Ялув ЧIатIлухъиял шяраваллил кьини дуллалишиву бувсуна «Илчилул» редакциялийн увкIсса сакиншинналул комитетрал член Дамаданов Убайдуллагьлул.
Байран хъанай дия июльданул 25-нний, мунияту хьхьичIмур кьини МахIачкъалалия Ялув ЧIатIлухъиял чIявусса халкь бувккунни кIюрххилва ххуллийн, тамансса куклу машинартту ва маршруткартту бия ялув ЧIатIлухъун най.

ХIасан Аьдилов
Ялув ЧIатIлухъиял шяраваллил кьини хьуннав, цамур байран хьуннав лавайсса даражалий дайссар, хъинну хIадургу хьуну. Ххуйну хIадур хьуну бия ва ххуллухгу.
Ахттакьуннил ссят 5 хьусса чIумал машинарттал кьюкьа дуркIуна Лув ЧIатIлухъиял шяравун, тикку чан-кьансса аглангу хьуну, кьюкьа дуркIуна Ялув ЧIатIлухъун. Хъамал хьунабакьин щарнил зума-къирагърайн бувккуна шяраваллил цаппара арамтал дучрай кIанттул яннагу ларххун, буттахъал аьдатрайну.
Байрандалийн бувкIун бия Ставрополлая Жяъпаров Мурад кулпатращал цачIу, Ставрополлал крайрайсса Донское тIисса шяравату Каримовхъал кулпат, Татарсттаннал республикалийсса Набережные Челны шагьрулия увкIун ия Сулайманов Зулпукьар, Сахалиннаяту – Сулайманов Амрид, Владимирдал областьраяту – Дамаданов Максим ва Дамаданова Жагьангюль.
Хъиривмур кьини, июльданул 25-нний, кIюрххил 10 ссятраву байбивхьунни спорт­рал бяст-ччал: дучри ххяххан баву, чару личаву, ка дишаву, лечаву. Лечавриву 1-мур кIану бувгьунни Кьурбанов ХIажирахIиннул; дучри ххяххан бавриву – ХIашимов Аьдиллул (чу бия Шагьимарданнул); чару личавриву – Каримов Ширинбарал; волейболданий бувккун ххув хьунни шагьрулул команда (капитан Ш. Каримов); кару дишавриву – АхIмад Рамазанов (ЦIуссаккулатусса).
КьатIату бувкIсса шяравучутурал тIутIал шалкка бивхьунни дяъвилия зана къавхьусса щарнил чиваркIуннан дацIан дурсса гьайкалданучIа. Яла хIатталлив лавгун бувккунни алхIамгу.
Ахттайн бивзун махъсса 2 ссятраву байбихьлай бия шадлугърал официалмур бутIа. Музыкалущал хьунабавкьуна Рутуллал администрациялул делегация. Делегациялул каялувчину ия администрациялул бакIчи МахIаммад МахIарамов. Ялами бия ганал хъиривчутал, Загсрал хъунмур, архиврал хъунмур ва цаймигу къуллугъчитал.
БувкIсса хъамаллурахь аьла-ссаламгу бувну, барчагу бувну, Ялув ЧIатIлухъиял кьини тIиртIуна шяраваллил бакIчи Серго Дамадановлул.
Шяраваллил байран кьинилун хас бувсса хъунмур ихтилат (доклад) бувна «Аьрасатнал Федерациялул образованиялул лайкь хьусса учитель» Аьлибутта Дамадановлул. «Жува шиккун бавтIун буру уттигу цал дакIнийн дичин жулла ларгсса, ца кулпат­раву дурсса оьрчIшиврул ва жагьилшиврул шинну, лагма-ялттусса дакIнил ларсъсса тIабиаьтрах, лухччах, зунттурдах мякьсса ябитан», — увкуна ихтилатчинал. Ганал бувсуна мукунма МахIачкъалалиягу, цайми кIанттурдаятугу бувкIсса инсантураяту, барчаллагь увкунни шяраваллил кьини даврил сакиншинналул комитетрал члентурахь: Дамаданов Убайдуллагьлухь, ХIасанов Аьбдуллухь, Макьсумов Кьурбаннухь, Кьурбанов Аьшуравлухь, ХIашимов Буттахь, Кьурбанов Арзиклухь, Дамаданов Дамаданнухь, МахIаммадов Аьбдуллухь, Абакаров МахIаллихь ва сакиншинналул комитетрал председатель – шяраваллил бакIчи Серго Дамадановлухь.
Ихтилатчинал аьла-ссалам бунни чIаххувсса Дюкъуллал ва Лув ЧIатIлухъиял шяравату оьвкуну бувкIминнахь, Рутуллал шяравату бувкIсса райондалул администрациялул бакIчинахь ва миннал зузалтрахь ба-бакI. Так Лакрал ва Ккуллал районнаясса вакилтал къабувкIуна, майрайва оьвкуну бивкIнугу.
Аьлибутта Дамадановлул бувсъсса куццуй, цIанасса ппурттуву шяраваллил дянивмур даражалул школалий зий ур 18 учитель, миннавату 15 ур лараймур даражалул кIулшивуртту ларсъсса. Школа райондалий яла ххуйминнувасса цаннин ккаллину бур. Амма ялу-ялун школалийн заназисса оьрчIру чан личIлай бур, жагьилсса кулпатру шагьрурдайн бизлай тIий. Мунин бансса чарангу бакъар. Школалул директорнал хIарачатрайну школа бакьин бувну, цIубуккан бувну бур.
Шяраву зий бур фельдшернал пункт. Микку зий ур ххуйсса пишакар – фельдшер Темиров Загьиди, га лайкь хьуну ур ДР-лул ЦIуллушиву дуруччаврил министерствалул ХIурматрал грамоталун.
Шяраву зий бур Культуралул къатта, мунил директор ХIашимов Михаиллул сакин бувну бур къавтIаврил ва балайчитурал коллектив. Ялув ЧIатIлухъиял шяраву цIана яхъанай бур 67 кулпат. Шяраваллил лагмара дур тамансса хъу-лухччив. Шяраву ур фермер Дамаданов Ибадуллагь. Ва цила чIумал зий ивкIссар шяраваллил бакIчинугу, колхозрал председательнугу. ЦIана Ибадуллагьлул ябуллай ур 10-хъайсса лухIи ризкьи ва 100-аксса яттил хIайван. «Узданну оьрму бутаншиврул захIмат буллан аьркинссар», — тIий ур Ибадуллагь. Ссуттил ризкьи машай буккан буллай ур, яттил нис дахлай ур.
Шяраваллил кьинилун хас бувсса ихтилатрая махъ, щарнил жямат барча буллалисса махъ лавхъунни Рутуллал райадминистрациялул бакIчи МахIаммад МахIарамовлул. Махъ лавхъун махъ ванал цаппара хьхьичIунсса зузалтран ва школалул дуклаки оьрчIан дуллунни бахшишру. Ялагу махъру лавхъунни райондалул ЗАГС-рал хъунмунил, Архиврал отделданул хъунмунил ва цаппара цаймигу зузалтрал. Гьарца махъ лавхъманан хасну дайва къавтIаву, учайва балай.
Школалул чулухсса хъунна­сса хIаятраву мукьва мурцIу бувну столлу бивхьуну, сайки 400-500 инсан щяикIансса кIанттурду хIадур бувну бия, столлу, хъатIай кунма, дуки-хIачIиялул щаллу бувна. Миккун наниманан ххуллий ацIан увну дукьрахIанттил буцIайва 86 шинавусса Сайпул ва Ибадуллагьлул. Мажлисрай махъру буллай бия шяраваллил гьарца тухумрал вакилнахьхьун, яла циняв ганал гъан-маччасса бизайва къавтIун, лях-карах учайва балайрдугу.
Ахттайн бивзун махъ шяравун бивуна оьвкуну бувкIсса Лакрал театрданул артистътал, минналгу тамансса чIюлу бувна мажлис цалва балайрдайну. МаркIачIаннин лахъи ларгуна Ялув ЧIатIлухъиял кьинилун хасъсса шадлугъру. МаркIачIаннай 9 ссятраву дайдирхьуна Лакрал театрданул балайчитурал концерт. Балайрду тIий бия: ДР-лул лайкь хьусса артист ХIажиаьли ХIажиаьлиев, ДР-лул лайкь хьусса артист Халисат Батырбекова, ДР-лул лайкь хьусса артист Юлиана МахIаммадова, артистътал Барина Мусаева, артист Ибрагьим Рабаданов, чангий Саддам АхIмадов.
Концертрая махъ бувна хъунмасса ссувхIатгу. Халкь ппив хьуна хьхьувай ссят 11-нния махъ.
Махъмахъ. Райондалиягу, шагьрурдаятугу бувкIсса цинявннал цIарду дурккуна доклад буллалиминнал, так ца «Илчи» кказитрал зузалал цIа личIаннин. Миллатрал республикалул кказитрал цIа хIурматрай дакъахьурча, аьркинссия «Рутуллал хаварду» тIисса райондалул кказитрайн оьвчин, жуйн къаоьвкуну. Утти шяраваллил кьини дуллалисса чIумал мукун бан бучIиссар.