КIулшивурттал ххуллийнсса цалчинсса кIюрх

Гьашину Лакрал райондалий школалийн лавгунни 1000-нния ливчусса оьрчIру. Цалчинмур классравун лавгунни 100-ннийн бивсса оьрчIру. Гъумучиял школалийн 1-мур классравун лавгунни 32 дуклаки оьрчI.

Сентябрь зурул цалчин­сса кьини школалий яла агьамми инсантал бур дахьва байбихьулул классравун наними ва хъунмур къулагъасгу, гьай-гьай, миннах дур. Гъумучиял детсадраву аьдатравун багьну бур цалчинмур классравун нанисса оьрчIру хьхьичI цалла дайдихьулул тарбия ларсъсса идаралийн бувкIун, цахава аякьалий бивкIсса зузалтрахь барчаллагьгу увкуну, гичча тарбиячитурал школалийн биян байсса. Цаннияр ца яргсса тIутIал кацIурдищал багу-балгусса оьрчIах бурган, миннан тIайлабацIу чIа учин бувкIун бия чIявусса инсантал.
Дур Лакрал райондалий цIакь хьуну ца цамургу хъинсса аьдат — администрациялул зузалт лагайссар гьарца шяраваллавусса школарттайн дуклаки оьрчIру барча бан.

КIулшивурттал кьини Гъумучиял школалул ва лицейрал учительталгу, дуклаки оьрчIругу барча бан бувкIун бия: ДР-лул культуралул министр Зарема Буттаева; «Лакрал район» МР-данул бакIчи Юсуп МахIаммадов; Лакрал райондалул администрациялул бакIчи Абакар Къюннуев; райондалул КIулшиву дулаврил управлениялул каялувчи Явсупи ХIамзаев; райондалул цаймигу идарарттал каялувчитал.
Аьдатравун багьсса куццуй, сентябрьданул цалчинсса кIюрх кIулшивурттавунсса ххуллуну хьусса мюрщулт шадлугърал линейкалийн буккан бувна цалва хъуними уссурваврал ва ссурваврал, яни 11- мур классрал дуклаки оьрчIал карду дургьуну.
Дуклаки оьрчIан тIайла­бацIусса шин чIа тIутIисса цалва ихтилатраву «Лакрал район» МР-данул бакIчи Юсуп МахIаммадовлул кIицI лавгуна лап аьратталсса заманнай тарбия буллан багьлай бушиву оьрчIру, мунийн бувну хъунмур къулагъас тарбиялул даврих дуллан багьлай бушиву, тарбия дакъаний, дагьайсса кIулшивугу ласун къабюхъавай тIий, оьрчIал оьннасса чIун дайгьин кабакьу буллалисса спортрал ва физкультуралул даврихсса къулагъасгу хъиннура гужлан дуллан багьлай бушиву. Бувсуна райондалий бушиву, вузирдавун къабуххарчагу, заргалталну зий, цалва маэшат буллалисса жагьилтал. ОьрчIан лакрал аслийсса сянат лахьхьин дуллалаврихлу барчаллагь увкуна ОьрчIал творчествалул къатлуву заргалшиврул кружок дихьлахьисса Куяев Нураттиннухь ва миккува кIицI лавгуна цайми сянатру лахьхьин дулланссагу чаранну лякъин багьлай бушиву. Хъунмур чIурчIав райондалул бакIчинал дуруна ЕГЭ-рдай. КIицI лавгуна 10-11-ми кла­ссирттал дуклаки оьрчIангу, нитти-буттахъангу уттива хIадур хъанан багьлай бушиву экзаменнайн.
Цила ватанлувтурахь цIусса дуккарил шингу барачат дан, учительтуран ва дуклаки оьрчIан тIайлабацIу чIа учин Зарема Буттаева бувкIун бия хъинсса ссайгъатирттащал — Гъумучиял школалун пишкаш бунни музыкальный центргу, Дагъусттаннал, Аьрасатнал ва дунияллул классикалул музыкалул диск­ругу; лицейран – телевизоргу, Республикалул БакIчи Рамазан АьбдуллатIиповлул сценарий чирчусса, Дагъусттаннал шаэр Расул ХIамзатовлуясса фильм­рал дискгу.
Цалчинмур классравун наниминналгу ххари бувна цинявппа -школалухасса ва учительтурахасса назмурду пасихIну ккалай, байбихьулул кIулшивурттал ххуйсса гьану бушиву ккаккан бувна.