Ларгсса ххуллун кьини жулва билаятрай лахъа-хъунну дунни Аьрасатнал ПаччахIлугърал Ттугълил кьини.
Зулайхат Тахакьаева
Аьрасатнал ттугълил бур 300-нния ливчусса шиннардил тарих. Му лявхъуну бур ХVII-ХVIII-ми ттуршукурдай, Аьрасатнал паччахIлугърай зур бусса заманнай. Цалчинма-цалчин кIяласса-някIсса-ятIулсса рангру дусса ттугъ гьаз бувну бур Петр I ппу Алексей Михайлович паччахIсса заманнай «Орел» тIисса аьрали жамилий. Триколорданул хIакьсса «ппуну» тIурча ккалли хьуну ур Петр I 1705 шинал январь зурул 20-нний ванал буккан бувну бур «гьарцагу машлул жамилий шанрангирай щуттарисса ттугъру гьаз буллан аьркинссар» тIисса Указ, цалла дурну мунил суратгу.
1858 шинал император Александр II дан дурну дур империялул гербрал рангруну хьусса лухIисса-хъахъисса-кIяласса рангру дусса ттугълил сурат. 1865 шинал январь зуруй бувккун бур вай шаннагу ранг «паччахIлугърал рангруну» цIа кусса Указ.
СССР-данул заманнай Аьрасатнаву 70-лийсса шиннардий ПаччахIлугърал ттугъну бивкIссар ятIулсса байрахъ.
СССР ппив хьусса 1991 шинал август зурул 22-нний РСФСР-данул анаварсса сессиялий хIукму бувну бур Аьрасатнал хьхьичIва-хьхьичIсса ттугъну хьусса шанщуттарисса ттугъ цIунилгу Аьрасатнал лишанну хIисав бан. 1993 шинал декабрь зурул 11-нний Аьрасатнал Президентнал Указрайн бувну, цIакь бувну бур паччахIлугърал ттугълиясса положение.
1994 шинал бувккун бур август зурул 22-мур кьини ПаччахIлугърал Ттугълил кьинину баян бавриясса Указ. Гьамин, ва кьини 3 шинал хьхьичI бувну бухьувкун цIанакулсса жулва ттугъ паччахIлугърал лишанну хIисав бансса хIукму.
2000 шинал декабрь зурул 25-нний Аьрасатнал Президент Владимир Путиннул къулбас дурну дур Аьрасатнал Федерациялул ПаччахIлугърал Ттугълиясса закондалий. ЗакондалуцIун бавкьуну Аьрасатнал ПаччахIлугърал ттугъ бур шанма архIалсса ща уттанмай бивхьусса.
Ва кьини МахIачкъалалив Яруссаннал театрданул хьхьичI хьуна МахIачкъала шагьрулул администрациялул ва «Единая Россия» партиялул Дагъусттанналмур отделениялул цачIуну хIадур дурсса концерт.
Нюжмар кьини Лакрал райондалул актовый залданувугу хьуна Аьрасатнал ПаччахIлугърал ттугълил кьинилун хас дурсса батIаву. Райондалул бакIчи Юсуп МахIаммадовлул кIицI лавгуна ва кьинилул агьамшиву. Аьрасатнал ПаччахIлугърал ттугълил тарихрая бувсуна райондалул администрациялул бакIчинал хъиривчу Юсуп Рамазановлул.
