Августрал 26-нний Ваччиял шяравусса райондалул Досуговый центрданул залдануву хьунни ЧIаящиял шяравасса Аьйшат ХIажиевал лакрал аьлимтуран, вайннал зияратирттан хас бувсса луттирал презентация.

Аьйшатлущал, Ккуллал райондалул жяматращал хьунабакьин бувкIун бия: Ккуллал райондалул имам МахIадов МахIаммад-Расул, МахIачкъалаливсса вокзалданул чIаравсса мизитрал имам Майрамов МахIаммад, Дагъусттаннал Исламрал университетрал студент Кандалаев Загьиди. Луттирал авторнащал хьунабакьин бувкIун бия райондалул шяраваллал интеллигенция.
Луттираясса, мунил авторнаясса ихтилат байбивхьуна МахIаммадов МахIаммад-Расуллул:
— Жунма жулва миллатрал дянив укун жяматран хайрсса инсантал бушиврия пахру бикIан аьркинссар. Му зат бачIвасса му­къурттийну бакъа, гайннал увкумур, бувсмур, маслихIат буллай бивкIмур лалавсун, жулвамур оьрмулуву ишла буллан аьркинссар. Гана гай жулва аьлимтал дакIния къагьаншиврул, хъинну хъунмасса захIмат бувссар, улу щаллусса институтрал дувайсса даву хъанахъиссар ва лу чичиншиврул бувсса захIмат. Жува барчаллагьрай буссару жулва ссийн Аьйшатлуйн. Гьай-гьай, ванин ва лу чичиншиврул, цимигу инсаннащал хьунабакьин, гайннащал ихтилат буллан багьссар, — увкуна МахIаммад-Расуллул.
Ванал хъирив Кандалаев Загьидинал бувккуна, цал аьраб мазрай, яла лакку мазрайсса, диндалун хас бувсса байтру.
Ихтилат бувна Аьйшатлул дур­сса ва дуллалисса даву бигьасса дакъашиврия Ккуллал райондалул бакIчинал маслихIатчи ва пресс-секретарь Хизриев Шамххаллул. Ванал бувсуна цува Бущихъиял (Ботлих) военкоматрай зий ивкIсса чIумал бакIрайн багьшиву 1999-ку шиналсса «марцIсса бусурмантал», гайннан кIулну бивкIшиву анжагъ диндалущал бавхIусса «Аллагьу акбар» тIисса кIива махъ. Бакъая тIива гай жулва инсантал, бия чил хIукуматрая бувкIсса, наркотикир­ттал къагъ бувсса террористал.
Диндалул тIимур ппив буллай бивкIсса аьлимтурал дурсса давурттая гьарта-гьарзасса ихтилатру бувна хъуначу Исмяил-хIажинал, Майрамов МахIаммадлул, райондалул УО-рал бухгалтер Оьмаров МахIаммадлул, райондалул администрациялийсса жагьилтурал политикалул отделданул хъунама Чаринов МахIаммадлул, райондалул азарханалул хIакин Аьшаев Нуруллагьлул ва цайминналгу.
Гьарта-гьарзасса ихтилат бувна цилва ХIажиева Аьйшатлулгу, бувсуна ва лу чичлачиний хьунадаркьусса захIматшивурттая. Залдануву щябивкIминнал буллусса суаллахьхьун гьарта-гьарзасса жавабру дуллуна хъамаллурал.
Лажин хIадур дурссар ХIажимурад ХIусайновлул