Сентябрь зурул 1-нний щалвагу билаятрай цIусса дуккаврил шин дайдишай. Жулва билаятрай гьашинусса шинал КIулшивурттал байран кIицI ларгунни 22 миллиондалия ливчусса дуклаки оьрчIал ва студентътурал. Республикалийсса цинярдагу кIулшивуртту дулаврил идарарттай кунма, мудангу лавайсса даражалийсса хIадуршиннаращал дайдишай цIусса дуккаврил шин ЦIуссалакрал райондалул шяраваллавусса школардай.
Имара Саидова
Вай махъсса шиннардий Новостройрайсса цинярдагу лакрал щархъаву бувну къуртал бунни уттизаманнул оборудованиялул, технологиярттал щаллу бувсса школарду. ЦIусса дуккаврил шинал оьрчIру барча буван гьашинусса жул аьрххи хьунни цIуминалийсса ТIюхчардал школалийн. ТIюхчардал цIусса школалул гьашину итабавкьуссия цалчинсса выпуск ва 1-мур классравунгу кьамул унни 26 дуклаки оьрчI.
КIюрххилва школалийн най бия чIюлуну лархсса дуклаки оьрчIру, баллай бия школалул хIаятрава балайрдал чIурду, байрандалун хасну чIюлу дурну дия школалул хIаят.
КIулшивурттал кьини хьунадакьин бавтIун бия цалчин нанисса мюрщулт ва хъуними дуклаки оьрчIру, миннал нину-ппу, шяраваллил агьали, хIурмат лавайсса хъамал.
ЦIусса дуккаврил шинащал оьрчIру барча буван бувкIун бия ЦIуссалакрал райондалул администрациялул бакIчинал хъиривчу Хизри Рамазанов, ТIюхчардал шяраваллил администрациялул хъунаманал хъиривчу ХIасан ХIасанов, ЦIуссалакрал райондалул азарханалул хъундухтур Булбул Исрапилова ва бусса оьрмулий ТIюхчардал школалий дарсру дихьлай бивкIсса учительница, захIматрал ветеран Ума ХIаммадова.
КIулшивурттал кьинилущал оьрчIру барча буллалисса ихтилат бунни школалул директор ЩайхахIмад Дадаевлул. Дуккаврил ххуллий цалчинсса шаттирду ласласисса мюрщултрахь бувсунни цуксса гуж ва чани буссарив дуккавриву, чIа увкунни дуккавриву ва спортраву хьхьичIуннайшивуртту.
ДакIний личIансса, насихIат бусласисса махъру лавхъунни Хизри Рамазановлул, Булбул Исрапиловал, ХIасан ХIасановлул ва Ума ХIаммадовал.
Ларгсса шинал 1-мур класс къуртал бувсса дуклаки оьрчIал цалчин школалийн нанисса мюрщултран хIадур дурну дия тамашасса концерт. Цалва гьунарду ккаккан бувна школалул дуклаки оьрчIал къавтIаврил ансамбльданулгу.
Цалчин школалийн нанисса оьрчIалгу дурккуна цIуну лархьхьусса назмурду. Хъуними классирттал дуклаки оьрчIал хъарай щяивтсса чIивитIул бивщуна Цалчинсса гюнгутIи.
Мюрщулт цалчин парталух щябивтун, миннащал, миннал нитти-буттащал кIул хъанай бия цалчинсса учительницахъул Динара Аьлибагова ва Къисттаман МахIаммадова.
Ва кьини хъуними классирттаву най дия Дарбантуллал шагьрулун 2000 шин шаврин хас дурсса тарихрал дарсру.
