвкунни тихунма, Шардж шагьрулийн, халкьуннал канил касмурдал фестивальданувух гьуртту хьун. Апрель зуруй гьантIиссару. Мукунма оьвтIий бур США-вун, Вашингтоннай, Нью-Йоркрай 26-мур мартрая 3-мур апрельданийн дияннин хьунтIисса фестивальданувух гьуртту хьун. Му аьрххилийн хIадур хъанай, цIанасса чIумал визардансса документирттаха зий буру. Мукунма хIадур хъанай буру чIал къархьуну дувантIисса жулла ансамбльданул 80 шинал юбилейрайн.
Ва аьрххилия тIий, барчаллагь учин ччива ДР-лул Культуралул министерствалухь чIарав­бацIаврихлу, — тIий ур Дабай МахIаммадович.
ЧIа учинну «Дагъусттан» ансамбльданун гихунмайсса аьр­ххирдавугу тIайлабацIу.