2011 шинал Ккурккуллал дянивмур даражалул школа къуртал бувсса оьрчIру-душру итххявхсса, дуккавривугу хьхьичIунсса, школалул оьрмулуву чялишсса гьурттушинна дуллалисса буну, вай школалия нанисса чIумал хIайп тIий бия циняв учительтал.

Андриана Аьбдуллаева
Школалий царагу мероприятия къалагайва вай хIала бакъа­сса. Ва выпускрал оьрчIал чIявуну хьхьичIунсса кIанттурду бугьайва райондалий хъанахъисса спортрал, художествалул самодеятельностьрал бяст-ччаллаву, личIи-личIисса дарсирдал олимпиадарттай. Школа къуртал бувну махъгу личIи-личIисса ВУЗ-вун, техникумирттавун бувххун, миккугу хьхьичIунсса студентътуравух бур.
2011 шинал школагу арцул медальданий къуртал бувну, Дагъусттаннал медициналул академиялул лечебный факультетрайн бувхссия Батирханнул душ Тамари Сулайманова. Школалий дуклакисса чIумалва Тамари буссия спортрахух лавг­сса, му чулухунмай итххявхсса душ. Мудангу гьуртту шайссия райондалийсса спортрал бяст-ччаллаву, 9-мур классраву 60 км. манзилданий левчуну, райондалий 1-сса кIану бувгьуссия ванил. Институтравун бувххун махъгу, 1-мур курсирайва Тамари хIисав хьуну бур физкультуралул преподавательнан, куклу атлетикалул спортрал мастер Константин Викторович Горовлун. Мунал бувну бур спортрахун машхул хьунсса маслихIатгу.
Дуккавугу, спортгу архIал дачин дан бигьану бакъанугу, ва занан бивкIун бур тренировкарттайн. Тренировкар­ттайн занан бикIайхтува ларсун дур 1-сса разрядгу. Ххуйну дуклакаврицIун, спортравугу бюхттулсса, ххувшавуртту ласлай, институтрал цIа бюхттул дуллалисса студентка ччяни бусрав хьуну бур преподавательтуран ва архIал дуклакиминнан. Институтраву дуклакисса 3-4 шинал дянив цимивагу бяст-ччалливу гьуртту хьуну, цимирагу ххувшаву ларсун дур Тамарил. 2012 шинал, цалчинмур курсирай, куклу атлетикалул Дагъусттаннал чемпионатрай гьуртту хьуну, Тамарил 1-сса кIану бувгьуну бур 400 м. левчуну, 2-сса ва 3-сса кIанттурду – цайми журардал бяст-ччаллаву. Мунияр махъ Дагъусттаннал цачIун дур командалуву ва гьан бувну бур Кьиблалул Аьрасатнал чемпионатрайн Краснодардайн. Шиккугу личIи-личIисса манзиллай левчуну 3-сса ва 5-сса кIанттурду бувгьуну бур. 2013 шинал цIунцIия хьуну, Тамарища му шиналсса цавагу бяст-ччалливух гьуртту хьун къабювхъуну бур.
Хъирив шинал гьуртту хьуну бур Кьиблалул Аьрасатнал кIинттулсса чемпионатрай Волгоградрай. Щаллусса шинай тренировкартту кьариртун бивкIун бунугу, шикку ванища 2-сса кIану бугьан бювхъуну бур.
Мунияр махъ медициналул ВУЗ-дал дянивсса Аьрасатнал чемпионатрай троеборьелуву ва цалчин бувккун бур. Мура шинал 100, 200 ва 400 м. левчуну рекорд дирхьуну дур. Сочилий хьусса Кьиблалул Аьрасатнал жагьилтурал спартакиадалий 100 м. левчуну Тамарил цалчин­сса кIану бувгьуну бур, хъирив Краснодардай хьусса Кьиблалул Аьрасатнал чемпионатрай 200 м. левчуну кIилчин бувккун бур.
Тамарил дурурччуну дур спортрал мастер хьунсса циняв тIалавшиннарду. Утти Кьиблалул Федерал округрал цачIун дур командалуву ва гьуртту хьунтIиссар Аьрасатнал чемпионатрай. Июнь зуруй Краснодардай ларгсса жагьилтурал дянив­сса Кьиблалул Федерал округрал чемпионатрай Тамарил Дагъусттаннал рекорд дирхьуну дур 23 шинавун бияннин­сса жагьилтураву. Дагъусттаннай укунсса даража ттигу щилчIав ккаккан бувну бакъар. Вай гьантрай Тамари гьантIиссар Чебоксардайн Аьрасатнал чемпионатрай гьуртту хьун. Шикку ванин спортрал мастер хьунсса даража ккаккан бан ччай бур.
Дуккавриву ва спортравусса хьхьичIунсса ккаккиярттахлу Тамарил ласай гьаз бувсса стипендия.
— Ттул оьрмулуву медицинагу, спортгу мукссара хIала дур­ххуннихха, ттун институт къуртал бувну махъгу спортрацIун бавхIуну зунсса пикри бур. Ттун ччива спортраву хьусса цIунцIияртту хъин дуллан, ми хъин дансса цIу-цIусса кьяйдарду ляхълан, — тIий бур Тамари.
Ва барчаллагьрай бур школалийва цинма спортрах гъира бувтсса ва ххуйсса гьану бивзсса физкультуралул учитель Сабир Мухтаровичлуйн, хIакьинусса цила тренер Ибрагьимов ТIагьир Кьурбановичлуйн. Букъавсун къабучIир Тамарил ниттил ни­ттил Камилатлулгу цила чIумал спортраву бюхттулсса даража ккаккан бувну бивкIшиву.
Студенткасса чIумал ванил Дагъусттаннай цалчинсса кIану бувгьуну бивкIссар лахъи ччала ливчуну ва многоборьелул соревнованиярттай.
Таний ва гьан бувну бивкIссар Совет Союзрал соревнованияр­ттайн Ленинградрайн Дагъус­ттаннал студентътурал командалул капитанну. Оьтту-ттурчIавух буллусса гьунардануцIун ххуй­сса учитель ва ххуйсса тренер бакIрайн агьавугу Тамарин тIайлабацIу хьуну бур.
Умуд бур ванин вай гьантрай хьунтIисса Аьрасатнал чемпионатрайгу тIайлабацIу хьунссар, ца ттигу бюхттулсса ххувшаврийну жува ххари бан­ссару тIисса.
ЧIа тIий буру жула душнин цIуллушиву, гьарицагу ишираву тIайлабацIу.
Миннуярвагу лахъми ша­чIанттайн лавхъун ккакканнав, дакIнийцири хияллу бартлаганнав.