Шагьрулул къайгъурдаха зий бур

wkpor_8Июль зурул 31-нний шагьрулул администрациялул хъунаманал цалчинма хъиривчу Аьбдулмуъмин Ибрагьимовлул каялувшиннаралу хьунни «Городская культура или ее отсутствие» тIисса цIанилусса «ккуркки столданул» даву.

Имара Саидова
Шикку гьуртту хьунни шагьрулул мэрнал хъиривчу Камил Изиев, Кировлул цIанийсса райондалул администрациялул хъунама СалихI Сагидов, Ленинский райондалул администрациялул хъунама ХIажияв Дарбишев, Советский райондалул администрациялул хъунама Заурбаг Вагьабов, УЖКХ-лул хъунама ХIажимурад Аьбдуразакьов, Транспортрал, промышленностьрал ва ххуллурдал давурттал управлениялул хъунама Андрей ХIусайнов, «ЭКО-М» ООО УК-лул вакилтал, ДР-лийсса ТО «Госавтодорнадзорданул» хъунама МахIаммад Кьурбанов.
Аьбдулмуъмин Ибрагьимовлул бувсунни «ккуркки столданул» даврил агьаммур мурадгу хIакьинусса кьини шагьрулуву сакин хьусса масъалартту щаллу бансса ххуллу-чаранну лякъаву хъанахъишиву.
«Ччя-ччяни хьунабакьлай буру шагьрулул администрация ва шагьрулул санитариялул жаваблувми цайва бивхьусса бигарду щаллуну биттур къабуллалисса кIанттурдащал. Цукунсса захIматшивурттащал хьунабакьлай буссарив шагьрулул властьру ва ми масъалартту цукун щаллу бан аьркинссарив ххалбигьинтIиссар хIакьинусса ва батIаврий жува», — увкунни Аь. Ибрагьимовлул.
Шагьрулул администрациялул махъсса шиннардий, шагьру ччюрклицIа марцI баву мурадрай, дунни цикссагу журалул давур­ттив. Амма, цукунсса ци давуртту дулларчангу, жущава уттигу му масъала дузрайн буккан буван къабювхъунни, — тIий ур шагьрулул хъунаманал хъиривчу.
Июль зурул лажиндарай Аьбдулмуъмин Ибрагьимов цалва зузалтращал архIал занай ивкIунни шагьрулул марцI-чапалшиврул тагьар ци даражалий дурив ххалдуллай. Мунал цалчинсса гьантрайва ялун личин бунни цимигу цайнура цирда хIасул хьусса ччюрклил бакIурду. Аьбдулмуъмин Ибрагьимов ца нюжмардува ччюрклил бакIурду бувкьун бурив ххалбан лавгсса чIумал, миннун кIанай лявкъунни цIуницIа цайми ччюрклил бакIурду бувну. Мунийн бувну бувчIлай бур, «ЭКО-М» компаниялул даву чялиш дуккан даву бакъассагу, аьркинну бушиву агьалинащалгу шагьрулул марцIшиву дуруччаву мурадрайсса ихтилатру буллан.
Шиккура ккаккан дунни шагьрулул пресс-службалул ва информациялул ва аналитикалул ларсъсса, тIайланна машинарттал ххуллийн ччюрк дичлачисса, агьали дащуй бихьлахьисса видеоролик. МахIатталсса иш, цуя ца инсан 50 метралийх лавгун контейнердавун ччюрк дичин ччисса акъар. Мукун ччи-ччинийн ччюрк дичлачими ххай бур шагьрулул администрациялул къуллугъирттай зузиминнал бурж бусса цалла дирчусса ччюрк дукьлан.
«ЭКО-М» ООО УК-лул директор Расул АьбдурахIмановлул бусаврийн бувну, ччюрк дукьаврихлу багьа буллай бусса бур так 20-25 % шагьрулул халкьуннал. Мукунма шагьрулувусса цурда ца строительствалул компаниялул цалла хъиривсса ччюрк дукьаншиврулсса кьутIи чирчуну дакъар «ЭКО-М» компаниялущал.
Советский райондалул администрациялул бакIчинал бувсунни ларгсса нюжмардий, 300-хъул машгьурсса спортсмен гьуртту хьуну, «Спортсмены за чистый город» тIисса субботник дуршиву. Му акциялувух хIала бувххун бур медработниктал, учительтал ва чIявусса цаймигу агьали. Мукуннасса субботник дурну дур Кяхулай поселокрайгу.
МахIачкъала шагьрулул администрациялул хъунаманал бигарду чIумуйнусса биттур буллалисса Муса Мусаевлул тапшур бунни шагьрулул дянихсса агьамми кIичIирттава ччюрк дичайсса контейнерду дукьан дувансса. Му хIукмулийн бувну, «ЭКО-М» компаниялул ми ххуллурдай дирхьунни лазиларкьусса, мюрщисса контейнерду. Агьалинан кIулну бикIаншиврул, ми контейнердавун ччюрк дичин ихтияр дуссар кIюрххил ссят 9 хьуннин.
Шагьру ччюрклицIа марцI баврил масъаларттаха зий бур УЖКХ-лул зузалтгу. Цалла дуллалисса давурттая бувсунни УЖКХ-лул хъунама ХIажимурад Аьбдуразакьовлул. Ванал бусаврийн бувну, хIакьинусса кьини АхIмад-хан Султаннул цIанийсса проспектрая ччюрк дукьлай зий бусса бур зузалтрал 13 группа.
Кировлул ва Ленинский районнал администрациярдал хъуними тIалав буллай бур ччюрк дичаврил низам лиян дуллалиминнай хъунисса аькIри дишаву.
— ХIакьинусса кьини хъинну хъунмасса масъала хъанай бур ччюрклил бакIурдай дуланмагъ хъанахъисса ургала акъасса ризкьигу. Ми ризкьилун къадагъа къадуллалисса залуннай хъунисса аькIри къадихьларчан, му масъалагу цукунчIав щаллу бан хьун най бакъар, — увкунни СалихI Сагидовлул.
Шагьрулул санитария тагьарданийн дуцаврил хIакъиравусса цалва пикри бувсунни Заурбаг Вагьабовлулгу. Мунал маслихIат ккавккунни цинявппагу ишбажаранчитурал «ЭКО-М» компаниялущал ччюрк дукьаврил хIакъиравусса кьутIирду чичинсса.
«Ккуркки столданул» даврий гьаз бунни жяматийсса транспорт дацIан ккаккан бувсса остановкардай маршрутный таксирду бацIан буллай, агьали азурда буллалаврил хIакъиравусса масъаларттугу. ХIакьинусса кьини ихтияр да­къасса кIанттурдай маршрутный такси бацIан буллалисса шофертурай 2000 къурушрайн дирсса аькIри дихьлантIиссар. Мукунна хъунисса аькIри дихьлантIиссар маршрутрал таксилул лицензия дакъаминнайгу.
КIирахъул ссятрай лахъи лавг­сса батIаврий маслихIат ккавккунни ялув кIицI лавгсса масъалартту дузрайн буккан баву мурадрайсса плангу сакин дурну, му план кьянкьану биттур дуллан.