ЦIуллу-сагъшиву дуруччаву хьхьичIуннай хъанай дур

ХьхьичIава бугьараминнал учайва: «Инсан щинал дурцIусса кьачIари, ччимур чIумал ччимур хьун бюхъайссар», — куну. На ххишала учивияв: «Мукунсса чIумал дакI тIайласса, ка сававсса хIакиннайн бакIрайн агьаннав цума-цагу», — куну.

Мяйжаннугу, мукунсса духтуртал, медсестрахъул хьунабавкьунни ттуйнна кьини дурксса чIумал ттун Гъумук Лакрал райондалул больницалий: Дибиров АьвдурахIим Дибирович, хъунама хIакин; Саида Минкаилова невропатолог; И. А. Аьлиев, хирург; Рамазанова Мариана, хIакин; З. А. ЦIаххаева, реаниматолог; Рамазанов Шагьмандара, хIакин; медсестрахъул – МахIаммадова КьурбанпатIимат, Ханчадарова Тамара, ХIусайнова ПатIимат ва м.ц.
Вайннал цинявнналагу кIива гьантлий ттул ялату шакъакьувкьуну бур.
Я, Аллагь, цал оьрмурду лахъи баннав, цив оьрчIал ххари баннав, цал бивзсса ша Аллагь архIалсса хьуннав.
Ттуща буслай бусан къахьун­ссар кIа Гъумучиял больницалийсса шартIирдая, кIиккусса марцIшиврия. Янналух бурувгун личIи бан къахьунссия цума хIакиннив, цума медсестрарив, цума укунасса зузаларив.
Дукралул нахIушиву. Мудан больницалий дур кIирисса ва дяркъусса щин ва цаймигу чара бакъасса шартIру. Гьарца кIанттурдай багьлух дуллалисса бахиларду кIикку больницалий дуллай бур укра, ми дакъагу цучIав уххан итлайгу бакъар.
Бунагьирттал аьпа баннав цинявппагу лакран кIулсса ва бусравсса Дибир Аьбдуллаевичлул, ххаллилсса арс лакрал халкьуннал цIуллу-сагъшиврулсса буллан хъунагу, тарбиягу ув­сса.
Цими шинни къурув, кIаксса ххуйсса, хъуннасса, 3 зивулийсса больницалул къатри къуртал дан къабюхълай.
ХIурмат бусса Юсуп ХIами­дович! Ттун ттунна чIалан дир­кIунни райондалий хъанахъи­сса хьхьичIуннайшивуртту. Мунихлу вин барчаллагь. Хъунма­сса тавакъюври цIуллу-сагъшиву дуруччаврил министр Танка Ибрагьимовичлущал Респуб­ликалул бакI дургьуминнайн, Рамазан ХIажимурадовичлуйн, Аьбдуссамад Мустапаевичлуйн уккаву, 2016-ку шинаву аьркин­ссаксса арцу итадакьин дансса хIарачат бан кIа больницалул къатри къуртал дан.
Лакрал райондалул больницалияту на «Анаварсса кумаг­рал» машиналий тIайла був­ккунна МахIачкъалалив 2-мур больницалийн.
На цимилвагу хьуссара хьхьичI­ва ва 2-мур больницалий къашайшалах буруглай. Амма цIанакулсса ахIвал ва больницалул ляличIину хьхьичIунмай хьуну бур. На буссияв неврологический отделениялий, мунил хъунмурну бур Ольга Германовна. Къа­шавайминнахасса хIурмат, кIиккусса марцIшиву, дуллали­сса дукра ххаллилсса дия. Ккаккан хъина зун больницалул хIаятрал ххуйшиву, марцIшиву, щюллишиву. Гьарца кьини кIюрххил шюшайва щалла хIаят. Къашаваймигу, минначIан бувкIмигу паракьатну бигьалаганшиврул, лагмава бур бакьин бувсса скамейкарду.
ЦIана цIуллу-сагъшиву дуруччаврил министрну зий ур тамансса шиннардий Москавлив зий ивкIсса Танка Ибрагьимович. Муналгу Дагъусттаннайн тIалав бувну бур Аьрасатнаву хьхьичIунну зий бивкIсса да­гъусттанлувтал. Ми шаппайн зана хьуну бур дакIнийхтуну жулва халкьуннал цIуллушиврул ялув захIмат буллан.
Ттуща учин бюхъанссар да­гъусттаннал медицина ахиргу хьхьичIуннай хъанай дайдирхьунни куну. Бюхъай ва дайдихьу дикIан. Барачатсса хьуннав ва дайдихьу. Цайми районнайгу духьунссар дакI ххари хьунсса хьхьичIуннайшивуртту хъанай.
Дуллалимур дузрайн дукканшиврул, Танка Ибрагьимовичлул чIарав бацIан аьркинни Республикалул бакI дургьуми бакъа, кIантту-кIанттурдайсса бакIчиталгу.
Кабакьиннав зун, Аллагьнал тIайлабацIу баннав, медициналул зузалт.
Халла Аьбдуллаева,
ДР-лул БакIчиначIасса Хъунисриннал советрал член