Августрал 20-нний Ккуллал райондалул библиотекалуву дия литературалун хас дурсса хъинну ххуйсса уттарашинна. Библиотекалул зузалтращал ва дуклаки оьрчIащал хьунабакьин бувкIун бия Ккуллал райондалий яхъанахъисса, дакIнил асарду шеърирдайну, насрулийсса чичрурдайну мяъшарданийн буккан буван бюхъайсса пагьмурдал заллухъру: Ися МахIаммадов, Сиясат Зуллиева, Саржанат Читаева, ХIажимурад ХIусайнов.
Литературалун хас бувсса мажлис бачин бувну бия райондалул библиотекалул зузала Аьлилова Шавлухъ. БакIрая ванил бувсуна литературалул жулва оьрмулуву цукун агьамсса кIану бугьлагьиссарив. КIицI дурна Ккуллал райондалия бувксса, лакрал дянив бакъагу, щала СССР-данийх, Аьрасатнавух, хIукуматрал дазул кьатIух цIарду ппив хьусса шаэртурал ва чичултрал цIарду: МахIаммад-Загьид Аминовлул, Абачара ХIусайнаевлул, Бадави Рамазановлул, Аьли Айдаевлул, Гьарун Саидовлул, Казбек Мазаевлул, ХIасан КIуруховлул, Валерий Амировлул, Ссугъури Увайсовлул ва цайминналгу.
Яла махъ буллуна Хъусращиял шяраваллил библиотекалул хъунмур ХIажиева Сабринахьхьун. Ванил ва дуклаки оьрчIал бувсуна Хъусращиял шяравасса шама уссия-шаэртурая: Камалуттин КьурбанмахIаммадовлуя, Чанкура КьурбанмахIаммадовлуя, Рамазан Рамазановлуя. ХIадур дурну дия вайннал оьрмулул ххуллурдая, творчествалия бусласисса суратру лачIун дурсса стенд. ОьрчIал бувсуна такну гьарца шаэрная, бувккуна гайннал шеърирду. Чанкурал душнил душ Даллаева Юлианал щаллу бувна хъунбуттал мукъурттийнусса балай.
Хъирив Ккуллал шяраваллил библиотекалул хъунмур ХIажиева Аьйшал бувсуна Ккуллал шярава бувксса чичултрая, шаэртурая. Бувккуна Къянчиевлул дяъвилун хас бувсса шеърирду. Ккулатусса Читаева Саржанатлул, Зуллиева Сиясатлул, Алхасова Ссапижатлул бувккуна цалва чивчусса шеърирду.
СумбатIуллал шяраваллил библиотекалул хъунмур, Дагъусттаннал культуралул лайкь хьусса зузалал цIанин лайкь хьусса Будайчиева Аьбидатлул гьарта-гьарзану бувсуна библиотекалул даврия.
НасихIатрайсса ихтилат бувна мажлисрал хъуначу, учитель, шаэр Ися МахIаммадовлул. Бувккуна ванал цалва шеърирдугу.
Хъювхъиял шяраваллил библиотекалул хъунмур, Дагъусттаннал культуралул лайкь хьусса зузала Сулайманова Зоял бувсуна Хъювхъиял шяравасса шаэр Валерий Амировлул творчествалул шаттирдая. Ванищалсса оьрчIал бувккуна Валерий Амировлул шеърирду.
ЦIуйшиял шяраваллил библиотекалул хъунмур ХIусайнова Басиратлул, дуклаки душнищал, бувсуна ЦIуйшиял шяравасса шаэр ХIажимурад ХIажиевлул творчествалия.
ЧIяйннал шяраваллил библиотекалул хъунмур Ибрагьимова Гурсаланнул бувсуна му шярава бувксса шаэртурая, чичултрая. Такну кIицI дурна Аьли Айдаевлул, Бадави Рамазановлул ва цайминнал цIарду. Ванил бувсуна хъинну гьунар бусса шаэр ивкIшиву Бадави Рамазанов. Ванал «Урша гъавгъ душ» тIисса ца шеърилийну чIалай бушиву дяъвилул шиннардий инсантуран ккавкмур. Яла оьрчIал бувккуна му шеъри.
Вихьуллал шяраваллил библиотекалул хъунмур МахIаммадова Жамилал, дуклаки оьрчIащал архIал, бувсуна Вихьуллал шяравасса шаэр ХIасан КIуруховлул оьрмулул шаттирдая, творчествалия. Бувккуна оьрчIал шаэрнал цала буттал шяраваллин хас бувсса шеърирду.
Цалчинмур ЦIувкIуллал шяраваллил библиотекалул хъунмунил ва дуклаки оьрчIал бувсуна му шяравасса шаэр ПатIимат Рамазановал творчествалуя. ОьрчIал бувккуна ПатIимат Рамазановал шеърирду.
Мажлисрал ахирданий Ккуллал райондалул библиотекалул хъунмур ХIажиаьлиева ПатIиматлул барчаллагь увкуна циняв библиотекалул зузалтрахь ва дуклаки оьрчIахь, укун ххуйну гьан баврихлу литературалун хас бувсса мажлис.
Ххуйсса ихтилат бувна Ккуллал райондалул бакIчинал маслихIатчи ва пресс-секретарь Хизриев Шамххаллул. Ванал кIицI бувна оьрму личIину, литература личIину най къадикIайшиву, гай ца ххуллийх нанишиву, дакIниву ватандалул, дустурал, тIабиаьтрал чулинмай ххуйсса асарду хIасул шайсса инсаннал тачIав ватан лиян къадитаншиву. «Литература ва оьрму – ца ххуллул кIива къирагъри», — куна ванал. Бувсуна Шамххаллул Ккуллал райондалий яхъанахъисса шаэртурал чивчумур бавтIун, лу сакин бувансса пикри бушиву. Гьакссагу ххуйсса пикри бур. ЦIуллу уваннав ина, Шамххал. Аллагьнал кабакьиннав. Мажлисрай гьуртту хьуми циняв рязину, чIун-чIумуй укунсса хьунабакьавуртту дулланну тIий ливчIуна.
Лажин хIадур дурссар ХIажимурад ХIусайновлул
