Вай гьантрай ЦIуссалакрал райондалул жяматран ххарисса хавар бавунни: ва райондалийсса Шушиннал шяраватусса Ибрагьимхалиллул ва Аьйшатлул арс Ирккуев Сайпуттин зана хьунни Кемерово шагьрулий хьусса Аьрасатнал боксрал первенствалий хьхьичIунсса кIану бувгьуну.

Хъинну агьамсса соревнованиярттай хъуннасса ххувшаву ларсъсса спортсмен лахъа-хъунну хьунаакьин, чIалсса чIумух къабурувгун, МахIачкъалаллал аэропорт­райн бувкIун бия ЦIуссалакрал райондалул администрациялул хъунама ХIажи Айдиев, ДР-лул спортрал министрнал хъиривчу ХIайдарбаг ХIайдарбагов, ЦIуссалакрал райондалул культуралул къатлул зузалт, спортсменнал нину-ппу ва гъан-маччами. Спортсмен нанисса самолет щядикIаннин, тамансса хIаллай зюннав-дачIу рирщуну, балай тIий, къавтIий, тяхъасса мажлис тIивтIуну бия Сайпуттин хьунаакьин бувкIми.
Самолет щядиркIсса баян бувайхту, цинявппа, тIутIал ка­цIурдищал, мунал хьунийн був­ккунни. Сайпуттиннул ххувшаврия дазу-зума дакъа ххари хьусса жагьилтал, му гьаваллавун гьаз уллай, лахъа-хъун уллай бия. Сайпуттингу, ванал тренер Нураттин Оьмаевгу барча уллай, кару дугьлай, вайннащал дакIний личIансса суратру ришлай бия райондалул администрациялул бакIчи, мунащал архIал бувкIми, нину-ппу ва гъан-маччами.
Август зурул 22-29-нний Кемерово шагьрулий най дуссия жагьилтурал дянивсса Аьрасатнал боксрал первенство. Ва утти шамилчинни Аьрасатнал первенствалий гьуртту хьусса. Кемерово шагьрулийсса чемпионатрай гьуртту хьуну бур 260-нния ливчусса, Аьрасатнал регионнаясса яла итххявхми, яла сивсуми спортсментал, миннава 22 ивкIун ур Дагъусттаннаясса.
Сайпуттиннул кIушивруву бяст-ччаллий уклакисса 26 боксер ивкIун ур. Ххюйла ринграйн увккун, мукьийла ххув хьуну, 2-мур кIану бувгьуну бур Сайпуттиннул. Пахру бан лайкьсса иш бур укун бюхттул­сса даражалул чемпионатрая жула лакку оьрчI (ва первенствалий увагу ва ца лакку оьрчI гьуртту хъанай ивкIун ур) арцул медальданущал зана шаву.
— Жулва билаятрай заккан­ттай буккаврихух машхул хьусса спортсментал чIявусса бушиврийн бувну, Аьрасатнал первенствалий ххувшаву ласун бигьа бакъассар. Та первенствалийн лавгсса дагъусттанналгу, чачанналгу спортсментурава так ца Сайпуттин зана хьунни ххувшаврищал. ТIайлассар, ва ххувшаву ласун жун кIиннанмагу ххишала бакъа хъунмасса захIмат бишин багьунни. Гьай-гьай, жул мурад 1-сса кIану бугьанссия, амма ва ххувшавриягу ххариссару. МукIруну ура Сайпуттиннул уттигу цалва гуж ва кьуват ккаккан баншиврийн, вания тихунмайгу бюхттулсса ххувшавурттайну ванал жува ххари буллантIишиврийн, — тIий ур ванал тренер, СССР-данул спортрал мастер Нураттин Оьмаев.
Ва, мяйжаннугу, чIярусса шиннардий тренерналгу, цалва спортсменналгу бивхьусса хъунмасса захIматрайну лайкь дурсса ххувшавур.
Ва чемпионатрайгу гьуртту хьун, хьхьичIунсса кIанугу бугьан Сайпуттиннул буниялагу лахъисса, бигьа бакъасса ххуллу бивтун бур.
Спортрахун агьну ур ва оьрмулул 11 шинаву. Бокс язи бувгьуну бур цала буттан ххуй бизайсса, мунан ххирасса буну тIий. ЧIавасса оьрмулий (цIана Сайпуттиннун дурагу 22 шин дур), цикссагу бяст-ччаллаву гьуртту хьуну, хьхьичIунсса кIанттурду бувгьуну бур ванал.
Дагъусттаннал чемпионнал цIа ларсун махъ ва айивхьуну ур Ухссавнил Ккавкказуллал, Аьрасатнал даражалийсса бяст-ччаллавух гьуртту хъанай. Оьрмулуву хъинну дакIний личIансса, бюхттулсса ххувшаву Сайпуттиннул ларсун дур 2013 шинал декабрь зуруй Грозный шагьрулий хьусса, Аьрасатнал Виричу, Чачаннал Республикалул президент Рамзан Кьадировлул цIанийсса бахшишрахлусса щалвагу Аьрасатнал турнирданий. Ва цурдагу Аьрасатнал Федерациялул боксрал кьянкьасса тIалавшиннарду дуру­ччин аьркинсса, хъинну захIматсса, спортсментурал гьунардан мяйжаннугу тIайласса кьиматру бивщусса чемпионат хьуссар. Судиятурал тIайлашиврийну ва дакIнийгу лирчIун дур микку гьуртту хьусса спортсментуран. Ва турнирданий­сса ца ринграй Сайпуттиннул муттаэ ивкIун ур Рамзан Кьадировлул ссил оьрчI Аьшаханов. Цинявппагу муттаэтураяр ххув хьуну, цалчинсса кIану бувгьуну, Сайпуттиннул Аьра­сатнал спортрал мастернал цIа ларсун дур.
Мукун ва хьуну ур Ухссавнил Ккавкказуллал Федерал округрал чемпион.
Мукунма цалва бюхъу-гьунар ва спортсменнал ккаккан бувну бур цаймигу личIи-личIисса бяст-ччаллаву. Гьуртту хьуну ур Сайпуттин Ставрополлал крайрайсса Суворовск тIисса шагьрулий хьусса, яла гьунар буми язи бугьлагьисса, турнирданийгу, Элиста, Ростов шагьрурдай хьусса Аьрасатнал чемпионатирттайгу.
Сайпуттин Ирккуевлул спорт­рал ххуллийсса бюхттулсса кка­ккиялун ккалли дан бучIиссар Пятигорск шагьрулий «Юность России» тIисса цIанилу хьусса Аьрасатнал даражалийсса боксрал чемпионатрай ларсъсса ххувшаву. Ва захIматсса чемпионатрай спортрал мастертурал цIарду ларсъсса спортсментуращал 3 ринграй ххув хьуну, хьхьичIунсса чемпионатрай гьуртту хьунсса ххуллу тIивтIуссар.
[pullquote]Август зурул 22-29-нний Кемерово шагьрулий най дуссия жагьилтурал дянивсса Аьрасатнал боксрал первенство. Кемерово шагьрулийсса чемпионатрай гьуртту хьуну бур 260-нния ливчусса. Сайпуттиннул кIушивруву бяст-ччаллий уклакисса 26 боксер ивкIун ур. Ххюйла ринграйн увккун, мукьийла ххув хьуну, 2-мур кIану бувгьуну бур Сайпуттиннул.[/pullquote]Цумур духьурчангу спортсменнал ларсъсса ххувшавриву тренернал бияла хъунмассар. Спортсменнал ххувшаву – му тренерналгу ххувшаву хъанахъиссар, мунал пишакаршиврул, бюхъулул барашинну хъанахъиссар. КIиннал гьунар хIала бувххунни бюхттул­сса ххувшавуртту ласайсса. Укун Сайпуттиннул чIарав мудангу ур ва хIадур уллалисса, ванаха буттал кунна хъуннасса аякьа дуллалисса, гьунар ххисса тренер, СССР-данул спортрал мастер, КIундиннал шяраватусса Нураттин Оьмаев. Ва зий ур Умахановлул цIанийсса Олимпий резерврал спортрал школалий боксрал тренерну. Ва школалий хIадур бувсса оьрчIал хьхьичIунсса кIанттурду бувгьуну бур. Миннавагу чIявуми Нураттин Оьмаевлул хIадур буллай бивкIсса бур. Ши­ккува кIицI лаганну, ацIнияхъайсса шиннардий ванал хIадур буллай бивкIсса лакку оьрчIру Сайпуттин Ирккуев ва Сослан Асбаров Аьра­сатнал сборныйлувун кьамул бувну бур. АрулцIалунния ливчусса боксрал тренертал бусса республикалий мудангу жула лаккучунал хIадур буллалими оьрчIру ххув хъанахъаву пахру бан, ххари хьун бучIисса ишри. Цува Нураттингу ляличIинува лакрал жагьилтал хьхьичIунмай ласласисса, ми цайми миллатирттал оьрчIаяр лавайну ччисса, цил икIайкунсса патриот ур. Цува зузисса школалийгу НураттиннуцIун «лакрал тренер» тIисса цIа ларчIун дур.
— Спортсментурал ялув тренернан хъунмасса захIмат бишин багьайссар, му захIматгу бюхъавай жуламиннал цIаний бишин ччан бикIай, — тIий ур цува Нураттингу.
— БувчIлачIисса зат бур хIа­кьинусса кьини спортраву спортс­меннал гьунардануцIун, итххя­ххаврицIун чIарав бацIанмигу аьркинну бушиву. Спортсмен хIадур аврицIун, ми масъалартталссагу буллан тренернан багьлай бур. Ххуллун-харжирая тIайла хьуну, цимурцаннул, судиятурал тIайласса кьимат бищаврил ялувгума бакI цIуцIаву дуллалима тренер ур, — тIий, цала тренерная рязийну буслай ур Сайпуттин.
Ва дакIнийхтунусса барчаллагь тIий ур хьхьичIва-хьхьичI цала тренернахь, цалла ххувшаврия дакIнийхтуну ххари хьусса ЦIуссалакрал райондалул бакIчи ХIажи Айдиевлухь, цинявппагу цалва дустурахь, гъан-маччаминнахь.
Ноябрь зуруй Самара шагьрулий хьун тIий дур Аьрасатнал боксрал чемпионат. Микку гьуртту хьун гьантIиссар Сайпуттин Ир­ккуевгу. Цинявппагу спорт ххираминнал цIанияту чIа тIий буру Сайпуттиннун тIайлабацIу. Бюхттулсса ххувшаврищал зана хьуну ххари баннав цинявппагу инава ххирами.
Имара Саидова
Андриана Аьбдуллаева