Аьраб мазрал учитель

49_5Ттулла даврил иширай, «Илчи» кказитрал чулуха, на лавгссияв МахIачкъалаллал 11-мур гимназиялувун. Ва гимназиялул директор бур Ккурклиятусса Дибирова Зугьра ЯхIияевна.
Шикку мадарасса лакрал миллатрал учительталгу бур зий. Гимназия цуппагу оьрчIан зат лахьхьин баврил чулуха хьхьичIунсса ххуттаву бусса бур. Ва гимназиялуву аьраб мазрал дарс дихьлай ур Ккурккуллал Тажу­ттиннул арс Шайхов Нариман.

Амин Аьбдуллаев
Ванащалсса ттул кIулшиву хьу­ссия 1980 шинал. Таний Нариман зий ия «Дагсовпрофсоюзрай» чил хIукуматирттайн туристал тIайла буккайсса отделданул инструкторну. Совет хIукумат лияннин ва даврий зий Нариманнул 10 шин хьуну дур. АцIра шинай Нариман щилчIав аьй къаданну, марцIну зий ивкIун ур. Ва мукунсса ушиву исватну чIалай бур. Циван учирчан, хIакьину ятIулминнавух, гьунттий кIяламиннавух къахъанай, коммунист партиялийн ттиликI къадуртун, тIайлану, цалва лавсъсса ххуллийх най уну тIий.
Нариманнул бувсунни хIуку­мат даххана хьуния шинай ва гимназиялуву аьраб мазрал учительну зий 23 шин хьушиву цалла. Ванал буттан Тажуттиннун ххуйну аьраб маз кIулссия, аьрабрай дурккусса ивкIун ур. Миччасса бивкIун бур ванал чил мазурдихсса гъирагу. Ккурккуллал школа ххуйну къуртал бувну, ДГУ-рал чил мазурдил факультетрайн ухлай, 3 экзамен ххювардай дуллуну, сочинениялул тIайлабацIу къавхьуну бур. Гара 1955 шинал лавгун ур Виницкий областьрайсса Ванерка шагьрулийсса самолетирттал электромеханиктал хIадур бувайсса школалий дуклан. Га къуртал бувайхту Брестский областьрайсса дяъвилул самолетирттал частьравун тIайла увккун ур къуллугъ буллан. Тикку къуллугъ буллай уна, 1957 шинал, Минскалий увххун ур КПСС партиялул кандидатну. Ххуйну аьрали къуллугъ буллай бушаврийн бувну, щалва полкрава 30 аьрза буллуминнава 3 инсан итаавкьуну ур чIумуяр хьхьичI дуклан, ми шамуннава ца – Шайхов Нариман.
Нариман, ххуйну экзаменнугу дуллуну, Ленинградрай чил мазурдил институтравун увххун ур. Институт къуртал байхту, Нариман тIайла увккун ур Авгъаннавун. Мугу хъуннасса вихшала диркIун дур жагьил­сса коммунистнай партиялул дирхьусса. Арулла шинай зий ивкIун ур Нариман Авгъаннай дяъви байбишиннин. Яла зана хьуну ур.
Нариман ур гьарцагу чулуха инсаншиврул бутIа лавайну буллусса, дусшиву дангу, дуруччингу кIулсса, дакI-аьмал ххуйсса, цалва пиша лавайну кIулсса зунтталчу. Ванал хIурмат лавайсса бур архIал зузиминначIагу, хаснува ваначIа ккалаккиминнал.
Цалва оьрмулуву Нариман­нул 30 граммрагу пиволул къахIарчI­ссар тIар, къалиян къаувкуссар тIар. Гьарца кIюрххил дяркъусса щинавунгу учIлай, зарядкагу дуллай ур. Ваная чIявусса чичинсса бур, ванийну кутIа банна. ТIайлабацIу вин давриву, Нариман!