Расул ХIамзатовлул цIанийсса республикалул миллатирттал библиотекалий декабрь зурул 16-нний хьунни философиялул элмурдал кандидат, ДГПУ-рал философиялул ва культурологиялул кафедралул доцент, СССР-данул просвещениялул отличник, ДР-лул лайкь хьусса учитель, аьлимчу ва публицист, Абакардул арс Киров Султановлул «Думы рождают певучий зов» тIисса балайрдал дискрал презентация.

И. Саидова
Машгьурсса аьлимчу, жяматийсса ишккакку, публицист акъа­ссагу, Киров чIявучин кIулссар гьунар бусса музыкантну, балайчину ва композиторну. Презентациялийн бувкIун бия лакрал халкьуннал машгьурсса балайчитал, аьртистал, композитортал.
Презентация дачин дурну ия Дагъусттаннал культуралул лайкь хьусса зузала Ссупиян Оьмаров. Мажлис наниссаксса хIаллай сахIналий ккаккан дуллай дия авторнал оьрмулул ва творчествалул лахIзардая бусласисса видеофильм. Ихтилатирттал лях-карах итабакьлай бия дискравасса Кировлул хъинну бюхханну тIутIисса балайрду. Дискрай бур ниттихасса, Ватандалухасса, ччаврихасса балайрду. Цалла ляхъан дурсса ва халкьуннал макьаннайсса балайрдал диск сакин даву – му буниялагу хъуннасса даву дур авторнал дурсса. ЩихачIав къалавхьхьусса чIунийну ва такьвалийну, бюхханну ва асар хьунну тIутIисса Кировлул балайрдах хIайранну вичIилий бия цинявппа гиккун бувкIцири.
Мажлисрай ихтилатру бувна Дагъусттаннал халкьуннал лайкь хьусса аьртист, Дагъусттаннал Музыкантътурал союзрал председатель Хан Башировлул, филологиялул элмурдал доктор АьлилхIажи Аьбдуллаевлул, политикалул элмурдал доктор Марзижат Буттаевал, экономикалул доктор Жанна Абуевал, ДР-лул Жяматийсса палаталул председательнал хъиривчу Ссапарбаг Аьбдуллаевлул, ДР-лул Халкьуннал Мажлисрал депутатътал Муса Оьмаровлул, Мурзадин Авезовлул, ДР-лул профсоюзрал зузалтрал рескомрал председатель Аьбдулла МахIаммадовлул, Да­гъусттаннал халкьуннал шаэр Сугъури Увайсовлул, профессор Кьурбан ХIаммацаевлул, МахIачкъалаллал Аэропортрал пресс-центрданул хъунама Алексей ХIажиевлул ва мукунма цайминналгу.
Хан Баширов:
— Киров ур оьрмулухун музыкалух эшкьи хьусса инсан. Балайрдая гъалгъа тIун захIматри, миннух аьркинни вичIи дишин. Ванал цалла творчествалийну, тарбиялул даврийну жулла дакIурдиву, хаснува жагьилтураву, буттал кIанттухсса, миллатрахсса ччаву куртI дуллай дур. Кировлущал дусшиву давриву ттун хъунмасса тIайлабацIу хьуссар. ДакIнийхтуну чIа тIий ура ттула дуснан цIуллушиву ва творчествалуву хьхьичIуннайшивуртту.
Буттаева Марзижат:
— ДакIнийхтуну ххари хьура Киров Абакаровичлул балайрду, макьанну цачIун дурну, диск итадакьаврия. Ва ххаллилсса даврийну жущава бюхъантIиссар Кировлул балайрду, макьанну жулва оьрчIан, оьрчIал оьрчIангу ядуван. Пахрулий учин бюхъансса Киров, лакрал миллатрал акъассагу, щаллагу республикалул аьзизсса арсри куну. Мукунма кIицI лаганна Кировхъал бавкьусса, иминсса, цинявннан эбратрансса кулпат.
АьлилхIажи Аьбдуллаев:
— Цалчин на кIицI лаганна ва цалва ссурвавраха хъинну аякьа дусса, мудан чIарав ацIайсса уссу ва ххаллилну оьрчIан тарбия дуллусса бутта ушиву. Чув, ци мажлисрай ухьурчангу, Киров цинявннал вив лавсун, бусравну икIай. КIулссар ванан аьркинний кьянкьану махъ бусангу.
Кьурбан ХIаммацаев:
— Ттун Киров нава дахьва занан айивхьуния шихунай кIулли. Жул сайки щалва оьрму цачIу лавгунни. Киров чIивинияцIава музыкалул гьунар бусса икIайва. Школалийгу ва дуллалисса цинярда мероприятиярттавух гьуртту хъанахъи айва. Хъуними классирттаву тIурча, ванал, цалва лавхьхьуну, усттарну мандолина бищайва. ЯтIул дипломращал школагу къуртал бувну, Киров дуклан увххуна Дагъусттаннал пединститутрал математикалул факультетрайн. Ванал ккаккан бунни цува оьрмулуву гьарица чулухунай итххявхсса, гьунар бусса ушиву.
ХIакьину ванал балайрдах вичIилий дакIнийн дагьлай дур хьхьичIарасса Кировлул ужагърай щябикIайсса, тяхъасса шинну. Буниялагу, ванал балайрдах вичIи дирхьукун, дакI рахIат шай. Хъунмасса барчаллагь жунна хIакьину ва байран дурсса Кировлун ва цинявппагу ванал чIарав бацIан бувкIминнан.
Дагъусттаннал педуниверситетрал муаьллим Гулинжан Кьурбановал увкунни цила шяравучу, чIярусса шиннардий архIал зузисса Кировлун хас бувсса цила ляхъан бувсса балай.
Балайрдал диск чирчуну дур Кировлул ученик, Дагъусттаннал лайкь хьусса аьртист Арслан Шагьмардановлул.
Ва кьинисса мажлисрал сий гьаз дуллай, балайрду тIий бия: Дагъус­ттаннал халкьуннал аьртистка Саният Рамазанова, Дагъусттаннал лайкь хьусса аьртистка Жанна Кьурбанова, гьунар бусса композитор Амрит ХIусайнаев, Дагъусттаннал лайкь хьусса аьртист Карин Кадинаев, Дагъусттаннал лайкь хьусса аьртист Даниял Шабанов ва Арслан Шагьмарданов.
Презентациялул ахирданий цинявппа хъамаллурахь барчаллагь тIутIисса ихтилат бувна Кировлул душ Светлана Амировал.