Августрал 3-нний МахIачкъалалив Миллатирттал библиотекалул конференц-залдануву хьунни ДР-лул Культуралул министерствалул зузалтрал коллегия. Ва кьини шикку дунни 2015 шинал цалчинсса дачIишинай дурсса давурттал хIасиллу.

Коллегиялул давривух гьур­тту хьунни ДР-лул ХIукуматрал Председательнал хъиривчу ХIа­сан Идрисовгу. Мунал дайдирхьунни ва батIаву, культуралул зузалтран Аьрасатнал ва Дагъусттан Республикалул паччахIлугърал наградартту дулаврийну. Мукун, ДР-лул культуралул министр Зарема Буттаеван дуллунни 2014-ку шинал Сочилийсса XXII Олимпий кIинттулсса тIуркIурдал ва XI Паралимпий кIинттулсса тIуркIурдал Памятный медаль ва Грамота АьФ-лул Президент Владимир Путиннул цIаниясса. Мура награда дуллунни ДР-лул культуралул министрнал цалчинма хъиривчу Муслим Телякавовлун, «Лезгинка» ансамбльданул каялувшиннаран ва къавтIалтран, Оьруснал театрданул, М. Къажлаевлул цIанийсса итххявхсса оьрчIансса школданул, ДР-лул ПаччахIлугърал хорданул зузалтран ва цайминнан. Мукунма культура, халкьуннал аьдатру машгьур давриву, цIакь давриву захIмат бивхьуминнан буллунни ДР-лул Президент Рамазан АьбдуллатIиповлул чулухасса Барчаллагьрал чагъарду ва ДР-лул ХIукуматрал чулухасса ХIурматрал грамотарду, дуллунни цайми наградарттугу.
Наградартту дуллуну махъ, ХIасан Идрисовлул увкунни:
— ХIакьину ттун бахтти хьунни барачатсса даву дуван – ДР-лул культуралул лайкь хьусса ишккаккултран наградартту дулун. Ва хъанахъиссар зу гьарца кьини лавайсса даражалий дуллалисса давринсса кьиматну. Яла-яла кIицI лаган ччива Олимпий тIуркIурду. Олимпиада дайдишин хьхьичIва Сочилийн ивну, олимпий программалущал кIул хьусса чIумал, ттун бувчIуна Олимпиадалувух гьуртту хъанахъиминнал ва хъамаллурал итталун яла-яла дагьантIишиву Аьрасатнал гьарцагу региондалул ляличIийшиву, кунниха куннил къалащаву, хаснува Дагъусттаннал. Жулла республика мяйжаннугу ляличIийссар ва барчаллагь ва награда ларсминнан, му ляличIийшиву Олимпиадалий хьусса хъамаллуран ккаккан даврихлу, — увкунни ванал.
Гихуннай ва батIаврий ххалбивгьунни цаппарасса агьамсса масъалартту: халкьуннал творчество ядаву ва гихуннай дачин даву, Дагъусттаннал опералул ва балетрал театрданул, Б. Мурадовал цIанийсса Дагъусттаннал культуралул ва искусствалул колледжрал дурсса давурттал хIасиллу даву.
Халкьуннал творчество дуруччаврил аралуву дурсса давурттаясса ихтилат бунни ДР-лул культуралул министрнал хъиривчу, Республикалул Халкьуннал творчествалул къатлул директор Марита МухIадовал. Ванил, мукунма, бувсунни рес­публикалий халкьуннал цими театр, цими коллектив ва теат­рал студия буссарив, ми цукун зий буссарив. Бувсунни 2014 шиная шиннай Культуралул министерствалул щаллу дуллалисса «Творческий десант» проектрая, ларгсса шинал му проектрал лагрулуву творчествалул десант бившиву республикалул 27 муниципал сакиншиннарайн, ва шинал ахирданийннин тIурча биянтIишиву гьарцагу муниципал сакиншиннарайн, Литературалул шинал, Бюхттулсса Ххувшаврил 70 шинал юбилейрал ва Дарбантуллан 2 000 шин шаврил лагрулуву. Гихунмай Марита Велихановнал бувсунни республикалий шиная шинайн машгьур хъанахъисса проектирдая, фестиваллая.
Дагъусттаннал паччахI­лугърал опералул ва балет­рал театрданул дурсса давурттая бувсунни му театрданул художествалул каялувчи Александр Прасоловлул. Цалва ихтилатраву мунал чIурчIав дунни ларгсса шиналнияр ва шинал утти­нинсса даврил ккаккияртту хьхьичIунсса душиву, масалдаран, 2014 шинал лахъишиврий театрданул кка­ккан бувну бивкIхьурча бувагу 19 спектакль, ва шинал дачIиннуй ккаккан бувну бур 23 спектакль. Ми бакъассагу, хьуну бур цIусса 3 постановка: балет «Жди меня», музыкалул ва шеърилугърал спектакль «Медный всадник» ва оьрчIансса спектакль «Волшебное королевство». Мукунна хьхьичIра-хьхьичI дурну дур музыкалул фестиваль «Чайковский – навсегда!», хъунасса композиторнан 175 шин шаврин хасну. Ва шинал ахирданийннин театрданул давриву ххи хьун най бур уттигу 3 цIусса спектакль, мукунна личIи-личIисса журардал концертру ва оьрчIансса спектакль.
Ялун нанисса ник тарбия даврия, миннавусса гьунарду итххяххан баврия ихтилат бунни Б. Мурадовал цIанийсса Да­гъусттаннал культуралул ва искусствалул колледжрал директор ПатIма Муртазалиевал. Бувсунни ларгсса шинал му колледжрал хореографиялул отделениялул студентътурал Аьрасатнал ва дунияллул даражалий дурсса хьхьичIуннайшивурттая.
Ва кьини ялагу ихтилатру хьунни Дарбантуллал юбилейрайнсса хIадуршиннарая. Зарема Ажуевнал бавтIминнан дакIнийн бувтунни ва даву ххишала дакъа лавайсса даражалий дуван аьркиншиву, цанчирча дуллалимуних буруглай циняв дагъусттанлувтал, Аьрасат бакъа, щаллара дуниялгу дуну тIий.
Ахирданий культуралул министрнал цилла каялувшиннаралу зузиминнахь барчаллагь увкунни ва шинал 6 зурул му­тталий дурсса ххуйсса даврихлу ва чIа увкунни гихунмайгу дуллалимуниву тIайлабацIу.