Аьрасатнал гражданство ласун ччисса Американал боксернан, дунияллул боксрал бусала хьусса Рой Джонслун-чIаваманан Каспийскалий квартира пишкаш буван хIадурну ур Дагъусттаннал профессионал боксрал Федерациялул Президент, Аьрасатнал спортрал мастер Зайнулаьбид ХIажиев.

«Ларгсса нюжмардий дунияллул чемпионнал цIа цимиллагу ларсъсса, 1988 шиналсса Олимпиадалий арцул медаль ларсъсса Джонс Аьрасатнал Президент Путиннущал хьунаавкьуну, цува Аьрасатнал гражданство ласун дакIний ушиву бувсунни. Му щаллагу дунияллийсса оьрчIал кумир ур, му Каспийскалийн учIарча, боксрахун машхул хьун ччиминнал аьдадгу гьаз хьунтIиссар, боксертурал секциярду гьарза хьунтIиссар. Каспийск – дунияллийх цIа ларгсса тамансса боксертал тарбия бувсса шагьрур. ХIайдарбаг ХIайдарбаговлул, Султан Ибрагьимовлул, Альберт Селимовлул, ХIабиб Аллахвердиевлул, Тимур Гайдаловлул, МахIаммад АьрипхIажиевлул ва цаймигу спортсментурал цIарду машгьурссар, Каспийскаллал боксрал школалул тарбия бувминнал 5 олимпий медаль ларсъссар, 30-ха лирчусса медальлу дунияллул чемпионатирттай ва первенствардай ларсъссар, Каспийск Джонслун бавкьусса шагьру хьунтIиссар», — тIий ур Зайнулаьбид ХIажиев. Джонслун хиял бусса бур Американаву кунмасса боксертурал савлугърал зал Аьрасатнавугу буван. Му залгу циванни Каспийскалий къабуван, тIий ур республикалул профбоксрал Федерациялул Президент.