Аьрасатнал Президентнал май зурул указру биттур баврил тагьар цукунсса дурив ххал дуллалисса заседание хьунни август зурул 11-нний Республикалул ХIукуматраву.

Имара Саидова
Республикалул БакIчи Рамазан АьбдуллатIиповлул кIицI лавгунни ми указирттал агьам­сса кIану бувгьушиву инсантурал оьрмулуву личIи-личIисса арардаву дахханашивуртту давриву ва низамрайн дурцунни цинярдагу журалул властирдал даву.
— Гьаз бунни харж кIулши­вуртту дулаврил, медициналул идарарттаву, социал ва культуралул идарарттаву зузиминнан. Хъин чулий да­ххана хьунни паччахIлугърал цIуллу-сагъшиву дуруччаврил, кIулшивуртту дулаврил ва элмулул чулухуннайсса политика. ЧIявуфункциярду щаллу буллалисса центрду тIитIаврийн бувну, бигьа хьунни агьалинан хIукуматрал хIаллихшиннарду даврил масъала, — увкунни Рес­публикалул БакIчинал.
Мива майский указру щаллу баврил хIакъиравусса ихтилатру бунни ХIукуматрал Председательнал хъиривчу Анатолий Карибовлул. Мунал бусласимунийн бувну, республикалул бюджетрал аралуву зузиминнал харжру дянивну хIисав бувну лахъ хьуну бур.
ЦIанасса чIумал 2015 шинал дачIи шинал лажиндарай респуб­ликалий дянивсса харж хъанай бур 18 654 къуруш.
Ванал кIицI лавгунни махъсса ппурттуву учительтуралми харжругу гьаз бан бювхъушиву.
Анатолий Карибовлул бусласимунийн бувну, бувар харжру гьаз буван ххишаласса кIулшивуртту дулаврил идарар­ттай зузисса педагогтуран, производствалул усттартуран, элмий­сса зузалтран, ясли-садирттал зузалтран. Ясли-садирттал зузалтран харж гьаз къабаврил багьана хьуну бур ми идарарттай чIявусса хасъсса кIулшивуртту къаларсъсса ва квалификация дакъасса учительтал зий бушиву. Мунийн бувну Дагъусттан Республикалул хIукуматрал хIадур буллай бур хIукму кIулшивуртту дулаврил идарарттаву зузиминнал харжру гьаз бансса ва стимулирующий арцу ххи дансса.
Анатолий Карибовлул бусласимунийн бувну, гьашину рес­публикалул бюджетраву социал сфералуву зузиминнал харжру гьаз бан ккаккан дурну дур 321,2 млн. арцул.
Ясли-садирттай ххишаласса кIанттурду бансса чаран ля­къаврил масъала гьаз буллай, ванал кIицI лавгунни хIакьинусса кьини оьрчIал багъирдавун занай бушиву оьрмулул 3 шиная 7 шинавун бияннинсса 84 248 оьрчI, сайки 26 азара оьрчI садикрайн гьан ирглий авцIуну ушиву. Ва заседаниялий Республикалул БакIчинал цимилагу кIицI лавгунни гьарица даву дагьайкун, цилла кIанайн дуртун дуллан аьркиншиву.
Агьалинан хIукуматрал ва муниципал хIаллихшиннарду электрон журалий ва чIяву­функциярду бусса центрдайхчIин даврил хIакъиравусса ихтилат бунни ДР-лул связьрал ва телекоммуникациярдал министрнан кIанайсса Юсуп МалламахIаммадовлул. Ва дачIи шинал дянив зузи бувну бур 11 МФЦ, аьмну хIакьинусса кьини республикалий зий бур 32 МФЦ, шинал ахирданийннин зун тIий бур 55 МФЦ. Циняв­ппагу уттиния тихунмай буллалисса МФЦ-рду буллан тIий бур инвестортал кIункIу бувну, администрациярттал МФЦ-рду бансса къатри личIи дурсса 4 район личIаннин. ЦIанасса чIумал республикалий МФЦ-рдал хIаллихшиннарду ишла дуллай бур республикалул агьалинал 49,6%, МахIачкъалалив – 27%. Цинярдагу хIаллихшиннарду дуллан хьуншиврул, республикалул районнай ва шагьрурдай уттигу 23 МФЦ тIитIин багьлай бур. ЦIанасса чIумал республикалий зузисса МФЦ-дайхчIин агьалинан 258 журалул хIаллихшиннарду дуллай бур.