Ккуллал райондалул МФЦ зух ялугьлай бур

004Махъсса шиннардий шагьрурдай ва шяраваллаву яхъанахъисса инсантуран личIи-личIисса хIаллихшиннарду хIасул даншиврул тIитIлан бивкIунни МФЦ-ду. Сайки цалчинминнавух 2012-ку шинал тIивтIуссия мукунсса идара Ваччав. Уттигъанну на хьунаавкьура мунил директор Кьурбайтаев Нуруллагьлущал.

— Зу цукунсса хIаллих­шин­нар­ду хIасул дувайссар зучIана увкIсса инсаннан?
— Мукунсса хIаллихшиннардал сияхI дур 250-ннийн дирсса. ЖучIан увкIсса инсаннал аьркинлугъру би­ттур дуваншиврул чара бакъа аьркинсса документруну хъанахъиссар: паспорт, военный билет, ташулул чагъар, захIматрал жуж, чIумувун къабивсса оьрчIал бакIрал чагъар, ци тIалав дуллай уссарив чивчусса аьрза. 43_13ЧIумувун къаивсса оьрчIал бакIрал чагъар бакъахьурчагума, жуща бюхъайссар га райондалул ЗАГС-рая жущава тIалав буван.
Жулла райондалий агьалинан аьркинсса затруну чIяруну дикIай: оьрчIан пособия бишаву, захIматрал ветерантуран дулай­сса арцу, прописка даву, пенсия бихьлахьийни аьркинсса чагъарду батIаву, учительтуран, социал зузалтран, ветеринариялул, культуралул ва цаймигу зузалтран дулайсса коммунал арцул масъала, даврих луглагими сияхIрайн ласаву, булайсса субсидиярттацIун бавхIусса ишру, къатрацIун, аьрщарацIун бавхIусса масъалартту. Шикку ца бувчIин буван багьлагьисса зат бур. Къатрал тех-план дувайсса идарартту хасъсса бушиврийн бувну, ялув кIицI бувсса чагъарду хIадур буван миннал ласай 3500 къуруш. «Зеленка» ласуншиврул ласлай бур 400 къуруш госпошлиналул. Му госпошлина дулун бюхъайссар жучIасса залдануву бивхьусса терминалданийхнугу.
Ялагу жуща кIул буван шайссар жучIана увкIсса инсан налогру дулавриву буржлувну уссарив акъа­ссарив. Учиннуча, ялагу инсан суд­рахьхьун агьсса, къаагьссагу жуща кIул буван шайссар.
Ялув кIицI бувсса терминалданийхну жучIа дулун бюхъайссар транспортрахсса налогру, административ налогру, госпошлина ва цаймигу налогру. Вай дулун кумаг бувайссар жучIасса операторнал.
— Зул давриву цумур чулиннайсса дикIай дайшишру?
— Дайшишру дикIай, шагьрурдай прописка дунура, ший яхъана­хъисса кулпатру оьрчIан булайсса пособиярттал хъирив бизлазийни. Закондалул тIалавшинна дур ми пособияртту инсаннал прописка дусса кIанай булун аьркиншиврий­сса. Вай укунсса ишру инсантуран бувчIин буллан багьлан бикIай.
— ДикIайрив шяраваллал администрациярттал чулухасса дайшишрурду?
— КъадикIай. Шяраваллал администрациярттай «Парус» тIисса программалий дуссар, шяраваллаву яхъанахъисса инсаннал къатта-къушлия дайдирхьуну, аьнакIайн дияннинсса чичрурду дурну. Мунияту кIайннал жун аьркинсса затру биттур бувай.
— Зулла чулуха ци бигьашиву дувару зу шяраваллал инсантуран?
— Жул зузалт, ккаккан був­сса графикрайн бувну, лагайссар шяраваллавун инсантал кьамул буван. Шяраваллава райондалийн заназисса муданмасса машинартту бакъашиврийн бувну, ва иширай инсантуран хъунмасса кумаг хъанахъиссар.
— Вила канилусса ххуйну зузисса зузалтрал цIарду цуманалсса кIицI дуван бюхъанссар?
— Цинявгу МФЦ-лий зузисса зузалт цалла даву ххуйну кIулсса, уттисса чIумул техникалущал «дусшиву» дусса зузалтри. КIицI дуванна цаппараннал цIарду: Рамазанова Аксана, Кудуева Лилия – вай операторталли; Кулиев Мяъсуд – ва экспертри; Мурачуева Муслимат – ва администраторди.
— Барчаллагь, Нуруллагь, бувсса ихтилатрахлу. Дуллалимуниву тIайлабацIуртту баннав.
Ихтилат бувссар ХIажимурад ХIусайновлул

Читайте также: