Гъинтнил ссихI яла гьан бувасса ссутдайдихьулул гьантрай Дагъусттаннал паччахIлугърал Филормониялул гъинтнил залдануву хьунни аслийсса лакку балайрдал концерт. Му хас дурну дия лакрал цIанихсса балайчи, музыкант, гьунар бусса композитор Амрит ХIусайнаевлун оьрмулул 50 шинал юбилейран.
Залму АьбдурахIманова
Амрит барча ан ва кьини бувкIун бия, ванал макьаннай балайрду учайсса артистал бакъассагу, Дагъусттаннал эстрадалул цIа дурксса балайчиталгу. Чансса бакъая гармун-дачIулухун халкьуннал макьаннай балайрду тIиссагу.
Культпросветучилищалуву Амритлущал дуклай бивкIсса Дагъусттаннал халкьуннал артистка, даргиял балайчи ПатIимат Кьагьировал бувсуна студент шиннардий цивппа, ца кулпат кунма, общежитиялий яхъанай бивкIшиву, архIал дуклакиминнавугу Амрит ивкIшиву ца яла ябацIанма, гьунар бума. Амрит барча ан ялагу бувкIун бия: лазгиял балайчи Дилара, Жамила Аьбдуллаева, Ямлихан ХIажиев, Аьбдул Мурадов, Нурианна Къаллаева, ХIажиаьли ХIажиаьлиев, Жамал Абакаров, Аьли Абакаров, МахIаммад Къапланов ва цаймигу. Балайлул усттарсса Хъусращатугу бувкIун бия цала шяравачунал мажлис лахъа-хъун бан. Ххуй бивзуна тамашачитуран Амрит ХIусайнаевлул макьандалийсса Нурианна Къаллаевал увкусса цIусса балай, цувгу хас бувсса экстремистурал канища ливтIусса Лакрал РОВД-лул зузалтрал аьпалун.
Хъярч-махсарарттай, тамашачитуран нуш хьунну, концерт дачин дурну бия Лакрал театрданул артист Шамсуттин Къапланов ва Лакрал радиолул редактор Тамара Закарияева. Цинявннал Амрит барчагу увну, барчаллагьирттал махъругу баян бувну махъ, сахIналийсса мажлис лакьин ихтияр дуллуна Амритлул буттауссу, Хъун дяъвилул гьурттучи Саэд ХIусайнаевлухьхьун. Ваналгу цанма ххирасса чагъанттухун увкуна дяъвилул балай «Катюша». ХIасил, дакI дакьинсса мажлис хьуна.
ЛяличIину хъатIив гьарзасса шин дуну тIияв, хъатIайсса эстрадалия шацI хьуну тIияв къакIула, га хьхьуну сахIналий гармундалухун тIутIисса балайрдал вичIи дирхьуми цахухва гьан буллай, гайннухмур къулагъас ххи хъанай кунна чIалай дия.
Шанна ссятрай най диркIсса концерт дурагу лахъи ларгсса кунна чIалайрагу дакъая.
