Аьрасатнал Пенсионный фондрал Дагъусттанналмур отделениялул баян бунни федерал льготниктуран, ялун нанисса 2016 шинал социал услугартту цирда ритансса ягу миннухлу арцу ласлансса бази дуван аьркиншиву октябрь зурул 1-ннин. Дагъусттаннайгу, цайми-цайми регионнай кунна, социал льготарду щаллуну ягу дачIи арцуйну тIалав дуллай бур пенсионертурал, мукунсса ихтияр закондалийн бувну дунавхьур.

П. Рамазанова
Дагъусттаннал ОПФР-лул Управляющийнал хъиривчу Нуруллагь Сулаймановлул бувс­мунийн бувну, хIакьинусса кьини чIявуми пенсионертал льготарттан кIанттай арцу ласлай бур. Сававрттуми личIи-личIисса дур. Масалдаран, даруртту тIалав бувминнаща ми ласун хъанай бакъар, ца даруврал хъирив кIийла-шамийла аптекалийн гьан багьлай бусса бур къашайшалан, дарув бур, бакъар тIий азурда увсса му чунчу чаврил яла аптекалийнагу гьан ччай акъар. Кувний аьркинсса дарув бучIаннин ялугьлагьисса пенсионернал рецепт чIумува дуклай дур, кувнийгу, аьркин­сса дарув бакъахьувкун, мунил аналог лакъавсун чара бакъар. Мунияту арцу язи дугьлай бур. Санаториялийн-курортрайн бигьалаган гьансса льготалулгу мура сант дакъа макьан дур. Инвалидтал шиннардий ялугьлай бур путевка дучIаннин, пайда къахъанайкун, канивун дириллалисса къурушра хъинни тIий бур. Транспортрайнсса хIаллихшинналулгу мура тагьар дур, пенсионертал нажагь ба­къасса цамур шагьрулийн найвагу бакъар, мунияту миккугу арцу ласавривура къулайшинна дур. 2015 шинал апрель зуруя тIайла хьуну социал услугарттал набор хъанай дур 930 къуруш зуруй. Нуруллагь Сулаймановлул бувс­мунийн бувну, ларгсса шиннардийва льготникнал Пенсионный фондрайн социал услугарттая махъаллил хьушиврул аьрза буллуну бухьурча, цIуницIа аьрза буллансса чарабакъашиву дакъар. Аьрза булун аьркинну бур, агана льготникнал цалва хIукму баххана буварча. Масалдаран, арцу къаласлай, льготардура тIалав дуван ччай ухьурча. Ягу социал хIаллихшиннарду ласлансса ихтияр цIуну ларсма (пенсиялийн увкма) ухьурча. Мукунминнан аьркинссар октябрь зурул 1-ннин аьрза булун цува яхъанахъисса кIанттайсса ПФ-рал управлениялийн. Дагъус­ттаннай ЕДВ ласайсса инсан усса ур 347 азаллий 247, миннавагу социал услугартту кьамулсса бур 49 азаллий 978 инсан. Социал хIаллихшиннардаяр арцу къулай дизаврил сававрттуми жу кIицI дуварду. Гьарманал цанма къулаймурди язи бугьай­сса. Федерал льготниктуралгу хIукуматрал цахьхьунна дуллалисса ихтияр цIакьлин дургьуну, чансса духьурчагу канивун дуркIми къурушру бусравну дур. Мукунний учай «ссавруннай­сса кьурукьнияр, кIунттивусса хъурсулдакIи хъинссар» кунугу.