Лакрал театрданул ирглийсса ххувшаву

50_5Ларгсса нюжмардий Апанни Къапиевлул цIанийсса Лакрал музыкалул ва драмалул театр гьуртту хьунни Ухссавнил АьсатIиннал хъуншагьрулий хьусса «Сцена без границ» тIисса VIII-мур дунияллул халкьуннал миллатирттал театрдал фестивальданий.

Ва фестивальданий Лакрал театр шамилчинни гьуртту хъанахъисса. ДакIнийн бутанна, цалчин гьуртту хьуссар 2002 шинал Дагъусттаннал Халкьуннал шаэр С. Кьасумовлул «ЛухIи кьини» спектакльданущал. Тани спектакль лайкь хьуссия «Лучшая режиссура» премиялун (Валерий Эфендиев). КIилчин гьуртту хьуссия 2011 шинал испаннал шаэр ва драматург Федерико Гарсиа Лоркал пьесалиясса «Бернарда Альбал къатта» спектакльданущал. Тани жулва театр ххув хьуссия ххюва номинациялува шамунниву: «Лучшая режиссура» (Дагъусттаннал халкьуннал артист Аслан МахIаммадов); «Лучшая женская роль» (Да­гъусттаннал халкьуннал артистка Жинасат ДинмахIаммадова) ва «Лучший спектакль» (театрданул коллектив).
Тания мукьахгу кIилва лавгссар Лакрал театр Владикавказрайн «Культура России» федерал целевой программалул лагрулуву. Гьар бувкIтари тайннал тамашачитал гъалгъа тIий буссар ва спектакльдания.
Ва базилух фестивальданий ккаккан бунни Гуржиял драматург Цагарелил пьесалиясса спектакль «Ханума». Режиссер Аслан МахIаммадов.
Фестивальданий гьуртту хьу­нни 8 театр: В. Тхапсаевлул цIа­нийсса Ухссавнил АьсатIиннал паччахIлугърал академический театр, Дигорнал паччахIлугърал театр, К. Хетагуровлул цIанийсса Кьиблалул АьсатIиннал театр, К. Кулиевлул цIанийсса Балкьарнал паччахIлугърал театр; А. Шагенцуховлул цIанийсса Кабардиннал паччахIлугърал театр; Х. Нурадиловлул цIанийсса Чачаннал паччахIлугърал театр; Ингушнал оьруснал паччахIлугърал музыкалул ва драмалул театр.
«Ханума» спектакль фестивальданий ккаккан бувну бур Чачаннал театрданулгу. Ухссавнил АьсатIиннал лайкь хьусса артистка, РСФСР-данул Халкьуннал артистка Валерия Хугаева кIицI лаглай бур тайннал спектакль лап хьхьарасса бивкIшиву. «Ханума бувагу ба­къасса хханссия», тIий.
Лакрал театрданулмур «Ханума» бия яргсса, ларайсса дия актертурал усттаршивугу. Яргсса роллу дия Ханумал, Кабатол ва князьнал», — увкунни ванил.
Кабатол рольданун лавайсса кьимат бивщуну бия Москавлия­сса жюрилулгу. «Лучшая женская роль» дипломгу, арцуйнусса бахшишгу ва фестивальданий хIалал дунни Кабатол роль дургьусса Да­гъусттаннал Халкьуннал артистка Луиза Шагьдиловал. ДакIнийхтуну барча буллай буру Луиза Шагьдиловагу, щалва Лакрал театрданул коллективгу ирглийсса ххувшаврищал. Гихуннайгу хъуни-хъунисса ххувшавуртту чIа тIий буру жулва театрданун.