Ца чIумал щарнил душру лавгун бивкIун бур зун­ттавун сан дан. Миннащал лавгун ивкIун ур ЦIинцIиргу. Зунттаву бяйкьуну, цIаннайн багьну бур. Ца липI-липI тIисса чани ххал хьуну, ми му чаннайн лавгун бур. Ца пукьлуву ляркъуну дур ца хъуннар хьусса къари. Мугу диркIун дур душру, оьрчIру букай къари. Къарил, миннан лув-ялунссагу дуллуну, душру – ца чулий, оьрчI ца чулий уттубишин бувну бур. Къари цихьра цурда тIий диркIун дур, мурчIи бурцIин кунна, заннал цинма букан кьисмат гьан бувну бур, буканна тти вай тIий.
Цаппара хIаллавун, хъамал шанай бурив, бакъарив ххал бан, къарил:
— Цума шанай, цума къашанай? – куну, цIувххуну бур.
— Циняв шанай, ца на ЦIинцIир къашанай, — куну бур оьрчIал.
— Циван къашанай? – куну бур къарил.
— Ва чIумал ттул ниттил ттун накIлий пулав булайссия, — куну бур ЦIинцIирдул.
Бувну къарилгу буллуну бур оьрчIан накIлий пулав. Цалагу бувкуну бур, ккашилсса душварачIангу гьан бувну бур. Душругу бивкIун бур, къарийн вихшала дакъа, шанаши мишан дурну, шакъашанай.
Ялагу чIун ларгукун, къарил цIувххуну бур:
— Цума шанай, цума къашанай? – куну.
— Циняв шанай, ца на ЦIинцIир къашанай, — куну бур ялагу оьрчIал.
— Циван къашанай? – куну бур къарил.
— Валлагь, ва чIумал ттун ниттил ккурккимайлухун хъат рирщу ххункIру булайссия. Ми дакIнин багьлай, къашанай ура, — куну бур ЦIинцIирдул.
Бувну къарил, буллуну бур оьрчIан ккурккимайлухун ххункI­ру. ЦIинцIирдулгу цалагу бувкуну бур, душварангу бириян бувну бур.
Цаппара чIунну ларгукун, ялагу дуркIун, увкуну бур къарил:
— Цума шанай, цума къашанай?
— Циняв шанай, ца на ЦIинцIир къашанай, — куну бур ялагу оьр­чIал.
— Циван ина ттигу къашанай? – куну бур къарил.
— Ва чIумал ттул ниттил Хъун неххаяту парачувун пулав бигьулувух ларсун щин дулайссия.
Ларгун дур къари мукун щин ласун. Яла ЦIинцIирдул куну бур:
— Бизияра, душрув, анаварну! Чанигу хьунна дур. Жува къарихьхьун къабиривнува шаппай ливхъун гьаннуча.
Яла ми циняв бивзун, анаварну бавчуну бур шаппай. Най ца хъуннасса неххачIан бивсса чIумал, миннан ххал хьуну дур цала хъирив лаявай кIа щяйтIан къари. Неххайхгу бивкIун бур ламур тIисса цинма цуппалу­сса ца ттала. Мунийх анаварну неххал тийнгу лавхъун, миннал ттала кIункIу бувну цала чулинмай ххюрхху бувну бур. Му ссят къари ялун дирну: «На мийн лахъан дара, зу миккун цукун лавхъру», — тIун диркIун дур. Яла ЦIинцIирдун ххал хьуну дур неххал тиячул зия хьусса гьарахъалттил нигьру. Увкуну бур къарихь: «Ми нигьругу бакIрайх ларххун ина щинавух дачирча, шийн лахъантIиссара, жугу мукун лавхъру», — куну. Яла мунилгу, ларсун гай гьарахъал­ттил нигьру, бакIрайх ларххун дур. Дурххун дарчуну дур къари неххавун. Ца кьунттухун дахчуну, дагьну дур. Ххишала мунища ларай дизан къархьуну дур. Му дюркьшиву кIул хьувкун, душругу, ЦIинцIиргу, зана бивкIун махъунмай, къарил пукьлух бурган лавгун бур. КIиву ляркъуну дур чIярусса эмаратру, лачакру ва циняв душваран биялсса буттукьри. Мигу лавсун, сангу экьидирчуну, душру ва ЦIинцIир шаппай бувкIун бур.
Миннал ттунгу ссайгъат буллуна. Миннуву ца хъуннасса карщигу дия. Муних оьнцIу лишинна тIий майрайн щусса, му кьункьувух яларай ларгун кьакьарттуву лирчIун, гужрай ду­ккан дав. Душру бюкьай къарил гьарца зад укунсса дикIайссар куну, ттунна дуллумур цимурца на ххуллий парабакIурттайн дичав. Мичча шинай яла навагу увкIра.