Бархъаллал жяматрал яла ххуймур хасият хъамал ххирашиву, хъамаличу угьан кIулшиву дур. Фестивальданийн Бархъалав бувкIун бия Дагъусттаннал, Аьрасатнал регионнаясса хIат-хIисав дакъасса чIявусса хъамал. Шяраву фестиваль нанисса кьинирдай бувкIцири хъамаллурайн оьвтIий, цуя ца инсан лув агьан итлай бакъая.
Цал шяравун увкIсса инсан, шичча лаглай ия уттигу цимилгу махъунай учIансса гьавасращал. Шиккун цалла кьай-кьуйлущал бувкIсса хъамалгу, хъинсса машригу бувну, хъинну рязийну зана хьунни.
ХIапшиматусса Абасова ХIаписат бувкIун бия фестивальданийн цила душ Зухращал ва арснал душ Бариятлущал. Вай лавсун бувкIун бия фестивальданийн ранг-рангсса хьхьичIарасса сунттул ххаллая цала карунних накьич щарщусса ххютIри. ХIаписат буслай бия вай ххютIри щащан кIива-шанма барз лагайшиву. ХхютIрай наранжисса накьичру дишин ишла байсса бур хьхьичIазаманнул сунттул халичартту, янналул парчри ттиривзусса сунттул ххаллу. Накьич дихьлахьисса ххютIрансса яннагу цалла карунних щаршсса дур. Вайннуй дирхьусса накьичругу нукIузаманнай щаршсса затирттая ларсъсса дур. Вай щархъавух бувккун, хьхьичIрасса накьичру дусса затирттая суратру рирщуну, цалва каталог бувну бур. ХIаписат буслай бур ва давриха зий 25 шинни, цилла даву душнингу лахьхьин дуллай бура тIий.
«Казикумух» ООО бур арцу-мусил кьай ва сувенирду дуллалисса ца кулпатрал тIивтIусса предприятие. Цалла арцу-мусил чIюлушиннарду, арцул ххаржанну, турду ларсун ва цаймигу кьай-кьуй ларсун бувкIун бур Эфендиева Ххадижат ва мунил арс АхIмад. 20-хъул шиннардий буттал дургьуну диркIсса сянат утти ххаллилну АхIмадгу дачин дурну ур. Цалва пиша куртIну лахьхьаву мурадрай, АхIмадлул къуртал бувну бур Жамаллул цIанийсса Дагъусттаннал художествалул училище. Оьрмулул 10 шинаву айивхьуну ур АхIмад буттацIа заргалшиву дан лахьлай. Цалла дурсса ххаржантру, чIиллу, арцу-мусил чIюлушиннарду вайннал уттинингу цимирагу выставкалийн дуккан дурну дур.
Выставкалийн бувкIун бия УнцIукIуллал шяравасса дунияллийх цIа ларгсса тIаннул усттар, заргал МахIаммадаьлиевхъал наслу.
— На Бархъалавсса фестивальданийн учIан хьхьичIсса гьантрай гьуртту хьура Пятигорск шагьрулий хьусса «Машук-2015» тIисса форумрал лагрулувусса Дагъусттаннан хас дурсса программалуву. Муниннин хьхьичIгу гьуртту хьуссияв Ашттарханнай хьусса «Живая вода» тIисса фестивальданий. Утти шиккун увкIра ттулва кулпат Мариян-Асиятлущал ва 13 шин хьусса арснащал. Ттун ва касму буттал буттахъая дирну дур, ванихун агьну хьунни 23 шин. Жул наслулул дуссар «анчи» тIисса жуллара накьич. ТIаннул кьай дан ишла дара ахъвазандалул, вахIшисса хъюртул, гьивхьхьул мурхьирдал тIама. Ми чIюлу дара варшав арцуй (мельхиорданий). ТIаннуйх цал марилка дурккун, ялтту дуккайссар 7 къат лакрал. Лакгу дурчIин аьркинссар ххуйсса, накьич цIанлаган къадансса, — тIий буслай ур унцIукIуллал усттар МахIаммадаьли.
Ва фестивальданийгу МахIаммадаьлил тIаннул кьай лув дагьан къаритлай, машлуй най дия. Ванал клиентътал бур республикалия, Аьрасатнава бакъассагу, дазул кьатIатуссагу. Махъсса ппурттуву ванал кьай тIалав дуллан бивкIунни интернетравухчIин. Уттигъанну Халкьуннал сянатирттал комитетрайхчIин ванайн увккун ур Американал Колорада штатраясса Дуглас Смит. Мунал цал архIал тIалав бувну бур МахIаммадаьличIату исвагьисса 25 тIаннул кIичIу. Яла, ми салихI бивзун, бучIан бувну бур мукунмасса 130 кIичIу.
— Ттулла карунних дурсса кьай-кьуй ххуй дизлазисса, тIалав дуллалисса клиентътал чIявусса бур, гьалак уклан икIара цинявннал тIалавшиннарду щаллу дансса, рязий бансса чIун диял къахъанай. Утти ттун хIадур хъанан багьлай бур декабрь зуруй Франциянаву кIицI лагантIисса Дарбант шагьрулун 2000 шин шаврин хас дурсса мероприятиялий…
Бархъаллал хъаннил царай караматсса варсул усру, кисри, чантайртту щащай. МахIаммадова Сузуннул канила дукъаккайсса даву дакъар. Фестивальданийгу Сузуннул варсул усру лув дагьан ритлай бакъая.
ЧанкурхIажиева Зубайдатгу цимурца дан кIулсса, магьирсса усттартуравасса ца бур. Ца дайнал цимурцагу дайссар учай. Зубайдатлул каруннилгу ччарча исвагьисса тIахIунттив дувай, ччарча аьнтIикIасса чантайртту, кисри, жуларду щащай.
— Жул ниттилгу цила хъирив булунсса гьитри цила щавщун бивкIссар. МюрщинияцIава ниттил лахьхьин буллай, циняв душваран гьитри щащан кIулссар, — тIий бур Зубайдат.
Бархъаллал душварал каруннил дурмунил хIайран буллай бия фестивальданул хъамал.
ЦIанихсса бархъаллал заргал МахIаммадхIажи МахIаммадхIажиев чIявуссаннан кIулссар. Вайнналмур сянатгу буттал буттахъая шихуннай нанисса дур. МахIаммадхIажи МахIаммадхIажиевлул цала арс Загьидинащал бувсса «Мирный воин» тIисса шахматирттая ябатIин къахъанай бия. Шахматру бишайсса къурши бувну бия ятIул мурхьирал тIаннуя, къалипруми бия цавай арцул, цавай мусил щин дурксса, ляличIину усттарну бувсса. Загьидинал цала бутта МахIаммадхIажинащал дурну дур цикссагу усттарсса давуртту. МахIаммадхIажиев Загьиди 2008 шиная шихунай хъанай ур Аьрасатнал Художниктурал союзрал член.
Цилла каруннил дурурххусса, цаннияр ца исвагьисса, лакрал миллатрал аслийсса яннардал костюмирдал коллекциярдащал фестивальданийн бувкIун бия цIанихсса модельер Минажат ХIасанова. Минажат дакIнийхтуну барчаллагь тIий бур республикалийсса халкьуннал касмурду, хаснува лакрал усттартурал пишарду, машгьур баву мурадрай ва фестиваль дурсса Расул Кьаландаровлуйн. Ва инсан, цува ватандалия архну ялапар хъанай ухьурчагу, цалла шяраваллил жяматрал пикрирдай, цащава шаймур буллай, ирсирай буттахъая шихуннай нанисса бархъаллал тIахIунтту дувултрал касму уттара дуккан дуллай, дунияллийх машгьур дуллай ур. Ванал каши-бюхъу хъиннува хъун хьуннав, дуллалимуницIун Занналгу кабакьиннав.
ХIасил, ва фестивальданул тасттикь буллай бия Бархъалав ва жулла республикалул щархъаву, хьхьичIава кунма, цIанакулгу магьирсса усттартурал каруннил дурсса давуртту тIалавну ва сийлийнура душиву.
Гихунмайгу буссар
Имара Саидова,
Андриана Аьбдуллаева
