Жижара

2300021КЬУРБАН­МАХIАММАДЛУЛ АРС КАРИМОВ ЗАГЬИДИ
Мадарасса хIаллай къашавайгу ивкIун, дунияллия лавгунни ххаллилсса лаккучу, мукъулгу, тIуллалгу уздансса зунтталчу, захIматрал ветеран, ЧIяйннал шяравасса Каллахъал КьурбанмахIаммадлул ва Кумсиятлул арс Загьиди.

Загьиди увну ур 1934-кусса шинал ЧIяйннал шяраву. ЧIяйннал дянивмур даражалул школагу къуртал бувну, Загьиди дуклан увххун ур Дагъусттаннал шяраваллил хозяйствалул институтравун. Му бувккуну махъ зоотехникнал пишалий зун тIайла увккун ур Ккуллал райондалий­сса зооветучастокрайн.1960-кусса шинал дуклан увххун Москавуллал ветеринариялул академиялувун. Му къуртал бувну махъ зун ивкIун ур хъунама зоотехникну ГьунчIукьатIрал колхозраву. 1964-ку шинал Загьиди ивтун ур Лакрал производствалул управлениялул инспекторну. Ризкьилул жинс ххуй даву мурадрай, 1965-ку шинал Загьиди увцуну ур Ккуллал райондалул производствалул управлениялийн. Му даврий зий Загьидинал хьуну дур 18 шин. Цалва пиша ххуйну кIулсса, давриву карчI дакъасса пишакарнаща бювхъуну бур райондалул 13-ннагу колхозрал ятту-гъаттарал жинс ххуй дан, миннуя ласайсса ппал, дикI, накI гьарза дан.
1983-кусса шинал Загьиди ивтуна Ккуллал райондалул шяраваллил хозяйствалул управлениялул хъунаманал хъиривчуну. 1985 шинал Загьиди ивтун ур ЧIяйннал колхозрал председательну. Шикку зий хьуну дур 6 шин. Райондалий зукъази­сса агьалинал центр тIивтIуну, мунил каялувчину ивтуна. Ци даврий зий ивкIнугу, Загьидинал чIалачIи бувна цува гьунар бусса пишакар ушиву. Ва ия захIматрал ветеран, республикалул гъаттарал зоотехник тIисса цIанин лайкь хьусса зузала. Загьиди лайкь хьуну ур медаллан, чIярусса грамотардан ва бахшиширттан.
Цибанссар, ажалуннин мажал бакъассар учай. Загьиди хъунав хьунугу акъая, цIуцIаву ххув хьуну, жуятува личIи унни кьадарданул.
Загьиди дунияллия лагаврил кьурчIишиву кIидачIлай, жижара буллай буру ванал кулпатрахь Шамсижатлухь, арсурваврахь Гьаруннухь, Шамиллухь, душваврахь Нинахь, Залмухь, Качардухь ва махъсса гъан-маччанахь. Алжан булуннав, аьпа баннав, рухI рахIатний дишиннав. Махънал оьрмурдай барачат бишиннав. Амин.
ЧIяйннал жяматрал цIания ТIалхIат АьвдурахIманов

——————————————

230001ХIАЖИНАЛ ДУШ МУХIАДОВА ЖАВГЬАРАТ
Августрал ахирданий, оьрмулул 91-сса шинаву, чан-кьансса къашавайгу хьуну, аьпалухьхьун лавгунни цилва оьрмулуву хъунмасса захIмат бивхьусса, ххишала бакъа уздансса зунттал хъамитайпа Акъихъал ХIажинал ва МаллихIатлул душ МухIадова Жавгьарат.
Жавгьарат бувну бур Гьун­чIукьатIрал шяраву у­с­ттарнал кулпатраву 1924 шинал ноябрь зуруй. 1939 шинал ГьунчIукьатIрал школданий лавайсса даражалий 7 класс­гу бувккуну, колхозраву зун бивкIун бур. Ванил оьрмулул уртакьгу хьуну ур Хъанарияту­сса МухIадов Аьбидин, цалла шяраву шофернал пиша хьхьичIва-хьхьичI лавхьхьусса зунтталчу. Ва бия куннай кув бавкьусса, захIмат ххирасса, цума-цанналгу хIурмат бусса, лагма-ялттунащал хIал бавкьусса кулпат. Вайннал цивппа кунма захIмат ххирану тарбиягу бувну, чивун буккан бувну бур 6 оьрчI: арс ва 5 душ.
Жавгьарат бия захIматрал ва дяъвилул ветеран. Гьуртту хьуну бур душманная дайшишру дуллалисса захIматрал фронтрай. Лайкь хьуну бур медаллан ва ХIурматрал грамотарттан.
Жавгьаратлул бивкIулул кьурчIишиву кIидачIлай, жижара буллай буру ванил арснахь Мурадлухь, душваврахь, куявтурахь, арснал щарнихь, оьрчIал оьрчIахь, цинявппагу гъан-маччаминнахь. Цил бунагьирттал аьпа баннав, рухI алжаннул ххари даннав.
ГьунчIукьатIрал,
Хъанардал жямат

————————————-

ГьунчIукьатIрал школданучIасса « Дараччи » клубрал хъами, кьурчIишивугу кIидачIлай, жижара буллай буру жулва школданул учительница Касаева Саида Аьбидинал душнихь, ванил ххирасса нину
МухIадова Жавгьарат
аьпалухьхьун лагаврийн бувну. Махънал оьрмурдай барачат бишиннав, Жавгьаратлул рухIгу рахIатний дишиннав.
ГьунчIукьатIрал школданучIасса « Дараччи»
клубрал коллектив

————————————-

КьурчIишивугу кIидачIлай, дакIнийхтунусса жижара буллай буру Мурад ва Марита МухIадовхъахь, вайннал нину, ласнал нину
Жавгьарат
аьпалул шаврийн бувну. Махънал оьрмурдай барачат бишиннав, Жавгьаратлул бунагьирттал аьпа буваннав, рухI куклуний дишиннав.
«Илчи» кказитрал коллектив

————————————

КьурчIишиву кIидачIлай буру хIурмат бусса МухIадова Марита Велихановнахь ва ванил лас Мурад Аьбидиновичлухь, вайннал ххирасса ласнал нину, нину
Жавгьарат
аьпалул шаврийн бувну. Зул ичIува ххарисса бакъа бухху-букку къахьуннав, Жавгьаратлул барачат махъ ливчIун лякъиннав, мунин алжан нясив баннав.
ДР-лул Культуралул министерствалучIасса Республикалул Халкьуннал творчествалул къатлул коллектив

———————————

ДакIнийхтуну жижара буллай, кьурчIишиву кIидачIлай буру
Амаев Амир Жабраиллул арснал
ичIуваминнахь, гъан-маччанахь, щалвавагу агьлу-авладрахь. Махъминнал оьрмурдив лахъи баннав, агьлу-авладрай, ГьунчIукьатIрал шяраву ванал цIанин лайкьми чIяву хьуннав. Амирдул бунагьирттал аьпа баннав.
«Дараччи» клуб

———————————

ДакIнийхтунусса кьурчIишивугу кIидачIлай, жижара буллай буру ГьунчIукьатIатусса
Амаев Амир Жабраиллул арс
дунияллия лагаврийн бувну, мунал оьрчIахь, гъанцириннахь, агьлу-авладрахь.
Цув алжаннул ххари уваннав, рухI хъинний дишиннав.
ГьунчIукьатIрал школданучIасса «Дараччи»
клубрал коллектив

————————————-

ГьунчIукьатIрал школданучIасса « Дараччи » клубрал хъами кьурчIишиву кIидачIлай, жижара буллай буру школданул директор Къушиев Малик МахIаммадлул арснахь ва учительница Къушиева Насият МахIаммадлул душнихь, вайннал ххирасса ниттиуссу
Мурадов Макьсуд
аьпалухьхьун лагаврийн бувну. Макьсудлул рухI алжаннул ххари даннав, гьав нурданул дуцIиннав.
Махъминнал оьрмурдай барачат бишиннав.
ГьунчIукьатIрал школданучIасса «Дараччи»
клубрал коллектив

————————————————-

almngsХIайп, вил мусил чIу ххишала къабаянтIисса

Барз ккуру лавгунни Да­гъусттаннал «мусил чIу», ххаллилсса балайчи Аьлиоьмар Аьлиев дунияллия лавгун. Ванаясса аьпалул ххару чичин ччай бунувагу, кьалан бугьан ка гьаз къахъанай ливчIра уттинин.
На Аьлиоьмар Аьлиевлул ва Мирханум Шариповал балайрдайра хъунма хьусса. ЛяличIисса, тикрал къашайсса чIурду ва такьварду. Балайрдаву тIурча миллатрал дакIгу, рухIгу. Щалиххан къабюхъайсса балайрду. ХIакьсса балайлул цIу-цIанпир вайннал балайрдалли ттун кIул бувссагу. Муниятур хIакьину Дагъусттаннай цIуртти ссавнийссанниярвагу чIяву хьуну бухьурчагу, миннува нажагьссанналссавагу балайрду ххуй къабизайсса ттун, гьас-тIанкIлил балайрдахрив вичIидишиннарагу къашайсса. Муниятура «ТНТ», «Прибой» каналлал цIу бакъасса концертирттаягу лабикIлакIисса.
ХIайп тIийнма бикIайссияв Мирханумлулгу, Аьлиоьмардулгу сахIна ччянива кьабитаву. ЯхI гъагъан буллай бур Аьлиоьмардул ласун нясив къархьусса «Халкьуннал балайчинал» цIа хIакьину хъатIал балайчитурангума вакссара бигьанна дуллай, ччанналун рутлай бушиврул.
ЧIярусса шиннардил мутталий тамашачитурал хьхьичIун къаувксса Аьлиоьмар ванияр 4 шинал хьхьичI «Щунудагъ» фестивальданий балай тIутIийни макь дайгьин хъанай бакъая, ганал балайлуву миллатрал дакIгу, рухIгу асар хъанай. ЦIанакулгу, вай аьпалул махъру чичлай бунувагу, вичIахух чIюхлайнма бур Аьлиоьмардул «Та гъидайдихьулул цалчинсса кьини», «ЧIев-чIев тIий бур чIемулт чIемултрал арив», «Вина ччима ттухь буси, муналгу банна хIурмат» тIисса ва чIявусса цаймигу, миллат­рал дакIгу, рухIгу цаву дусса, балайрду. ХIайп, вил мусил чIу ххишала къабаянтIисса.
Зулайхат Тахакьаева