Августрал 16-нний Дарбантлив Дагъусттаннал БакIчи Рамазан АьбдуллатIиповлул каялувшиврулу хьунни республикалул шагьрурдал ва муниципал районнал бакIчитал гьурттусса гьарта-гьарзасса батIаву.
Мунил дайдихьулий Рамазан АьбдуллатIиповлул бувсунни уттигъанну билаятрал Президент Владимир Владимировичлущал хьусса хьунабакьаврия, микку ххалбивгьусса масъаларттая.
Республикалул шагьрурдал ва районнал каялувчитуращал кIантту-кIанттурдал бюджетру мюнпатну ишла баврия-къабавриясса ва цайми-цаймигу агьамсса масъаларттая махъ, Рамазан АьбдуллатIиповлул хъунмур къулагъас дунни Дарбантуллал 2000 шинал юбилейрайнсса хIадуршинна нанаврил масъалалухгу. Шикку ДР-лул ХIукуматрал Председательнал хъиривчу Анатолий Карибовлул кIицI лавгунни, федерал ва республикалул бюджетрава итадакьин ккаккан дурсса арцух агьамми давуртту дуллалаврицIун, шагьрулул 14 кIичIиравалу, 4 парк, № 15 школа ва Кырхляр тIисса насосрал станция бакьин буллалисса давурттивгу най душиву. Вай давурттал хIасиллу дуллай, августрал 15-ннин сайки бакьин бувну, къуртал бувну бур Мамедбековлул, Буйнакскийл, Чапаевлул, Рзаевлул, Нагорная, Родниковая, Кьурбановлул цIанийсса кIичIиртту. Давурттив нанисса Крупскайл цIанийсса кIичIиравалу къуртал бавай бусса бур. Ттигу бакьин бан ккаккан бувсса 6 кIичIираву, ттукIрал тталлу ва ххаллу даххана дуллай, асфальт бутIин хIадур хъанай бусса бур.
Мукунма ттинин майрал 8-нний тIивтIусса Боевой Славалул парк бакьин бувну бур. ЦIана зий бусса бур Революционертурал парк, Сулайман Стальскийл, Самурскийл цIанийсса паркру бакьин буллалавриха. Августрал 25-ннийннин паркру бакьин бувну къуртал хьун бан ккаккан бувну бусса бур.
Шагьрулул № 15 школа бувну, къуртал бавай бусса бур 95%. Сентябрьданул 1-ннин 700 дуклаки оьрчIан кIану бусса А блок ва гардеробная ва столовая бусса В блокрал дачIи объект зузи дуван тIий бусса бур.
Кырхляр насосрал станция тIурча сентябрьданул 10-ннин бакьин бувну къуртал буван тIий бур.
Юбилейрайн бучIансса хъамал кьамул бансса гостиницардал зузалтращал хасъсса семинарду бувну бур. Мукунма туристътурал ва хъамаллурал цIухху-бусу буллансса «горячая линия» телефонну щурущи дурну дур: 7 8722 56 49 09, 8 928 451 15 12.
«Дарбантлив шадлугърал кьини хьунтIисса мероприятиярдайнсса хIадуршинна цурда ца кьини лях кьакъадиртун найнна дуссар. Ххалдиргьуну дуссар му кьини дувантIисса шадлугъирттал аьмсса план: «День открытых ворот древнего Дербента» — бухзаманалул шагьрулул халкьуннал багьу-бизу ккаккан бувсса тарихрал реконструкция; «Традиция» — республикалул миллатирттал культуралул майданну ва Аьрасатнал регионнаясса коллективру гьурттусса фестиваль; «Радуга ковров» — бартбисуртту бахлахисса выставка; «Краски Нарын-Калы» суратру дишаврил магьирлугърал фестиваль; Дарбантлив цалчин аьрххилий увкIун ивкIсса Аьрасатнал паччахI Петр Первый авцIусса къатрачIа театр зумунусса представление; «День открытых храмов» проект;
«Вечному городу – вечная музыка» магьирлугърал ва творчествалул коллективирдал концертрал программа ва «2000 лет за два часа» тарихрал ва музыкалул шоу», — бувсунни Анатолий Карибовлул.
Рамазан АьбдуллатIиповлул шикку цал ялагу цала чулуха тавакъю бувунни муниципал сакиншиннардал каялувчитурахь ва агьамсса ишираву чялишсса гьурттушинна дуван. Хаснува му тавакъю бунни Дарбантуллал чулухуннайсса районнал каялувчитурахь, аэропортрая шагьрулийнсса хъунххуллуцI марцI-чапалшиврул давурттив дурну, низам дуван.
Ва бакъасса, Республикалул БакIчинал дакIнийн бувтунни хъиривва Къизлар шагьрулул гьану бивзун 280 шин хъанахъисса шадлугърайнсса хIадуршиннарал ялувгу зий байбишинтIишиву.
