Къуртал хъанай бур оьрчIан яла ххирасса гъинтнил каникуллал гьантри. Яла лахъими каникуллал гьантри, оьрчIаща ххуйну бигьалагангу, цалла цIуллу-сагъшиву цIакь дувангу бюхъайсса. Ва давриву агьамсса кIану бугьлай бур гъинтнил бигьалагай лагерьдал.

Гъинтнил зурдардий жулла республикалул оьрчIру цукун бигьалавгссарив, бигьалаган чун циксса оьрчIру лавгссарив бувсунни ДР-лул КIулшиву дулаврил ва элмулул министерствалул Ялунсса кIулшиву дулаврил, соцзащиталул ва оьрчIал ва жагьилтурал чIарав бацIаврил управлениялул начальникнал хъиривчу Хайбуллаева Ирина МахIаммадрасуловнал (ШавкIуллал шяравасса лакку душ):

— ОьрчIру бигьалагаврил, миннал цIуллу-сагъшиву цIакь даврил давуртту дурссар Да­гъусттан Республикалул «Об организации отдыха, оздоровления и занятости детей и молодежи в Рес­публике Дагестан» Закондалийн (20.07.2011 ш.№45) бувну ва ми масъалартталсса байсса хасъсса Республикалул комиссиялул (Рес­публиканская межведомственная комиссия по организации отдыха, оздоровления, занятости детей, подростков и молодежи) хIукмулийн бувну.
ОьрчIал цIуллу-сагъшиву цIакь даврил кампаниялул лаг­рулуву дурссар лавай кIицI лавгсса Комиссиялул 3 заседание, оьрчIру бигьалагайсса ва цIуллу-сагъшиву цIакь дувайсса учреждениярттал каялувчитуращалсса 4 совещание. Миннуй хъунмур къулагъас дурссар вай идарарттайсса оьрчIру кьамул баврийнсса хIадуршиннарах, санитар кьараллу ва мукунна цIудагьавриясса мюхчаншиврул кьараллу, хасъсса низам дуруччаврих, оьрчIал цIуллу-сагъшиву цIакь даврийн ва миннавусса гьунарду итххяххан баврийн тIайла дурсса давуртту даврих.
Дагъусттан Республикалийсса ва шиналсса гъинтнил ва цIуллу-сагъшиву дуруччаврил хасъсса кампаниялул хIасиллайн бувну, му давривух гьурттуну бивкIссар 107 учреждение (2014-ку шинал – 164), миннувату 39 бур шагьрулул кьатIувсса стационар идара (2014 шинал – 57), 68 бур оьрчIру дяхтта бигьалаган лагайсса (2014 шинал – 104).
Ва шиналмур бигьалаглагисса ва цIуллу-сагъшиву цIакь дуллалисса давривун кIункIу увну ур аьмну 21 060 оьрчI (2014 шинал – 56 986): миннавату 9 оьрчI ивкIссар дяхттасса лагерьдай (ларгсса шинал – 24 544 оьрчI); шагьрулул кьатIувсса стационар лагерьдай 11 160 оьрчI (ларгсса шинал 28 700 оьрчI); республикалул дазул кьатIувсса санаториярдай – 900 оьрчI (ларгсса шинал – 2 250 оьрчI).
Му бакъассагу, республикалиясса 110 оьрчI игьалавгссар Къиримнаву, «Артек» МДЦ-рай, 185 оьрчI лавгссар «Орленок» щалвагу Аьрасатнал оьрчIал центрданийн ва 131 оьрчI лавгссар Краснодардал крайрайсса Жагьилтурал «Смена» центрданийн.
Ингушнал Республикалул Минтрудсоцразвитиялущалсса КьутIилийн бувну, кIилчинмур сменалий 45 инсанная сакин хьусса группарду баххана­ххи бувссар:Ингушетиянавусса «Аързи» лагерьданийн жулва оьрчIал группарду гьан був­ссар ва жучIава кьамул бувссар му республикалиясса оьрчIал группарду.
ДР-лул КIулшиву дулаврил ва элмулул министерствалул «Каспий» ДОЛ-даний кьамул бувссар Луганскаллал Халкьуннал Республикалиясса 45 оьрчIая сакин хьусса группа.
Республикалий хъуннасса къулагъас дуллалиссар ахIвал-хIал кIюласса, оьрчIру чIявусса, щаллу бакъасса кулпатирттавасса оьрчIах. КIира сменалий вай кIицI лавгсса кулпатирттавасса 7 азара оьрчI игьалавгссар.
ДР-лул Роспотребнадзорданул, МЧС-рал, МВД-лул ва цаймигу структурардал цачIусса даврийн бувну, 2015-ку шинал­сса оьрчIру бигьалагаврил ва цIуллу-сагъшиву цIакь даврил даву ларгунни цалийну, аварасса ишру къавхьуну. Мукунна аварий тагьарду, инфекцион азардал къашавай хьусса ва цаймигу ишру къавхьуну.
ОьрчIан аьркинсса медициналул кумаг баншиврул шагьрулул кьатIувсса цинявппагу лагерьдай зий буссия медициналул пунктру, цайгу оьрчIал цIуллу-сагъшиврул къаралданий бавцIусса лавайсса даражалул пишакартал.
Мукунма цалла даву ххуйсса даражалий дуллай, бигьалаглагиминнал паракьатшиву ва мюхчаншиву дуручлай бия МВД-лул ДР-лийсса ва цайми кIанттурдая командировкарттай бувкIсса зузалт. Ва шинал бигьалагайсса ва цIуллу-сагъшиву дуруччайсса 27 учреждениялий дирхьуссар видеонаблюдениялул системар­тту, 37-нний – охранно-пожарный сигнализацияртту, — буслай бур Ирина МахIаммадрасуловна.
ДукIусса шиналнияр вай идарарттал ва шикку бигьалаглагисса оьрчIал аьдад чан шаврил сававнугу хъанай дур кризис. Вай давурттайнсса арцу республикалул бюджетрава гьашину итадаркьуну дур шамлий чанну.
Бадрижамал Аьлиева